ޕީޕީއެމް/ޕީއެންސީގެ މެމްބަރުންނާ ހެދި އެޗްއާރްސީއެމްގެ އޮފީސް ބަންދުނުކުރެވި، މުވައްޒަފުން ތާށިވެފައި
12:45 ގައި ވަޑައިގެންނެވި ގޮތަށް އެބޭފުޅުން އެޗްއާރްސީއެމްގެ އޮފީހުން ނުނިކުމެ އެތަނުގައި އެބަތިބި
އިދިކޮޅު ކޯލިޝަންގެ މެމްބަރުން އެޗްއާރްސީއެމްގެ އޮފީސް ތެރޭގައި
އިދިކޮޅު ކޯލިޝަން ޕީޕީއެމް/ޕިއެންސީގެ މެމްބަރުން ހިއުމަން ރައިޓްސް ކޮމިޝަންގެ އޮފީހަށް ގަދަކަމުން ވަދެ ތިބުމުން، އެތަނުގެ މުވައްޒަފުން އޮފީހުގައި ތާށިވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން އެޗްއާރްސީއެމްގެ ރައީސް މަރްޔަމް މުނާ ވިދާޅުވީ އިދިކޮޅު ކޯލިޝަން މެމްބަރުން ބައްދަލުކުރަން އެދިވަޑައިގަތުމުން، ބުދަ ދުވަހުގެ 11:15ށް ބައްދަލުވުން ހަމަޖައްސަވައިދެއްވި ކަމަށެވެ. ނަމަވެސް 12:30 ވިއިރުވެސް އެބޭފުޅުން ބައްދަލުވުމަށް ވަޑައިނުގަންނަވާ ކަމަށާއި ކުއްލިއަކަށް 12:45ށް ބައްދަލުވުން ފަސްކުރަން އެދިވަޑައިގެންނެވި ކަމަށެވެ.
އެހެންނަމަވެސް ފުލުފުލުގައި އެކި ބައްދަލުވުންތަކާއި އިވެންޓްތައް ހުރުމުން ބުރާސްފަތި ދުވަހުގެ ހެނދުނު 09:00 ޖަހާއިރަށް ވަޑައިގަތުމަށް އެބޭފުޅުންނަށް ގަޑި ދެއްވި ކަމަށާއި 12:45 ގައި ވަޑައިގެންނެވި ގޮތަށް އެބޭފުޅުން އެޗްއާރްސީއެމްގެ އޮފީހުން ނުނިކުމެ އެތަނުގައި ތިބި ކަމަށް މުނާ ވިދާޅުވިއެވެ.
އޮފީސް ތިނެއް ޖަހާއިރު ބަންދުކުރާ ކަމަށާއި ނަމަވެސް އެބޭފުޅުން އެތަނުގައި ތިއްބެވުމުން، މުވައްޒަފުން އޮފީސް ތަޅުނުލެވި ތަނުގައި ތާށިވެފައި ތިބެން ޖެހުމުން އޮފީސް އޮތީ ބިރުވެރިކަމެއްގެ ތެރޭގައިކަން މުނާ ފާހަގަކުރެއްވިއެވެ. އެ ކޮމިޝަނަކީ އެކި ޤާނޫނުތަކުގެ ދަށުން ތަހުޤީޤު ކުރާ އިދާރާއަކަށްވާއިރު އެބޭފުޅުން އަޑުގަދަކުރުމުން މަސައްކަތަށް ބުރޫ އެރި ކަމަށާއި އެގޮތުން ތަހުޤީޤު ބަޔާންތަކުގެ މަސައްކަތް ވެސް ކުރިއަށް ނުގެންދެވުނު ކަމަށް މުނާ ވިދާޅުވިއެވެ.
މުނާ ވިދާޅުވީ ތަން ބަންދުނުކުރެވިގެން ފުލުހުންގެ އެހީތެރިކަމަށް އެދުނު ކަމަށާއި މިހާރު ފުލުހުން ތަނުގައި ތިބި ކަމަށެވެ. އިދިކޮޅު ކޯލިޝަންގެ ބޭފުޅުން އެގޮތަށް އަޑުގަދަކޮށް ތަނުގައި ގަދަކަމުން ތިއްބެވުމުން މުވައްޒަފުން ތިބީ ވަރަށް ބޮޑު ބިރުވެރިކަމެއްގެ ތެރޭގައި ކަމަށާއި އެއީ ވަރަށް ދެރަކަމެއް ކަމަށް ވެސް ވިދާޅުވިއެވެ.
މުނާ އިތުރަށް ވިދާޅުވީ ޕީޕީއެމުން ބައްދަލުކުރަން އެދެފިނަމަ ޚާއްސަ އިސްކަމެއް ދީގެން އެބޭފުޅުންނާ ބައްދަލުކުރައްވާ ކަމަށާއި މިހާތަނަށް ވެސް އެބޭފުޅުންނަށް އެއްބާރުލުން ދީފައިވާނެ ކަމަށެވެ. ކޮމިޝަނާއި ގުޅިގެން ހަޤީޤަތް ނެތް ވާހަކަތައް ދައްކަމުންދާ ކަމަށާއި މި އަމަލު ހަރުކަށި އިބާރާތުން ކުށްވެރިކުރާ ކަމަށް ވެސް މުނާ ވިދާޅުވިއެވެ.
