ޔޫކްރެއިން ރަޝިޔާ ހަނގުރާމައަށް ހައްލެއް ހޯދޭތޯ ބެއްލެވުމަށް އެފްރިކާގެ ވެރިންގެ ވަފްދެއް ޔޫކްރެއިންގެ ކިއިވް އަށް ޒިޔާރަތް ކުރައްވައިފިއެވެ.
މިވަފްދުގައި އިސްކޮން ހުންނެވީ ދެކުނު އެފްރިކާގެ ރައީސް ސިރިލް ރާމަޕޯސާ އެވެ.
އެފްރިކާގެ ވެރިންގެ ވަފްދެއް ޒިޔާރަތް ކުރެއްވި ނަމަވެސް ރަޝިޔާއާއެކު ސުލްހައިގެ އެއްވެސް ވާހަކަތަކަކަށް ދާން އެއްބަސްނޫންކަމަށް ޔުކްރެއިންގެ ރައީސް ޒެލެންސްކީ ވިދާޅުވެފައިވާ ކަމަށް އޭއެފްޕީން ރިޕޯޓްކޮށްފައި ވެއެވެ. ޒެލެންސްކީ ވިދާޅުވެފައިވާ ގޮތުގައި އެއްވެސް ކަހަލަ ވާހަކަތަކަށް ދިއުމުގެ ކުރިން ހަނގުރާމަ މެދުކަނޑާލަންޖެހޭނެއެވެ. ޔޫކްރެއިންގެ ރައްޔިތުންނަށް ލިބެމުންދާ ވޭނާއި އަނިޔާ ހުއްޓެންޖެހޭނެ ކަމަށް ޒެލެންސްކީ ވިދާޅުވެފައިވެއެވެ.
ހުކުރު ދުވަހު ފެއްޓެވި ދަތުރުފުޅުގައި ކިއިވް އަށް ވަޑައިގެންނެވުމަށްފަހު ރާމަޕޯސާވަނީ މައްސަލައަށް ސުލްހަވެރި ހައްލެއް ހޯދުމަށްޓަކައި ރަޝިޔާ އަދި ޔޫކްރެއިނުން ވެސް ހަމަލާތައް ވަގުތުން ހުއްޓާލާ މަޝްވަރާގެ ތެރެއިން ސުލްހަވެރި ހައްލެއް ހޯދުމަށް ގޮވާލައްވާފައެވެ.
ސެނެގޯލް، އީޖިޕްޓް، ޒެމްބިޔާ، ސައުތު އެފްރިކާ އަދި ކޮމޮރޯސްގެ ވެރިން ހިމެނިވަޑައިގަންނަވާ ވަފްދުގެ ބޭފުޅުން ޔޫކްރެއިނަށް އަރާވަޑައިގެންނެވި ވަގުތާ ދިމާކޮށް ވެސް ރަޝިޔާއިން ވަނީ ޔޫކްރެއިނަށް މިސައިލް ހަމަލާތަކެއް ދީފައެވެ. އަދި ބާރުގަދަ ގޮވުންތަކެއް ހިނގާފައި ވެއެވެ. ސީއެންއެން އިން ބުނެފައިވާ ގޮތުން މިގޮވުންތައް ބާރުގަދަކަމުން އެފްރިކާގެ ވަފްދު ވަގުތުން ވަނީ ބަންކަރުތަކަށް ގެންދެވިފައެވެ.
މިހަމަލާތަކާ ގުޅިގެން ޔޫކްރެއިންގެ ރައީސްގެ އޮފީހުގެ އިސްބޭފުޅަކު ވިދާޅުވީ މިދަނޑިވަޅު މިފަދަ ހަމަލާތަކެއް ދީގެން ޕޫޓިން ދައްކަވަން ބޭނުންފުޅުވީ ބޭރުގެ އިއްޒަތްތެރިންގެ ރައްކާތެރިކަން ވެސް މުހިންމު ނޫންކަމަށެވެ. އަދި އެކަމާ ފަރުވާލެއް ނުބަހައްޓަވާ ކަމެވެ.
ވަފުދުގެ ބޭފުޅުން ހޮނިހިރު ދުވަހު ރަޝިޔާއަށް ވަޑައިގެން ރައީސް ވްލަޑިމިއަރ ޕޫޓިންއާ ބައްދަލްކުރައްވާގޮތަށް ވަނީ ހަމަޖެހިފައެވެ.
އެފްރިކާގެ ވެރިންގެ ދަތުރުފުޅަކީ ޔޫކްރެއިން ހަނގުރާމައިގެ ސަބަބުން އެފްރިކާގެ ގައުމުތަކުގައި ކާބޯތަކެއްޗާއި ހަކަތަ ލިބުން ދަތިވެ ތަދުމަޑުކަން އާންމުވަމުންދާތީ އެކަމަށް ހައްލެއް ހޯއްދެވުމުގެ ގޮތުން ފައްޓަވާފައިވާ ދަތުރު ފުޅެކެވެ.
މިދަތުރުފުޅާ ބެހޭގޮތުން ރާމަޕޯސާގެ އޮފީހުން ބުނެފައިވާ ގޮތުގައި މިއީ އެފްރިކާ ބައްރުން ބޭރުގެ ކަމެއްގައި ސަރުކާރު އަދި ދައުލަތުގެ ވެރިން އެކުގައި ދަރުތު ކުރައްވާ ފުރަތަމަ ފަހަރު ކަމުގައެވެ. ރައީސް ރާމަޕޯސާގެ ތަރުޖަމާން ވިދާޅުވީ ހަނގުރާމަ ހުއްޓާލުމުން ހަމައެކަނި ޔޫކްރެއިންގެ އެތައް މިލިއަން މީހުންނަށް ކުރިމަތިވެފައިވާ ތަކްލީފްތައް ހުއްޓޭނީ ނޫން ކަމަށާއި، ކާބޯތަކެތީގެ ރައްކާތެރިކަމާ މެދު އެފްރިކާގެ ގައުމުތަކުގައި އުފެދިފައިވާ ކަންބޮޑުވުމާ ނުތަނަވަސްކަމަށް ވެސް ލުއި ލިބިގެންދާނެ ކަމުގައެވެ.
