ޑޯޓްމަންޑަށް ކުޅެމުން އަންނަ އިންގްލެންޑްގެ މިޑްފީލްޑަރު ޖޫޑް ބެލިންހަމް ގެނައުމުގެ މަސައްކަތް ރެއާލް މެޑްރިޑުން ނިންމާ، އެއްބަސްވުމުގައި ސޮއިކޮށްފިއެވެ.

އުމުރުން 19 އަހަރުގެ ބެލިންހަމް، ރެއާލް މެޑްރިޑާއެކު ހަ އަހަރުގެ އެއްބަސްވުމެއްގައި ސޮއިކޮށްފައިވާއިރު، ބުރާސްފަތި ދުވަހު ރެއާލް މެޑްރިޑުގެ ކުޅުންތެރިއެއްގެ ގޮތުގައި ރަސްމީކޮށް ދައްކާލާނެއެވެ.

މި މަހުގެ ކުރީކޮޅު ޑޯޓްމަންޑުން ވަނީ ސްޕެނިޝް ލީގުގެ ރެއާލް މެޑްރިޑުން ބެލިންހަމް ގެނައުމަށް 103 މިލިއަން ޔޫރޯގެ އެއްބަސްވުމެއް ހަދާފައިވާކަން ކަށަވަރުކޮށްދީފަ އެވެ. ފާއިތުވި ތިން އަހަރުގެ ހުރިހާ ކަމަކަށް ޑޯޓްމަންޑުގެ ހުރިހާ އިސްވެރިންނަށާ ސަޕޯޓަރުންނަށް ބެލިންހަމް ވަނީ ޝުކުރު އަދާކޮށްފައެވެ. އޭނާ ބުނީ ބޮޑެތި އަދި ކުދި ވަގުތުތަކުގައި މިހާ ގިނަ ފަހަރަށް ޖާޒީ ލާން ލިބުމަކީ ލިބުނު ޝަރަފެއް ކަމަށެވެ. އަދި އޭނާ އަލަށް ގުޅޭ ކުލަބާ ދޭތެރޭ ވިސްނި ނަމަވެސް، ޑޯޓްމަންޑު މަތިން ހަނދާން ނުނެތޭނެކަމަށް އޭނާ ބުންޏެވެ.

ކާލޯ އަންޗެލޮޓީގެ ޓީމުން ޔޫރަޕްގެ ފުޓްބޯޅައިގެ އެންމެ ބާރަށް ކުރިއަރަމުންދާ އެއް ކުޅުންތެރިޔާ ހޯދާފައިވަނީ މެންޗެސްޓާ ސިޓީ އާއި ލިވަޕޫލް އިންވެސް އޭނާ ހޯދުމަށް މަސައްކަތްކުރި ދަނޑިވަޅެއްގައެވެ.

ޖަރުމަނުގައި ހޭދަކުރި ތިން އަހަރުގެ ތެރޭގައި ބެލިންހަމް ވެގެން ދިޔައީ ޖަރުމަނު ލީގުގެ އެންމެ މޮޅު އެއް ކުޅުންތެރިޔާއަށެވެ. މި ސީޒަނުގައި އޭނާ ވަނީ 31 މެޗު ކުޅެ، އަށް ލަނޑު ޖަހާފައެވެ. އަދި އޭނާ ވަނީ ޓީމުގެ ކެޕްޓަންކަން ވެސް ކޮށްފައެވެ.

ބެލިންހަމް އަކީ ރެއާލް މެޑްރިޑުން 100 މިލިއަން ޔޫރޯ އަށް ނުވަތަ އެޔަށްވުރެ ބޮޑު އަގެއްގައި ގެނައި ތިން ވަނަ ކުޅުންތެރިޔާއެވެ. މީގެ ކުރިން އެ ޓީމުން ވަނީ 2013 ވަނަ އަހަރު ގެރެތު ބޭލް އަދި 2019 ވަނަ އަހަރު އެޑެން ހަޒާޑް ބޮޑު އަގެއްގައި ގެނެސްފައެވެ.

ބެލިންހަމް އަކީ އިންގްލެންޑުގެ ގައުމީ ޓީމުގެވެސް މުހިންމު ކުޅުންތެރިއެކެވެ. އަނިޔާގެ ސަބަބުން ކުރިޔަށް އޮތް ޔޫރޯ ކޮލިފައިން ދެ މެޗުގައި ނުކުޅެވުނު ނަމަވެސް އޭނާ ވަނީ 2022 ވަނަ އަހަރުގެ ވޯލްޑް ކަޕުގައި އިންގްލެންޑް ކުޅުނު ފަސް މެޗުގައިވެސް ކުޅެފައެވެ.

މެޑްރިޑުން ފަހަކަށް އައިސް ކުރިއަރަމުން އަންނަ ހުނަރުވެރި ކުޅުންތެރިން ގެނައުމުގެ ސިޔާސަތެއް ގެންގުޅެމުން އަންނައިރު، ވިނިޝިއަސް ޖޫނިއާ، ރޮޑްރިގޯ ގޯސް، ފެޑެރިކޯ ވަލްވާޑޭ އަދި ކަމަވިންގާ އަކީ ފުރަތަމަ ޓީމުގެ މުހިންމު ކުޅުންތެރިން ތަކެކެވެ.