މާލޭގެ ވޭސްޓް ޓްރާސްފަރ ސެންޓަރު އޮގްސްޓް މަހުގެ ނިޔަލަށް ކޮމިޝަން ކުރެވޭނެ: އެންވަޔަރަމަންޓް މިނިސްޓްރީ
ސެންޓަރުގެ 77 އިންސައްތަ މަސައްކަތް ވަނީ ނިމިފައި
އަހުމަދު އާޒިމް
މާލޭގައި ހަދަމުން އަންނަ ވޭސްޓް ޓްރާންސްފަރ ސެންޓަރުގެ މަސައްކަތް ނިންމައި އަންނަ އޮގަސްޓް މަހުގެ ނިޔަލަށް ކޮމިޝަން ކުރެވޭނެ ކަމަށް ކޮންޓްރެކްޓަރާ ހަވާލާދީ އެންވަޔަރަމަންޓް މިނިސްޓްރީން ބުނެފިއެވެ.
އެ މިނިސްޓްރީގެ ބެލުމުގެ ދަށުން ކުރިއަށްގެންދާ ގްރޭޓަރ މާލެ ވޭސްޓް މެނޭޖްމަންޓް ޕްރޮޖެކްޓުގެ އިންފޮމޭޝަން އެޑިއުކޭޝަން އެންޑް ކޮމިއުނިކޭޝަން ސްޕެޝަލިސްޓް އަހުމަދު އާޒިމް "ރާއްޖެޓީވީ" ގެ ފަލަސުރުހީގައި ވިދާޅުވީ މާލޭގެ ވޭސްޓް ޓްރާންސްފަރ ސެންޓަރުގެ މަސައްކަތް ހަލުވިކަމާއެކު ކުރިއަށްދާ ކަމަށެވެ. އެގޮތުން، މިހާތަނަށް އެ ސެންޓަރުގެ 77 އިންސައްތަ މަސައްކަތް ނިމިފައިވާއިރު އެތަނަށް ބޭނުންވާ އުޅަނދުތަކާއި އިކުއިޕްމަންޓުތައް ހަމަޖެހިފައިވާ ކަމަށް ވެސް އޭނާ ވިދާޅުވިއެވެ.
އާޒިމް ވިދާޅުވީ މާލޭގައި އުފެދޭ ކުނި ތިލަފުއްޓަށް މިހާރު ގެންދާއިރު އެންމެ ބޮޑަށް ދިމާވާ ދައްޗަކީ ކުނި ވަކިކޮށްފައި ނުހުންނަ ކަން ކަމަށެވެ. މިކަން ދިމާވަނީ މާލޭގައި އެފަދަ އިންފްރާސްޓްރަކްޗާއެއް ނެތުން ކަން އޭނާ ފާހަގަކުރެއްވިއެވެ. އެގޮތުން، މިހާރު ވެމްކޯއިން ޚިދުމަތް ދެމުން އަންނަނީ ވަގުތީ ސެޓަޕެއްގައި ވަރަށް ދަތިކޮށް ކަމަށާއި އައު ޓްރާންސްފަރ ސްޓޭޝަނާއެކު މާލެއިން ކުނި އުކާލުމުގައި ހުރި ދަތިތަކަށް ހައްލު ލިބިގެންދާނެ ކަމަށް އޭނާ ވިދާޅުވިއެވެ.
ގްރޭޓަރ މާލެ ވޭސްޓް މެނޭޖްމަންޓް ޕްރޮޖެކްޓަކީ މާލެ ސަރަހައްދުގައި ކުނި މެނޭޖް ކުރުމަށް ދިމާވެފައިވާ ދަތިތަކަށް ދާއިމީ އަދި ވަށާޖެހޭ ހައްލެއް ހޯދުމަށް ކުރިއަށްގެންދާ މަޝްރޫއެކެވެ. މި މަޝްރޫއުގެ މަސައްކަތް 2018 ވަނަ އަހަރު ފަށާފައިވާއިރު މަޝްރޫއުގެ މަސައްތަކުގެ ތެރެއިން މާލެ ސަރަހައްދުގެ 32 ދެ ރަށަކަށް ކުނި މެނޭޖް ކުރާ ވަސީލަތްތައް ފޯރުކޮށްދޭނެއެވެ. އަދި ވެމްކޯއަށް ބޭނުންވާ ފަންނީ އަދި ޓެކްނިކަލް އެހީތެރިކަން ވެސް މި މަޝްރޫއުގެ ދަށުން ފޯރުކޮށްދޭނެއެވެ.
އާޒިމް ވިދާޅުވި ގޮތުގައި މި މަޝްރޫއުގެ މަސައްކަތް އެއްކޮށް ނިމޭއިރު ކުންޏާ ދޭތެރޭ އާއްމުން ދެކޭގޮތް އެއްކޮށް ބަދަލުވެގެންދާނެއެވެ.
