އިރާނުން ނިއުކްލިއަރ ހަތިޔާރު އުފައްދަން ބޭނުން ނަމަ ހުޅަނގަށް އެކަން ނުހުއްޓުވޭނެ ކަމަށް އިރާންގެ ސުޕްރީމް ލީޑަރު، އާޔަތުﷲ އަލީ ޚާމަނާއީ ވިދާޅުވެއްޖެއެވެ.
ޚާމަނާއީ މިހެން ވިދާޅުވެފައި ވަނީ އާދިއްތަ ދުވަހުއެވެ.
އެގައުމުގެ ދައުލަތުގެ މީޑިއާއިން ރިޕޯޓުކޮށްފައިވާގޮތުން ޚާމަނާއީ ވަނީ އިރާންގެ ނިއުކްލިއަރ ހަތިޔާރާ ގުޅިގެން ހުޅަނގުން ދައްކަމުން ދަނީ ދޮގު ވާހަކަތަކެއް ކަމަށް ވިދާޅުވެފައެވެ. އަދި އެގައުމުން، އެގައުމުގެ ދީނީ ސިޔާސަތުގެ ދަށުން ނިއުކްލިއަރ ހަތިޔާރު ބޭނުން ނުވާކަމަށްވެސް ޚާމަނާއީ ވަނީ ވިދާޅުވެފައެވެ.
އެއަށްފަހު ޚާމަނާއީ ވަނީ އެގައުމުން އެގޮތަށް ނިއުކްލިއަރ ހަތިޔާރު އުފައްދާނަމަ، އެކަން ނުހުއްޓުވޭނެ ކަމަށްވެސް ވިދާޅުވެފައެވެ.
މިފަދައިން ޚާމަނާއީ ވިދާޅުވެފައި މިވަނީ އިރާނުން ނިއުކްލިއަރ ހަތިޔާރު އުފެއްދުމުގައި ހޯދަމުންދާ ކުރިއެރުންތަކާ ގުޅިގެން ހުޅަނގުގެ ކަންބޮޑުވުންތައް އިތުރުވެފައިވާ ދަނޑިވަޅެއްގައެވެ.
