ކޯޓަކުން މެމްބަރުންގެ ގޮނޑި ގެއްލުވައި ނުލެވޭނެ: މެމްބަރުން ނަޝީދު

ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލުވާލަން ކޯޓަކުން ގޮތެއް ކަނޑަނޭޅޭނެ ކަމަށް މަޝްހޫރު ގާނޫނީ ވަކީލް އަދި ރައްޔިތުންގެ މަޖިލީހުގެ ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު ވިދާޅުވެއްޖެއެވެ.

ސިޔާސީ މަޝްރަހުގައި ހިނގާ ކަންކަމަށް ބަސްފުޅެއް ވިދާޅުނުވެ ހިމޭނުން ހުންނަވާތާ ގިނަ ދުވަސްތަކެއް ވުމަށްފަހު، ނަޝީދު އޭނާގެ އަމިއްލަ ބްލޮގްގައި ވިދާޅުވެފައި ވަނީ ދައުރެއްގެ މެދުތެރެއިން، ވޯޓެއްގެ ނޯޓިސް ހިނގަހިނގާ އޮއްވައި، ކޯޓަކުން ނެރެން އެދޭ ޙުކުމަކުން، ރައްޔިތުންގެ ސީދާ ވޯޓަކުން ހޮވައި މަޖިލިހަށް ފޮނުވާފައިވާ މެންބަރުންތަކެއްގެ ގޮނޑި ގެއްލޭ އާ ސަބަބެއް ނުވަތަ ޙާލަތެއް އުފަންކުރުވިދާނެ ކަމަކަށް ހަމައެއްގޮތަކަށްވެސް ފެނިވަޑައިނުގަންނަވާ ކަމަށެވެ.

"އެކަން ކުރެވިދާނެ ހަމައެކަނި ގޮތަކީ ޤާނޫނުއަސާސީގައި އެކަން ކުރެވޭނެގޮތް ބަޔާންކުރުމެވެ. އަދި އެ މާއްދާތައް ދެން އަންނަ އިންތިޚާބަކުން ހިނގާގޮތަށް ހެދުމެވެ. އަދި ދައުރުގެ ތެރޭގައި ގޮނޑި ބަދަލުކޮށްފިނަމަ، އޭނާގެ އިންތިޚާބީ ހައިސިއްޔަތު ދައުރުގެ ބާކީއޮތް މުއްދަތަށް ދަމަހައްޓަން ފެނޭތޯ އޭނާގެ ދާއިރާގެ ރައްޔިތުންގެ ފެންނަ ނުފެންނަ ވޯޓެއް ނެގުމެވެ. ރިކޯލް ވޯޓެއްގެ ފުރުޞަތު ރައްޔިތުންނަށް ދިނުމެވެ. އެނޫން ގޮތަކަށް މިކަން ކުރެވޭނެ ކަމަކަށް ނުފެނެއެވެ. މެޗު ކުޅެމުންދަނިކޮށް ޤަވާއިދު ބަދަލުކުރުމަކީ ކުރެވިދާނެ ކަމަކަށް އަމުދުން ނުދެކެމެވެ." ދައުރު ހަމަވުމުގެ ކުރިން މެމްބަރުކަން ގެއްލޭނެ ގޮތެއް އަލަށް އުސޫލުތައް އުފަން ނުކުރެވޭނެކަން ފާހަގަ ކުރައްވައި ނަޝީދު ވިދާޅުވެފައިވެއެވެ.

އޭނާ މިހެން ވިދާޅުވީ ރައްޔިތުންގެ މަޖިލީހަށް ސިޔާސީ ޕާޓީއަކުން އިންތިޚާބް ވުމަށްފަހު އެ ޕާޓީން ވަކިވުމާއި، ޕާޓީ ބަދަލަކުރުމާއި އަދި ޕާޓީން ވަކިކުރާ ހާލަތްތަކުގައި ރައްޔިތުންގެ މަޖިލީހުގެ މެންބަރުކަން ގެއްލޭނެ ކަމަށް ކަނޑައަޅައި ދިނުމަށް އެދި ބަންޑާރަނައިބު ސުޕްރީމް ކޯޓަށް މައްސަލައެއް ހުށަހަޅާފައި ވަނިކޮށެވެ.

ރާއްޖޭގައި އޮންނަނީ ރިޔާސީ ނިޒާމެއްކަމަށް ސުޕްރީމް ކޯޓުގެ ހުކުމެއްގައިވެސް ބަޔާންކޮށްފައިވާއިރު، ނަޝީދު ވިދާޅުވީ ރާއްޖޭގެ ޤާނޫނުއަސާސީގައި ސިޔާސީ ޕާޓީގެ ދައުރު މާބޮޑަށް ނެތް ކަމަށެވެ. އެކަން ހަމައެކަނި އޮންނަނީ، ނަޝީދު ވިދާޅުވި ގޮތުގައި އަސާސީ ޙައްޤެއްގެ ގޮތުގައި، ޤާނޫނުއަސާސީގެ 30 ވަނަ މާއްދާގައެވެ.

އަސާސީ ޙައްޤެއްގެ ގޮތުގައި ޤާނޫނުއަސާސީގެ 26 ވަނަ މާއްދާގައި ބުނަނީ، ރައްޔިތުން މިނިވަންކަމާއެކު އިޚްތިޔާރުކުރާ މެންބަރުން މެދުވެރިކޮށް ރައްޔިތުންގެ ކަންކަން ހިންގަން ބައިވެރިވެވޭނެ ކަމަށާއި، ކޮންމެ މީހަކަށްވެސް އިންތިޚާބުތަކަށް ކުރިމަތިލުމުގެ ޙައްޤު ލިބިގެންވާކަމަށެވެ. އަދި އެއަށް އިތުރު ބާރެއް ދީ، ޤާނޫނުއަސާސީގެ 75 ވަނަ މާއްދާގައިވެސް ބުނަނީ، ޤައުމީ މަސްލަޙަތާއި ރައްޔިތުންގެ ލާބައާއި މަންފާއަށް އިސްކަންދީގެން މަސައްކަތްކުރަންޖެހޭނެ ކަމަށެވެ. އަދި، މެންބަރުންގެ އިންތިޚާބީ ދާއިރާތައް ތަމްސީލުކުރުމުގައި، މުޅި ޤައުމާއި ހުރިހާ ރައްޔިތުންގެ ލާބައާއި މަންފާއަށް ރިޢާޔަތްކުރަންވާނެކަމަށްވެސް އެ މާއްދާގައި ބުނެއެވެ.

"މިއީ ޕާޓީގެ ފިކުރާއި ޕާޓީ ލައިން ހިފަހައްޓަން ލާޒިމުވާ ނަމަ، ކުރެވޭނެކަމެއް ނޫނެވެ." ނަޝީދު ލިޔުއްވާފައިވެއެވެ.

މަޖިލިހުގެ މެންބަރެއްގެ ގޮނޑި ގެއްލޭނެ ޙާލަތްތައް ޤާނޫނުއަސާސީގެ 73 ވަނަ މާއްދާގެ (ނ) ގައި 4 ޙާލަތެއް ކަނޑައެޅިގެން ބަޔާންކޮށްފައިވަނިކޮށް، އޭގެތެރެއަށް އެހެން ޙާލަތެއް، ޤާނޫނުއަސާސީގެ އެ މާއްދާއަށް ބަދަލެއްނުގެނެސް، އިތުރުކުރެވިދާނެ ގޮތެއް ވިސްނުވަޑައިނުގަންނަވާ ކަމަށްވެސް ނަޝީދު ވިދާޅުވިއެވެ.

މިފަދަ ގޮތަކަށް ހުކުމެއް ނެރުމަށް އެޓާނީ ޖެނެރަލް އެދިވަޑައިގަތީ، މަޖިލީހުގެ މެޖޯރިޓީ ޕީޕީއެމް-އެންޑީއޭގެ ކޯލިޝަނަށް ގެއްލިގެންދިއުމުންނެވެ.