އިސްލާހީ މަސައްކަތުގައި ދީނީ އިލްމުވެރިން އެއް ވިސްނުމެއްގައި ތިބެންޖެހޭ: އިމްރާން

އިސްލާހީ މަސައްކަތުގައި ދީނީ އިލްމުވެރިން އެއް ވިސްނުމެއްގައި އެއްގޮތަކަށް ސާބިތުކަންމަތީގައި ތިބުން ވަރަށް މުހިންމު ކަމަށާއި، އެގޮތަށް މަސައްކަތް ކުރަންޖެހޭ ކަމަށް އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެެއްޖެއެވެ.

ހޯމް މިނިސްޓަރުކަން ވެސް ކުރައްވަމުން ގެންދަވާ އިމްރާން މިހެން ވިދާޅުވީ ހުކުރު ދުވަހުގެ ރޭ އަދާލަތު ޕާޓީގެ މެންބަރުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

އިމްރާން ވިދާޅުވީ 2005 ގައި އަދާލަތުޕާޓީ އުފެއްދީ ވަރަށް ބޮޑެތި ގޮންޖެހުންތަކާއެކު ކަމަށާއި، ކާމިޔާބީއާ ހަމައަށް ވާސިލުވުމަށް ގިނަ ބަޔަކު މަސައްކަތްތައް ކޮށްފައިވާ ކަމަށެވެ. އޭރު އަދާލަތު ޕާޓީން މަސައްކަތް ކުރީ ބަޔަކު ވެރިކަމުން ބާލައި، ވެރިކަމަށް ގެނައުމަށް ނޫން ކަމަށެވެ. އަދި އަދާލަތު ޕާޓީ ވެރިކަމަށް އައުމަށް ވެސް މަސައްކަތް ނުކުރާ ކަމަށް އިމްރާން ވިދާޅުވިއެވެ. ނަމަވެސް މިހާރު އެ އުސޫލު ބަދަލުވެފައިވާ ކަމަށާއި، މިހާރު މަސައްކަތް ކުރަނީ ގައުމު އިސްލާހުކޮށް، ރާއްޖެ އިސްލާމީ އުސޫލުތަކާއި ހަމަތަކުގެ މަތިން ރާއްޖޭގެ ވެރިކަން ހިންގުމުގެ ނިޒާމެއް ރާއްޖޭގައި އުފެއްދުމަށް ކަމަށް އިމްރާން ވިދާޅުވިއެވެ.

އިމްރާން ވިދާޅުވީ އެ މަގަށް ވާސިލްވުމަށް ޕްލޭން އެކުލަވާލާފައިވާ ކަމަށާއި، އެ މަގާހަމައަށް ދަތުރުކުރުމަށް މިއަދުން ފެށިގެން އެމަގުން އަޅަންޖެހޭ ފިޔަވަޅުތައް ސާބިތުކަމާއި ހަމަހަމަކަމާއެކު އަޅައިގެން ކުރިއަށްދާން ޖެހޭ ކަމަށް އޭނާ ވިދާޅުވިއެވެ.

އިސްލާހީ މަސައްކަތްތަކަށް އިޝާރާތް ކުރައްވައި އިމްރާން ވިދާޅުވީ ދެމެހެއްޓިނިވި ގޮތެއްގައި އިސްލާހީ ހަރަކާތްތައް ކުރިއަށް ގެންގޮސް، މަސައްކަތް އެއްދުވަހުން އަނެއް ދުވަހަށް ކުރިއަރުވަމުން ގެންދިއުމުގައި އިލްމުވެރިން އެއް ވިސްނުމެއްގައި އެއްގޮތަކަށް ސާބިތުކަންމަތީގައި ތިބުމަކީ ވަރަށް މުހިންމު ކަމެއް ކަމަށެވެ.

އިމްރާން ވިދާޅުވީ އިސްލާހީ މަސައްކަތުގައި ކުރިއަށް ދިއުމަށް މަގުތައް ފަހިވާ ކަމަށާއި، އެންމެން އެކަތިގަނޑެއްގެ ގޮތުގައި މަސައްކަތް ކުރަންޖެހޭ ކަމަށެވެ.