ޤައުމީ ބޮޑީބޯޑިން ލީގުގެ ފުރަތަމަ އިވެންޓު "ބުރުނު ޝިކާރު" ފަށައިފި

މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން އިންތިޒާމުކޮށްގެން ބާއްވާ ޤައުމީ ބޮޑީބޯޑިން ލީގުގެ މިއަހަރުގެ ފުރަތަމަ އިވެންޓު "ބުރުނު ޝިކާރު" ފަށައިފިއެވެ.

މާލޭ ސިޓީ ވަރުނުލާ ރާޅުގަނޑު ސަރަހައްދުގައި ކުރިޔަށްދާ މި އިވެންޓުގައި ޖުމްލަ 25 އެތުލީޓުން ވަނީ ބައިވެރިވެފައެވެ. 25 އެތުލީޓުން މެންސް އޯޕަންގައި ވާދަކުރާއިރު ޖޫނިއާ މެންސްގައި އަށް އެތުލީޓުން އަދި ޑްރޮޕް ނީ ގައި 12 އެތުލީޓުން ބައިވެރިވެފައިވެއެވެ.

މިއަދު ކުރިޔަށްދިޔައީ މެންސް އޯޕަންގެ ފުރަތަމަ ތިން ރައުންޑާއި، ޖޫނިއާ މެންސްގެ ފުރަތަމަ ދެ ރައުންޑުގެ ހީޓުތަކެވެ. މިއާއެކު މެންސް އޯޕަންގެ ކުއާޓާ އަދި ޖޫނިއާ މެންސްގެ ސެމީގައި ވާދަކުރާނެ ބައިވެރިން ވަނީ ކަށަވަރުވެފައެވެ.

މެންސް އޯޕަން ކުއާޓާ ފައިނަލްގެ ފުރަތަމަ ހީޓުގައި ވާދަކުރާނީ ރާއްޖޭގެ ޗެމްޕިއަން އަލީ ޚުޝްރުވާން އަހުމަދު (ކުޑަ އައްޔަ)، ޤައުމީ ޒުވާން ޗެމްޕިއަން އާމިން އުމަރު މޫސާ އަދި ދާވޫދު ފަޒީހެވެ. ދެވަނަ ހީޓުގައި ވާދަކުރާނީ އަލީ ޖާވިދު (ޖާއްޓެ)، އަޝްރަފް ހަސަން އަދި އިޖާޒް ޝަރީފެވެ. ތިންވަނަ ހީޓުން ޖާގަ ހޯދީ އަހުމަދު ނަޒްމީން، އަލީ ޝާމް ރާފިއު އަދި އަހުމަދު އައިހަމް އެވެ. ކުއާޓާގެ ފަހު ހީޓުގައި ވާދަކުރާނީ އަސްވާން މުހައްމަދު (ދޫނި)، އިޔާން އަހުމަދު އަދި މުހައްމަދު ޖަރީޝް ޖިހާދެވެ.

ޖޫނިއާ މެންސް ސެމީގެ ފުރަތަމަ ހީޓުގައި ވާދަކުރާނީ އާމިން، އިޔާން އަދި ދިބޫ އެވެ. ދެވަނަ ހީޓުގައި ވާދަކުރާނީ މުހައްމަދު އަޒާން އަހުމަދު، މުހައްމަދު ކައިފް އަދި ޖަރީޝްއެވެ.

ބޮޑީބޯޑިން އެސޯސިއޭޝަނުން ހަތް އަހަރަށްފަހު އަލުން ބުރުނު ޝިކާރު ބޭއްވީ މިދިޔަ އަހަރުއެވެ.