މަޖިލީސް ހަލަބޮލިކޮށް ޖަލްސާ ހުއްޓުވީ، އެކަމަށް މަޖިލީހުގެ ރިޔާސަތުން ފުރުސަތު ދިނުމުން - އެމްޑީޕީ ޕީޖީ
މަޖިލިސް ކުރިއަށް ގެންދެވޭނެ މަގު މަޖިލީހުގެ އިދާރާއިންނާއި މެމްބަރުން ފަހިކޮށްދިނުމށް ޕީޖީ ގްރޫޕުން ވަނީ އިލްތިމާސްކޮށްފަ
ރައްޔިތުންގެ މަޖިލީހުގެ ޖަލްސާގެ ތެރެއިން
ބުދަ ދުވަހު އިދިކޮޅު މެމްބަރުން މަޖިލީސް ހަލަބޮލިކޮށް ޖަލްސާ ހުއްޓުވީ، އެކަމަށް މަޖިލީހުގެ ރިޔާސަތުން ފުރުސަތު ދިނުމުން ކަމަށް އެމްޑީޕީގެ ޕާލަމެންޓަރީ ގުރޫޕުން ބުނެފިއެވެ.
އެމްޑީޕީ ޕީޖީ ގްރޫޕުން ނެރުނު ބަޔާނެއްގައި ބުނެފައި ވަނީ މަޖިލީހުގެ ގަވާއިދުގެ 205 ވަނަ މާއްދާގެ (ރ)ގައި ވާގޮތުން ރައްޔިތުންގެ މަޖިލީހުގެ އިތުރު އެއްވެސް ކަމަކާއި މެދު ގޮތް ނިންމޭނީ ނުވަތަ ބަހުސް ކުރެވޭނީ މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލަ އަށް ގޮތެއް ނިންމުމަށް ފަހުގައި ކަމަށް ޤަބޫލުކުރާ ކަމަށެވެ. އަދި މަޖިލީހުގެ ގަވާއިދުގެ 106 ވަނަ މާއްދާގެ (ހ) އާއި 149 ވަނަ މާއްދާ އަށް ރިއާޔަތްކުރާ އިރު މަޖިލީހުގެ ދާއިމީ ކޮމިޓީތަކަކީ ދެމިއޮންނަ ކޮމިޓީތައް ކަމަށް އެ ބަޔާނުގައިވެއެވެ.
މަޖިލީހުން އެހެން ގޮތަކަށް ފާސްނުކުރާހާ ހިނދަކު މަޖިލީހުގެ ގަވާއިދު ބުނާގޮތުގެ މަތިން ކޮމިޓީތަކުގެ ތިބި މެމްބަރުން އެ ކޮމިޓީގައި ދެމި ތިބޭނެކަމަށް ގަވާއިދުގައި ބުނާކަން އެ ބަޔާނުގައި ވަނީ ފާހަގަކޮށްފައެވެ. ކަންމިހެން އޮތް ނަމަވެސް، މިއަދު އޮތް 2023 ވަނަ އަހަރުގެ 2 ވަނަ ދައުރުގެ 12 ވަނަ ޖަލްސާ ކުރިއަށް ގެންދިއުމަށް އެމްޑީޕީގެ ޕާލިމެންޓްރީ ގްރޫޕުން ފުރިހަމަ އެއްބާރުލުން ދިނީ މިއަދުގެ ޖަލްސާގެ އެޖެންޑާގައި ކޮމިތީތައް އެކުލަވާލުމުގެ މައްސަލަ އާއި އިތުރު މުހިންމު މަސައްކަތްތައް އެޖެންޑާކޮށްފައި އޮތުމުންނެވެ.
މަޖިލީހުގައި މުހިންމު މަސައްކަތްތަކެއް ތާވަލްކުރެވިފައި ވަނިކޮށް މަޖިލީސް ކުރިއަށް ގެންދިއުން ހުއްޓުވާފއިވާ ކަމީ އެމްޑީޕީގެ ޕީޖީ ގްރޫޕުން ވަަރަށް ބޮޑަށް ކަންބޮޑުވާ ކަމެއް ކަމަށް ވެސް ވަނީ ބުނެފައެވެ. ދާއިމީ ކޮމިޓީތައް އަލުން އެކުލަވާލުމުގެ މަސއްކަތް ކުރުމަކީ މަޖިލީސް ކުރިއަށް ގެންދަން ކުރަން ޖެހޭ މުހިބންމު މަސައްކަތްތަކެއް ކަމަށާއި އެ މަސައްކަތް އެޖެންޑާކުރީ ހުރިހާ ސިޔާސީ ޕާޓީތަކާއި މަޝްވަރާކުރުމަށް ފަހުގައި ކަމަށް އެ ބަޔާނުގައިވެއެވެ. ނަމަވެސް އެ މައްސަލައިގެ ބަހުސް އަށް ފުރުސަތު ނުދީ ބުދަ ދުވަހުގެ ޖަލްސާ ފެށުމާއި އެކު މަޖިލީސް ހަލަބޮލިކުރަން ފުރުސަތު ދިނީ ރިޔާސަތުން ކަމަށް އެ ބަޔާނުގައިވެއެވެ. އަދި ޤަވާއިދާއި އެއްގޮތަށް އަމަލުކުރަން ރިޔާސަތުން ފަސް ޖެހި، ޖަލްސާ ނިންމާލިކަމަށް ބުނެފައިވެއެވެ.
މީގެ އިތުރުން މަޖިލީހުގައި މުހިންމު މަސައްކަތް ހުއްޓާ، މަޖިލީހުގެ ނިޒާމް ނަގާލާ މަޖިލިސް ހުއްޓުވުމަކީ ކަންބޮޑުވާ ކަމެއް ކަމަށް ވަނީ ބުނެފައެވެ. މީގެ އިތުރުން ހުއްޓިފައިވާ މަޖިލީހުގެ މަސައްކަތްތައް ކުރިއަށް ގެންދެވޭނެ މަގު މަޖިލީހުގެ އިދާރާއިންނާއި މެމްބަރުން ފަހިކޮށްދިނުމށް ޕީޖީ ގްރޫޕުން ވަނީ އިލްތިމާސްކޮށްފައެވެ.
