އިންޑިއާ ކަނޑުގެ ސަރަޙައްދުގައި އަލަށް ފެތުރެމުން އަންނަ ސަލާމަތީ މައްސަލަތަކަށް ހައްލު ހޯދުމަށް މަޝްވަރާ ކުރެވިފައިވޭ: ރައީސް
12 ޖޫން 2023 | ހޯމަ 09:53ދެ ޤައުމުން ކުރެވުނު މަޝްވަރާތަކާމެދު ހިތްހަމަޖެހިވަޑައިގަންނަވާ
ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު
އިންޑިއާ ކަނޑުގެ ސަރަޙައްދުގައި އަލަށް ފެތުރެމުން އަންނަ ސަލާމަތީ މައްސަލަތަކަށް ހައްލު ހޯދުމަށް މަޝްވަރާ ކުރެވިފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ވިދާޅުވެއްޖެއެވެ.
ދިވެހިރާއްޖެއާއި ރިޕަބްލިކް އޮފް ސޭޝެލްސްއާ ދެމެދު އެއްބަސްވުންތައް ވެފައިވާއިރު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަދި ސީޝެލްސްގެ ރައީސް ވޭވަލް ރާމްކަލާވަން ދެއްވި ޖޮއިންޓް ޕްރެސް ސްޓޭޓްމަންޓްގައި، ވަނީ އިންޑިއާ ކަނޑުގެ ސަލާމަތާއި ރައްކާތެރިކަމަކީ، ދިވެހިރާއްޖެއާއި ސޭޝެލްސްގެ ސަލާމަތާއި ރައްކާތެރިކަމާ ގުޅި ލާމެހިފައިވާ ކަމެއްކަމަށް ފާހަގަ ކުރައްވާފައެވެ.
އޭގެ އިތުރުން، ދެ ޤައުމަށްވެސް ކުރިމަތިވާ ނުރައްކާތަކުން ރައްކާތެރިވުމަށާއި، ކުރިމަތިވާ ގޮންޖެހުންތަކުން އަރައިގަތުމަށްޓަކައި މިހާރަށްވުރެ ބޮޑަށް ދިވެހިރާއްޖެއާއި ސޭޝެލްސްފަދަ ޤައުމުތައް ގުޅިގެން މަސައްކަތް ކުރުމަކީ މުހިންމު ކަމެއްކަމާމެދު އެއްވެސް ޝައްކެއްނެތްކަމަށް ރައީސްގެ ވާހަކަފުޅުގައި ފާހަގަ ކުރެއްވިއެވެ.
ރައީސް ވިދާޅުވީ، އިންޑިއާ ކަނޑުގެ ސަރަޙައްދުގައި އަލަށް ފެތުރެމުން އަންނަ ސަލާމަތީ މައްސަލަތައް ކަމަށްވާ ކަނޑުފޭރުމާއި، މަސްތުވާތަކެތީގެ ވަގުފާރިއާއި، ނިރުބަވެރިކަމާއި، ޤާނޫނާ ޚިލާފަށް، ގަވާއިދުތަކުގެ ބޭރުން ޑޮކިއުމަންޓް ނުކުރެވޭ ގޮތަށް، މި ސަރަޙައްދުގައި ކުރެވޭ މަސްވެރިކަންފަދަ ސަލާމަތީ މައްސަލަތަކަށް ޙައްލު ހޯދުމަށް ދެ ޤައުމުން ގުޅިގެން މަސައްކަތް ކުރާނެ ކަމަށް މަޝްވަރާކޮށްފައިވާ ކަމަށެވެ.
ރައީސް ވިދާޅުވީ، ދެ ޤައުމުގެ ދެމެދުގައި ސޮއިކުރި "ޕްރޮޓޮކޯލް އޮން ކޯޕަރޭޝަން ޓު ކޮމްބެޓް ޓްރާންސްނޭޝަނަލް އޯގަނައިޒްޑް ކްރައިމް އެންޑް އަދަރ މެރިޓައިމް ސެކިއުރިޓީ އެންޑް ސޭފްޓީ ތްރެޓްސް" އަކީ، ސަރަޙައްދީ ސަލާމަތާއި ރައްކާތެރިކަން ކަށަވަރު ކުރުމުގައި އެއްބާރުލުން އިތުރުކުރުމާ ގުޅޭގޮތުން މަސައްކަތް ކުރުމަށް އެޅުނު މުހިންމު ފިޔަވަޅެއް ކަމަށެވެ.
އޭގެ އިތުރުން، ދެ ޤައުމުން ކުރެވުނު މަޝްވަރާތަކާމެދު ހިތްހަމަޖެހިވަޑައިގަންނަވާކަން ފާހަގަ ކުރައްވައި ރައީސް ވިދާޅުވީ، ކުރިއަށް އޮތް ތާނގައި ދެ ޤައުމުގެ އޮފިޝަލުން މަޝްވަރާތައް ކުރިއަށް ގެންގޮސް، ރާއްޖެއާއި ސޭޝެލްސްއާ ދެމެދު މިހާރަށްވުރެ ބޮޑަށް ގުޅުން ބަދަހިވެ، ބައިނަލްއަޤްވާމީ މައިދާނުގައިވެސް ގުޅިގެން ކުރާ މަސައްކަތްތައް އިތުރުކުރެވޭނެކަމާމެދު އެމަނިކުފާނަށް ޔަޤީންކަން އެބައޮތް ކަމަށެވެ.
