މިހާރު ރާއްޖޭގައު ނަފްސާނީ ފުރަތަމަ އެހީ ފޯރުކޮށްދެވެނީ އެންމެ 27 އިންސައްތަ ސްކޫލުން ކަމަށް, އެޑިއުކޭޝަން މިނިސްޓަރު ޑރ. އާއިޝަތު އަލީ ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ދަރިވަރުންނަށް ނަފްސާނީ ފުރަތަމަ އެހީ ފޯރުކޮށްދިނުމުގެ ހެލްޕްލައިން އިފްތިތާހުކުރުމަށް އަންގާރަ ދުވަހު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. އެގޮތުން، މިނިސްޓްރީ އޮފް އެޑިޔުކޭޝަނުން އިސްނަގައިގެން، ޑަބްލިއުއެޗްއޯ އަދި ޔުނިސެފްގެ އެހީގައި ގާއިމްކުރާ މި ހެލްޕްލައިނަކީ ދަރިވަރުންނަށް ނަފްސާނީ ފުރަތަމަ އެހީ ފޯރުކޮށްދިނުމަށްޓަކައި ގާއިމްކުރެވޭ ހެލްޕްލައިނެއްކަން ފާހަގަކުރައްވައި، މިއީ މިފަދަ ފުރަތަމަ ހެލްޕްލައިންކަން ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވިގޮތުގައި، ކޮވިޑް-19ގެ ތެރޭގައި ސްކޫލްތައް ބަންދުވެ ދަރިވަރުން ގޭގައި ތިބެން ޖެހުމާއި، އޮންލައިންކޮށް ކިޔެވުމުގެ ކަންތައް ތަރުތީބުކުރަން ޖެހުމުގެ ސަބަބުން ނަފްސާނީގޮތުން ދަރިވަރުންނަށް އޭގެ އަސަރު ކުރިއެވެ. އެދުވަސްވަރުވެސް މުދައްރިސުން ނަފްސާނީ ފުރަތަމަ އެހީ ދިނުމަށް ތައްޔާރުކޮށް ދަރިވަރުންނަށް ބޭނުންވާ ނަފްސާނީ އެހީ ފޯރުކޮށްދެވޭތޯ ގިނަ މަސައްކަތްތަކެއް ކުރެވުނުނަމަވެސް، އިޖްތިމާއީ ހާލަތްތަކުގައި މުއާމަލާތުކުރުމާއި ގުޅުންތައް ގާއިމްކުރުމުގައި ދަރިވަރުންނަށް ދަތިތަކާ ކުރިމަތިވާކަން އޭނާ ފާހަގަކުރެއްވިއެވެ.
މީގެ އިތުރުން ތަފާސްހިސާބުން ދައްކާގޮތުގައި ބައެއް ދަރިވަރުންނަށް ކުރި ނަފްސާނީ އަސަރު ދާއިމީ ބައްޔަކަށް ބަދަލުވެފައިވާކަން މިނިސްޓަރު ފާހަގަކުރެއްވިއެވެ. މިނިސްޓަރު ވިދާޅުވީ މިކަންކަމުން ރާއްޖޭގެ ހުރިހާ ކަންކޮޅުތަކެއްގައި ދިރިއުޅޭ ދަރިވަރުންނަށް ނަފްސާނީ ފުރަތަމަ އެހީ ފަސޭހަކަމާއެކު ފޯރުކޮށްދިނުމުގެ މުހިއްމުކަން ހާމަވެގެންދާކަމަށެވެ.
މިހާރު އަޅުގަނޑުމެންގެ ސްކޫލްތަކަށް ބަލާއިރު އަޅުގަނޑުމެންނަށް ނަފްސާނީ ފުރަތަމަ އެހީ ފޯރުކޮށްދެވެނީ 27 އިންސައްތަ ސްކޫލުން. އެހެންކަމުން ހުރިހާ ދަރިވަރުންނަށް ދެވޭ ދާއިމީ ހިދުމަތެއްގެ ގޮތުގަ ނަފްސާނީ ފުރަތަމަ އެހީ ފޯރުކޮށްދެވޭނެ ނިޒާމެއް ގާއިމްކޮށް، މިއަދު އަޅުގަނޑުމެން މި ފާހަގަކުރަނީ އެ ނިޒާމް އިފްތިތާހްކުރުމުގެ ރަސްމިއްޔާތު،އެޑިއުކޭޝަން މިނިސްޓަރު، ޑރ. އާއިޝަތު އަލީ
މި ހެލްޕްލައިނުގެ ސަބަބުން، ދަރިވަރުންނަށް ދިމާވާ ކަންބޮޑުވުންތަކާ ގުޅިގެން ދިމާވެދާނެ ނަފްސާނީ ހާސްކަމަކުން އަރައިގަތުމަށް ކައުންސެލަރުން މެދުވެރިކޮށް އެހީ ފޯރުކޮށްދިނުމާއި، ދަރިވަރުންނަށް އަރލީ އިންޓަވެންޝަންދިނުމާއި، ސްކޫލް ކައުންސެލިންގ ހިދުމަތް އިތުރަށް ހަރުދަނާކުރުން ހިމެނޭކަންވެސް މިނިސްޓަރު ފާހަގަކުރެއްވިއެވެ. އަދި ދަރިވަރުންނަށް ބޭނުންވާ ނަފްސާނީ އެހީ، އެކަމަށް ބޭނުންވާ ވަގުތު ދަރިވަރުންނަށް ލިބިގެން ދިއުމަކީ މި ހެލްޕްލައިން ތައާރަފުކުރުމުގެ މަގުސަދެއް ކަމަށްވެސް އޭނާ ވިދާޅުވިއެވެ.
ދަރިވަރުންނަށް ނަފްސާނީ ފުރަތަމަ އެހީ ފޯރުކޮށް ދިނުމަށް ގާއިމްކުރި މި ހެލްޕްލައިން 1484ގެ ހިދުމަތް، ހުކުރު ދުވަސްފިޔަވައި ކޮންމެ ދުވަހަކު މެންދުރުފަހު 3:00ން ރޭގަނޑު 9:00ށް ލިބޭނެއެވެ. މި ހެލްޕްލައިންގެ ހިދުމަތް ފެށުމަށް ހަމަޖެހިފައިވަނީ މި ހިނގާ ޖޫންމަހުގެ 18ވަނަ ދުވަހުން ފެށިގެންނެވެ.
