ދަ ޑިމޮކްރެޓްސްގެ ޖަލްސާތައް ބާއްވަމުންދާކަން އީސީއަކަށް ރަސްމީ ހަސިއްޔަތަކުން ނޭނގޭ
އެ ޕާޓީން ޖަލްސާއެއް ބޭއްވިކަމަށް ބުނެ އެއްވެސް ފަރާތަކުން ޝަކުވާ ހުށަހަޅާފައެއް ނުވޭ
މިނިވަން މުއައްސަސާތަކުގެ ކޮމިޓީގައި އިލެކްޝަންސް ކޮމިޝަންގެ މެމްބަރުން
ދަ ޑިމޮކްރެޓްސް ޕާޓީގެ ޖަލްސާތައް ބާއްވަމުންދާކަން އިލެކްޝަންސް ކޮމިޝަން (އީސީ) އަށް ރަސްމީ ހަސިއްޔަތަކުން ނޭނގޭ ކަމަށް އެ ކޮމިޝަނުން ބުނެފިއެވެ.
އެ ޕާޓީން ވަނީ ދެ ޖަލްސާއެއް މިހާތަނަށް ބާއްވާފައެވެ. އެކަމާއި ގުޅޭގޮތުން ރާއްޖެއެމްވީން އިލެކްޝަންސް ކޮމިޝަންގެ ރައީސް ފުއާދު ތައުފީގާއި ސުވާލުކުރެއްވުމުން ވިދާޅުވީ ޖަލްސާއެއް ބޭއްވިކަން ރަސްމީ ހަސިއްޔަތުން އެނގިވަޑައިނުގަންނަވާ ކަމަށާއި އެޕާޓީން ޖަލްސާއެއް ބޭއްވިކަމަށް ބުނެ އެއްވެސް ފަރާތަކުން ޝަކުވާ ހުށަހަޅާފައިނުވާ ކަމަށެވެ.
ފުއާދު އިތުރަށް ވިދާޅުވީ އެކަމާއި ގުޅޭގޮތުން ދަންނަވާނެ އެއްޗެއް މިވަގުތަށް ނެތް ކަމަށެވެ.
ދަ ޑިމޮކްރެޓްސް ޕާޓީ އުފެއްދުމުގެ ހުއްދަ އީސީން ދީފައިވާއިރު އެޕާޓީން 3000 މެމްބަރުން ހަމަކުރުމަށްފަހު ހުށަހެޅި ފޯމްތައް މިހާރު ދަނީ ޕްރޮސެސް ކުރަމުންނެވެ.
އާންމު ގޮތެއްގައި ޕާޓީގެ ހަރަކާތްތައް ފަށަނީ ޕާޓީއަށް މެމްބަރުން ހަމަވެ، ފޯމްތައް ޕްރޮސެސްކޮށް ނިމުމުންނެވެ. އެމްޑީޕީގެ ކުރީގެ ހަރުގެ ދަ ޑިމޮކްރަޓްސްއަށް ބަދަލުކޮށް، އެތަނުގައި ނަންބޯޑު ހަރުކުރުމަށްފަހު އަލުން ހުޅުވީ ޖޫން 8 ވަނަ ދުވަހުއެވެ. އޭގެ ފަހުން އެތަނުގައި އަންނަނީ އެޕާޓީގެ އެކި ހަރަކާތްތައް ބާއްވަމުންނެވެ.
