ޔޫކްރޭންގެ ޑޭމަށް ދިން ހަމަލާގެ ސަބަބުން މަރުވި މީހުންގެ އަދަދު އިތުރުވަނީ، ހުޅަނގުގެ ތުހުމަތުތައް އަމާޒު ވަނީ ރަޝިއާއަށް

ހަނގުރާމާގައި ޔޫކްރެއިންގެ ކަޚޯވްކާ ޑޭމަށް ދިން ހަމަލާގެ ސަބަބުން ފެންބޮޑުވެ، ހާދިސާގައި މަރުވި މީހުންގެ އަދަދު 45ށް އަރާފައިވާކަމަށް ރިޕޯޓުތައް ބުނެފިއެވެ.

ޔޫކްރެއިނުން ވަނީ މިހާދިސާގެ ސަބަބުން އެގައުމުގެ 16 މީހުން މިހާތަނަށް މަރުވެފައިވާކަމަށް ބުނެފައެވެ. ރަޝިޔާގެ އޮފިޝަލުން ވަނީ އެގައުމުން ކޮންޓްރޯލްކުރާ ސަރަހައްދުތަކުން 29 މީހުން މަރުވެފައިވާ ކަމަށް ބުނެފައެވެ.

ޖޫން މަހުގެ ހަ ވަނަ ދުވަހު ކަޚޯވްކާ ޑޭމަށް ދިން ހަމަލާގެ ސަބަބުން ޔޫކްރޭންގެ ދެކުނުގެ ބޮޑު ބިމެއްގައި އަދި ރަޝިޔާއިން ހިފާފައިވާ ޔޫކްރޭންގެ ބައެއް ހިސާބުތަކުގައި ފެންބޮޑުވެ، ގެތައް ފެންގަނޑުގެ އަޑިއަށް ގޮސް، ދަނޑުވެރިކަމުގެ ބިންތައް ހަލާކުވެ އާންމުންނަށް ބޮޑެތި ގެއްލުންތަކަކާ ވަނީ ކުރިމަތިލާންޖެހިފައެވެ.

ޔޫކްރޭންގެ ދާޚިލީ ވުޒާރާއިން ހޮނިހިރު ދުވަހުގެ ރޭ ދަންވަރު ޓެލެގްރާމް ޗެނަލް މެދުވެރިކޮށް ބުނެފައި ވަނީ ޚާރްސަން އާއި މައިކޮލައިވް ސަރަހައްދުގެ ފެންބޮޑުވެފައިވާ ސަރަހައްދުތަކުން 3،600 އަށް ވުރެ ގިނަ މީހުން އެހެން ހިސާބުތަކަށް ބަދަލުކޮށްފައިވާކަމަށާއި، ބައެއް މީހުން އަދިވެސް ނުފެންނަ ކަމަށެވެ.

ޑޭމަށް ދިން ހަމަލާއަކީ ރަޝިއާއިން ދިން ހަމަލާއެއް ކަމަށް، ތަހުގީގުން ހާމަވާކަމަށް ނިއު ޔޯކް ޓައިމްސް އިން ވަނީ ރިޕޯޓުކޮށްފައެވެ. ނަމަވެސް ރަޝިއާއިން ދަނީ އެންމެ ފުރަތަމަ ދުވަހުން ފެށިގެންވެސް މިކަން ދޮގުކުރަމުންނެވެ. އެގައުމުން ބުނަނީ މިހަމަލާއަކީ ޔޫކްރެއިންގެ އަސްކަރިއްޔާއިން ދިން ހަމަލާއެއް ކަމަށެވެ.