ރިކްޓަރ މިންގަނޑުން 5.4ގެ ބާރުމިނުގައި އައި ބާރުގަދަ ބިންހެލުމެއް މިއަދު މެންދުރު 1:30 އެހާކަންހާއިރު އުތުރު އިންޑިޔާގެ ބައެއް ހިސާބުތަކަށް އައިސްފައިވެއެވެ. ޖަންމޫ އެންޑް ކަޝްމީރުގެ ޑޯޑާ ޑިސްޓްރިކްޓުން، ބިމުގެ 6 ކިލޯމީޓަރު އަޑިން ފެށިގެން އައި ބިންހެލުމުގެ ގުޑުންތައް ވެރިރަށް ނިއުޑެލްހީގެ އިތުރުން ޗަންޑިގާރު، ޕަންޖާބް އަދި ކައިރި ބައެއް އެހެން ހިސާބުތަކަށް އައިސްފައިވެއެވެ.

ސްރީނަގަރުން ވާހަކަދެއްކި މީހަކު ބުނިގޮތުގައި، ބިންހެލުން އައި ވަގުތު ސްކޫލް ކުދިންނާއި އާންމުންވެސް ވަރަށް ބިރުގަތެވެ. މިދިޔަ ހަފުތާގައިވެސް އެހިސާބަށް ބިންހެލުމެއް އައިސްފައިވާއިރު، މިއަދުގެ ބިންހެލުން އެފަހަރުގެ ބިންހެލުމަށްވުރެ މާ ބާރުގަދަކަމަށް އޭނާ ބުނެފައިވެއެވެ.

މިއަދުގެ ބިންހެލުމުގެ އަސަރު ޕާކިސްތާނުގެ ލާހޯރު ސިޓީއަށްވެސް ކުރިކަމަށް ޚަބަރުތައް ބުނެއެވެ. ނަމަވެސް ބިންހެލުމުގެ ސަބަބުން އެއްވެސް ތަނަކަށް ގެއްލުން ލިބުނުކަމެއް ނޭނގެއެވެ.

ބިންހެލުމުގެ ބައެއް ވީޑިއޯތައް މީހުން ސޯޝަލް މީޑިޔާއަށް ލާފައިވެއެވެ.

މީގެ ދެ ހަފުތާއެއްހާ ދުވަސް ކުރިން އަފްޣާނިސްތާނަށްވެސް ރިކްޓަރ މިންގަނޑުން 5.2ގެ ބާރުމިނުގައި ބިންހެލުމެއް އައިސްފައިވެއެވެ.