ކެލާ ފުޓުބޯޅަ ދަނޑުގެ ސިޑިބަރި ތަރައްޤީކުރުމުގެ މަސައްކަތް ނިންމަން ހަވާލުކޮށްފި

ކެލާ ފުޓްބޯޅަ ދަނޑުގެ ސިޑިބަރި ތަރައްޤީކުރުމުގެ މަސައްކަތް ނިންމަން މިނިސްޓްރީ އޮފް ޔޫތު ސްޕޯޓްސް އެންޑް ކޮމިޔުނިޓީ އެމްޕަވަމަންޓުން ކޮންޓްރެކްޓަރުންނާ ހަވާލުކޮށްފިއެވެ.

އާދިއްތަ ދުވަހު ޔޫތު މިނިސްޓްރީ އިން މި މަސައްކަތް ރަސްމީކޮށް ހަވާލުކޮށްފައިވަނީ މެކްސްޓަރ މޯލްޑިވްސް އާއެވެ. 75 ދުވަސް ތެރޭގައި ނިންމަން ޖެހޭ މި މަސައްކަތުގެ އަގަކީ 3،640،962.59 (ތިންމިލިއަން ހަލައްކަ ސާޅީސްހާސް ނުވަސަތޭކަ ފަސްދޮޅަސް ދެރުފިޔާ ފަންސާސް ނުވަލާރި) އެވެ.

މި އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރ އަޙްމަދު ފުޢާދެވެ. އަދި މެކްސްޓަރ މޯލްޑިވްސްގެ ފަރާތުން ސޮއިކުރެއްވީ އެ ކުންފުނީގެ އޮޕަރޭޝަންސް މެނޭޖަރ ޢަބްދުﷲ އިބްރާހިމްއެވެ.

ކެލާ ފުޓުބޯޅަ ދަނޑުގެ މަސައްކަތަކީ ކޮވިޑުގެ ކުރިން ހަވާލުކުރި މަސައްކަތެކެވެ. ނަމަވެސް ކޮވިޑާއެކު ދިމާވި ދަތިތަކުގެ ސަބަބުން މަސައްކަތް ނިންމާލެވިފައެއް ނުވެއެވެ. ކުރިން މަސައްކަތް ހަވާލުކުރި ކޮންޓްރެކްޓަރުންގެ އެއްބަސްވުން މިހާރުވަނީ އުވާލާފައެވެ.