ވިސާއާ ނުލައި ގެމްބިއާއަށް ދެވޭ ގޮތް ހަދައިފި
13 ޖޫން 2023 | އަންގާރަ 02:15މި އެއްބަސްވުމުގެ ދަށުން ދެ ޤައުމުގެ ރައްޔިތުންނަށް ދުރާލާ ވިސާ ނެގުމަކާއި ނުލައި 30 ދުވަހުގެ މުއްދަތަކަށް ދަތުރުކުރެވޭނެ
ގެމްބިއާ އާއި ރާއްޖެއާ ދެމެދު ވިސާ އެއްބަސްވުމުގައި ސޮއިކުރުން
ވިސާއާ ނުލައި ދިވެހިންނަށް ގެމްބިއާއަށް ދަތުރުކުރެވޭ އެއްބަސްވުމެއްގައި ދެ ޤައުމުގެ ދެމެދުގައި ސޮއިކޮށްފިއެވެ.
އާދީއްތަ ދުވަހު ސައޫދީ އަރަބިއްޔާގައި ހުންނަ ރާއްޖޭގެ އެމްބަސީގައި ބޭއްވި ރަސްމިއްުޔާތެއްގައި މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ރާއްޖެއިން ސައޫދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު، މުޙައްމަދު ޚަލީލްއެވެ. އަދި ގެމްބިޔާ ސަރުކާރުގެ ފަރާތުން ސޮއިކުރެއްވީ ސައުދީގައި ހުންނަވާ އެ ޤައުމުގެ ސަފީރު އޮމަރު ޖިބްރީލް ސަލާހުއެވެ.
ރާއްޖެއާއި ގެމްބިއާއާ ދެމެދު ޤާއިމްކުރި ވީސާއާ ގުޅޭ އެއްބަސްވުމުގެ ދަށުން ދެ ޤައުމުގެ ރައްޔިތުންނަށް ދުރާލާ ވިސާ ނެގުމަކާއި ނުލައި 30 ދުވަހުގެ މުއްދަތަކަށް ދަތުރުކޮށް، ޓްރާންސިޓް ވެވޭނެއެވެ.
އެއްބަސްވުމުގައި ސޮއިކުރެއްވުމަށްފަހު ބޭއްވެވި ބައްދަލުވުމުގައި ސައޫދީގައި ހުންނަވާ ދިވެހި ސަފީރު މުޙައްމަދު ޚަލީލް ވަނީ ރާއްޖެއާއެކު އޮންނަ ގުޅުން ބަދަހިކުރުމަށް ގެމްބިއާގެ ސަރުކާރުން ކުރައްވާ މަސައްކަތް ފާހަގަކުރައްވާފައެވެ. އަދި އަލަށް ޤާއިމްކުރެވުނު ވިސާ އެއްބަސްވުމުގެ ސަބަބުން އިތުރު ދާއިރާތަކުން ދެ ޤައުމުގެ ގުޅުން ބަދަހިވެގެންދާނެކަމަަށް އުއްމީދުކުރައްވާ ކަމަށްވެސް އޭނާ ވިދާޅުވިއެވެ.
ގެމްބިއާގެ ސަފީރު ދެއްކެވި ވާހަކަފުޅުގައި ކުރިއަށް އޮތްތަނުގައިވެސް ދެ ޤައުމުގެ ގުޅުން އިތުރަށް ބަދަހިކުރެއްވުމަށް މަސައްކަތްކުރައްވާނެކަމުގެ ޔަގީންކަން ދެެއްވިއެވެ.
ރާއްޖެ އާއި ގެމްބިއާއާ ދެމެދު ހާރިޖީ ގުޅުން ގާއިމްކުރީ 1989 އަހަރުއެވެ.
ދިވެހި ޕާސްޕޯޓާއެކު ވިސާއާ ނުލައި އެކި ޤައުމުތަކަށް ދަތުރުކުރެވޭ ގޮތް ހެދުމަށް ރާއްޖެއިން ދަނީ ޤައުމުތަކާއެކު މަޝްވަރާތައް ކުރަމުންނެވެ. މިހާރުވެސް 90 އަށްވުރެ ގިނަ ޤައުމަށް ވިސާ ނެތި ދިވެހިންނަށް ދަތުރުކުރެވެއެވެ.
