އިންޑިއަން ގްރާންޓް އެސިސްޓެންސް ސްކީމް ޕްރޮޖެކްޓުގެ ދަށުން އެޑިއުކޭޝަން މިނިސްޓްރީގެ ޑިޕާޓްމަންޓް އޮފް އިންކްލޫސިވް އެޑިއުކޭޝަން (ޑީއޯއައިއީ) އިން ޓީޗަރުންގެ ކެޕޭސިޓީ ބިލްޑިންގ ޓްރެއިނިންގ ޕްރޮގްރާމެއް ކުރިއަށް ގެންގޮސްފިއެވެ.

އިންޑިއާގެ ބެންގަލޫރުގައި 10 ދުވަހުގެ މުއްދަތަށް ކުރިއަށް ގެންދިޔަ މި ތަމްރީނު ޕްރޮގްރާމުގައި ހއ.އަތޮޅު ތައުލީމީ މަރުކަޒާއި ލ. އިހައްދޫ ސްކޫލާއި ގދ. ތިނަދޫ އަބޫބަކުރު ސްކޫލްގެ 21 ޓީޗަރުން ވަނީ ބައިވެރިވެފައެވެ. މިއީ އުނގެނުމުގައި ދަތިތައް ހުންނަ ދަރިވަރުންނަށް ކިޔަވާދިނުން ހަރުދަނާކޮށް، އެފަދަ ސްޓްރެޓެޖީތަކަށް މުދައްރިސުން އަހުލުވެރިކުރުވުމަށް ކުރިއަށްގެންދިޔަ ޕްރޮގްރާމެކެވެ.

މި ތަމްރީނުތަކުގައި ޑީއޯއައިއީގެ ޑިރެކްޓަރ ޖެނެރަލް އާއި އެސިސްޓެންޓް ޑިރެކްޓަރުގެ އިތުރުން ސީނިއާ އިންކްލޫސިވް އެނަލިސްޓުން ވެސް ބައިވެރިވެލެއްވިއެވެ.

ޑިއޯއައިއީ އިން ބުނި ގޮތުގައި މި ޕްރޮގްރާމުގައި ބައިވެރިން ވަނީ ތަފާތު އެކި މައުޟޫއުތައް ހިމެނޭ ގޮތަށް ތަފާތު ސެޝަންތަކުގައި ބައިވެރިވެފައެވެ. އެގޮތުން އޯޓިޒަމް ސްޕެކްޓްރަމް ޑިސްއޯޑާ ހުންނަ ދަރިވަރުންނަށް އިންކްލޫސިވް އެޕްރޯޗްތަކެއް ގެނައުމުގެ މަގު ފަހިކޮށްދޭނެ ގޮތްތަކާއި، ދަރިވަރުންނަށް އެހީތެރިކަން ފޯރުކޮށްދޭ އަދި ޝާމިލުކުރަނިވި އުނގެނުމުގެ މާހައުލެއް ފަހިކޮށްދިނުމަށް މުދައްރިސުންގެ ވިސްނުން ބައްޓަންކުރަންވީ ގޮތްތައް މި ޕްރޮގްރާމުގެ ތެރެއިން ވަނީ ކިޔައިދީފައެވެ. އަދި މި ތަމްރީނުތަކުގައި އުނގެނުމުގައި އެހީތެރިކަން ބޭނުންވާ ދަރިވަރުންނަށް ކިޔަވާދޭން އިންކްލޫސިވް ޓީޗިންގ ސްޓްރެޓެޖީތަކާއި، އިންޓަރވެންޝަން ޓެކްނިކްތަކާއި "ޔުނިވަރސަލް ޑިޒައިން ފޮ ލަރނިންގ"ގެ އުސޫލުތަކުގެ މައްޗަށް ބިނާކޮށް އިންކްލޫސިވް ލެސަން ޕްލޭންތައް އެކުލަވާލުމަށްވަނީ ތަމްރީނުކޮށްފައެވެ.

މީގެ އިތުރުން ނުކުޅެދުންތެރިކަން ހުންނަ ދަރިވަރުންގެ ބިހޭވިއަރަލް މޮޑިފިކޭޝަން ސްޓްރެޓެޖީތައް ވެސް މި ތަމްރީނުތަކުގައި ބަލާފައިވާއިރު މުދައްރިސުންނަށް ހައްލު ހޯދުމުގެ ހަރުދަނާ ވަސީލަތްތަކާއި ޓެކްނޮލޮޖީތައް ފޯރުކޮށްދީ، ހުރިހާ ދަރިވަރުންނަށްވެސް އުނގެނުމަށް ފަހި މާހައުލެއް ޤާއިމުކޮށްދޭނެ ގޮތްތަކަށްވަނީ އަލިއަޅުވާލާފައެވެ. އަދި ޖިސްމާނީ ނުކުޅެދުންތެރިކަން ހުންނަ ދަރިވަރުންނަށް އެހީތެރިކަން ފޯރުކޮށްދިނުމާއި އެކްސެސިބިލިޓީ ކުރިއެރުވުމާއި ތައުލީމީ ހަރަކާތްތަކުގައި އަމަލީ ގޮތުން ބައިވެރިވުމަށް ބާރުއެޅުމުގެ ގޮތުން ވެސް މި ޕްރޮގްރާމްގައި ވަނީ ސެޝަންތައް ކުރިއަށްގެންގޮސްފައެވެ.

މި ތަމްރީން ޕްރޮގްރާމުގެ ބައިވެރިން ވަނީ އިންޑިއާގެ ކެމްޕަސްތަކަށް ޒިޔާރަތްކޮށް، ނުކުޅެދުންތެރިކަން ހުންނަ ދަރިވަރުން މެއިންސްޓްރީމް ސެޓިންގައި އޮބްޒާވްކޮށްފައެވެ.

ޑީއޯއައިއީ އިން ބުނީ މި ތަމްރީނު ޕްރޮގްރާމް ކާމިޔާބުކަމާއެކު ނިންމުމަކީ ރާއްޖޭގައި އިންކްލޫސިވް އެޑިއުކޭޝަނަށް ކުރާ ދަތުރުގައި ލިބުނު ވަރަށް ބޮޑު ކުރިއެރުމެއް ކަމަށެވެ. އަދި މި ތަމްރީނުތައް ހަރުދަނާ ގޮތެއްގައި ތަންފީޒުކުރެވި، ހާއްސަ އެހީއަށް ބޭނުންވާ ދަރިވަރުންގެ ދިރިއުޅުމަށް ހެޔޮ އަސަރުކޮށް، ރާއްޖޭގައި މިހާރަށްވުރެ އެއްބައިވަންތަ މުޖުތަމައެއް ބިނާކުރެވިގެންދާނެ ކަމަށް ވެސް އެ ޑިޕާޓްމަންޓުން ބުންޏެވެ.