ކޮލޮމްބިޔާގެ ޖަންގަލި ތެރެއަށް ވެއްޓުނު ކުޑަ މަތިންދާ ބޯޓަކުން ދަތުރު ކުރި ހަތަރު ކުޑަކުދިން، ބޯޓުވެއްޓުނުތާ 40 ދުވަސް ފަހުން ދިރި ތިއްބާ ފެނިއްޖެއެވެ.
އުމުރުން ތޭރަ އަހަރާއި ނުވަ އަހަރު، ހަތަރުއަހަރާ އަދި އެއް އަހަރުގެ ހަތަރު ކުދިންނަކީ އެއް އާއިލާއަށް ނިސްބަތްވާ ހަތަރު ކުދިންނެވެ. މެއި އެއް ވަނަ ދުވަހު ހިނގި މި ބޯޓު ވެއްޓުމުގެ ހާދިސާގައި ކުދިންގެ މަންމަ އާއި ދެ ޕައިލެޓުން ވަނީ މަރުވެފައެވެ. ބޯޓު ވެއްޓުނު ތަނުން ކުދިން ފެނިފައިނުވުމުން ސިފައިންނާއި އެހެންވެސް އެހީ ފޯރުކޮށްދޭ ޓީމުތަކުން ވަނީ ސަރޗް އޮޕަރޭޝަނެއް ކުރިއަށް ގެންގޮސްފައެވެ.
ކޮލޮމްބިޔާގެ ބޯ ޖަންގަލިތެރޭން ހަތަރު ކުދިން އެކުގައި ތިއްބާ ފެނުންވީ އެންމެނަށް ވެސް ވަރަށް ސިހުން ލިބުނު ކަމަކަށެވެ. ކޮލޮމްބިޔާގެ ރައީސް ގުސްތާވޯ ޕެޑްރޯ ވިދާޅުވީ އެ ކުދިން ތަހައްމަލް ކުރީ ސަރވައިވަލް، ނުވަތަ ދިރިތިބުމަށްޓަކައި އަމިއްލައަށް ކުރެވޭނެ ކަންތައްތަކުގެ ނަމޫނާ ތަޖުރިބާއެއް ކަމަށާއި ތާރީޚްގައި ވެސް މިކަން ލިޔެވިގެން ދާނެ ކަމަށެވެ. ރައީސް ޕެޓްރޯ ވަނީ ކުދިން ފެނުމަށް ފަހު ސިފައިން އެ ކުދިންނަށް ކާންދީ، ފެންދީ ހަދާތަން ފެންނަ ވީޑިއޯއެއް ހިއްސާކުރައްވާފައެވެ. އެންމެ ކުޑަކުއްޖާއަށް ފުޅިއަކުން ދޭއިރު، ދެން ހުރި ކުއްޖާއަށް ޖޯޑަކަށް އަޅައި ސަމުސަލަކުން ކޮންމެ ވެސް ބުއިމެއް ދެމުން ދާތަން ފެނެއެވެ.
އަދި ފަހުން ކޮލޮމްބިޔާގެ ޑިފެންސް މިނިސްޓްރީން ވަނީ ޖަންގަލީގެ ދިގު، ބިޔަ ގަސްތަކުތެގެރޭން ކުދިން ނަގައި ހެލިކޮޕްޓަރަށް އަރުވާ މަންޒަރު ފެންނަ ވީޑިއޯތައް އާންމުކޮށްފައެވެ. ހެލިކޮޕްޓަރުގައި ކުދިން ފުރަތަމަ ގެންދެވުނީ ވެރިރަށް ބޮގޮޓާއަށެވެ. އެއަށްފަހު ހޮސްޕިޓަލަށް ގެންގޮސް ސިއްހީ ފަރުވާދީ ޓެސްޓުތައް ހަދާފައި ވެއެވެ.
ކުދިން ފެނުމާގުޅިގެން ކުދިންގެ މާމަ ފާތިމާ ވެލެންސިޔާ ބުނެފައިވަނީ އޭނަ ވަރަށް އުފާވާކަމަށާއި މިކަމަށްޓަކައި ހެއްދެވި ފަރާތަށް ޝުކުރުވެރިވާކަމުގައެވެ. މާމަ ބުނީ ހަތަރު ބެއިންގެ ތެރެއިން އެންމެ ދޮށީ ކުއްޖާ ހުރީ ކުދިންގެ މަންމަ އޮފީހަށް ދިއުމުން އެހެން ކުދިންނަށް އަޅާލައި ކުދިން ގޮވައިގެން އުޅުމަށް އާދަވެފަ ކަމަށާއި ކުދިން ސަލާމަތްވީ މިކަމުގެ ސަބަބުން ކަމުގައެވެ.
ބޯޓު ވެއްޓުމުން އެތަން ދޫކޮށް ކުދިން ދުރަށް ގޮސްފައިވަނީ އެހީއެއް ވާނެ ފަރާތެއް ފެނޭތޯ ބެލެވޭކަމަށް ރިޕޯޓްތައް ބުނެއެވެ. ކުދިން ހޯދުމަށް ކުރި މަސައްކަތުން ސިފައިނަށްވަނީ ޖަންގަލި ތެރެއިން ކުދިންގެ ބައެއް ތަކެތި ފެނިފައެވެ. އަދި ކުދިންގެ ފިޔަވަޅުތަކެއް ވެސް ފެނިފައިވުމުން ކުދިން ދިރި އެބަތިބިކަން އެނގުނު ކަމަށް ވެއެވެ. މުއުޖިޒާތެއްފަދަ ގޮތަކަށް ކުޑަ ހަތަރު ކުދިން ސަލާމަތްވެފައި މިވަނީ މިނިކާ ޖަނަވާރެއް ކަމަށްވާ ޖަގުއާ އާއި ހަރުފަ އަދި އެނޫން ވެސް ނުރައްކާތެރި ޖަނަވާރުތައް ގިނަ ޖަންގައްޔަކުންނެވެ.
ކުދިން ނިސްބަތްވަނީ އިންޑިޖީނަސް ނޫނީ ޖަންގަލީގެ އާދަތަކަށް ފަރިތަ، އެފަދަ މާހައުލުތަކުގައި އުޅޭ ދަރިކޮޅަކުން އައިސްފައިވާ އާއިލާއަކަށެވެ. އެހެންކަމުން ކުދިން ސަލާމަތް ވެފައިވަނީ ޖަންގައްޔަކުން ކެވޭ އަދި ނުކެވޭނެ މޭވާއާއި އެހެން ވެސް ބާވަތްތަކުގެ މައުލޫމާތު އެނގިހުރުމުގެ ސަބަބުން ކަމަށް ވެއެވެ.
ކުދިންގެ ބެލެނިވެރިކަން ހޯދުމަށް ކުދިންގެ އެއް ފަރާތުގެ ކާފަ ވެސް މިހާރު ދަނީ މަސައްކަތް ކުރަމުންނެވެ. އަދި އޭނާ ވަނީ ކުދިން އޭނާ އަށް ދޫކުރުމަށް އެ ޤައުމުގެ ސަރުކާރުގައި އެދިފައެވެ.
