ޑި ޔޯން ބާސެލޯނާގައި މަޑުކުރަން ނިންމައިފި
13 ޖޫން 2023 | އަންގާރަ 02:09ސީޒަނުގައި ބާސެލޯނާއިން ލީގު ކާމިޔާބުކުރި އިރުވެސް އޭނާ އަކީ ޓީމަށް މުހިންމު ކުޅުންތެރިއެއް
ޑި ޔޯން
ބާސެލޯނާއަށް ކުޅެމުން އަންނަ ފްރޭންކީ ޑި ޔޯން އެ ޓީމުގައި މަޑުކުރަން ނިންމައިފިއެވެ.
ނެދަލެންޑްސް ޓްރެއިނިންގ ކޭމްޕެއްގައި ހުރެ ނެރުނު ބަޔާނެއްގައި ޑި ޔޯން ބުނެފައިވަނީ އޭނާ ބާސެލޯނާގައި ހުރީ ވަރަށް އުފަލުން ކަމަށާއި، ހުރިހާ ކަމެއް ރަނގަޅަށް ގޮސްފިނަމަ އަންނަ ސީޒަނުގައިވެސް ކުޅޭނީ ބާސެލޯނާއަށް ކަމަށެވެ.
ބާސެލޯނާއާ ޒަވީ ހަވާލުވިފަހުން ޑި ޔޯން ދަނީ ދުވަހަކަށްވުރެ ދުވަހެއް ކުޅުން ރަނގަޅު ކުރަމުންނެވެ. މި ސީޒަނުގައި ބުސްކޭޓްސް ޓީމާ ވަކިވެފައިވާއިރު، ކުރިޔަށް އޮތް ސީޒަނުގައި ބާސެލޯނާގެ މެދުތެރެއަށް އެންމެ މުހިންމު ކުޅުންތެރިއަކަށް ވާނީ ޑި ޔޯން އެވެ. މި ސީޒަނުގައި ބާސެލޯނާއިން ލީގު ކާމިޔާބުކުރި އިރުވެސް އޭނާ އަކީ ޓީމަށް މުހިންމު ކުޅުންތެރިއެކެވެ.
މިވަގުތު ޑި ޔޯން ހުރީ ނެދަލެންޑްގެ ގައުމީ ޓީމާއެކުއެވެ. ނޭޝަންސް ލީގުގެ ސެމީގައި މި މަހު 14 ވަނަ ދުވަހު ނެދަލެންޑް ނުކުންނާނީ ކްރޮއޭޝިއާއާ ދެކޮޅަށެވެ.
