ސ. މަރަދޫގެ ބިން ހިއްކާ ސަރަހައްދުން ވެލި ނަގާ ފަރާތްތަކާމެދު ފިޔަވަޅު އަޅަން ނިންމައިފިއެވެ.

މަރަދޫ ބިން ހިއްކަމުންދާ ސަރަހައްދުން ވެލި ނަގާ މައްސަލަ ވަނީ ބޮޑުވެފައެވެ.

މިކަމާއި ގުޅިގެން މަރަދޫ އަވަށު އޮފީހުން ބުނީ ހިއްކާ ސަރަހައްދަށް އަޅާފައިވާ ވެލިގަނޑުން އެކި ފަރާތްތަކުން ވެލި ނަގަމުންދާކަމުގެ ޝަކުވާ ލިބެމުންދާކަމަށެވެ.

އެއީ މަނާކަމެއްކަން ފާހަގަކޮށް މަރަދޫ އަވަށު އޮފީހުން ބުނީ އެކަން އެގޮތަށް ކުރާ ފަރާތްތަކާމެދު ފިޔަވަޅު އަޅާނެ ކަމަށެވެ.

އައްޑޫ ބިން ހިއްކުމުގެ މަޝްރޫއުގެ ދަށުން 194.3 ހެކްޓަރުގެ ބިން ހިއްކާއިރު މަރަދޫފޭދޫން 76 ހެކްޓަރުގެ ބިން ހިއްކައެވެ. ފަތުރުވެރިކަމަށް ޚާއްސަކުރެވިގެން އައްޑޫ ސިޓީ ފަޅުތެރެއިން 8.3 ހެކްޓަރުގެ 3 ރަށާއި، 4 ލޭން ޑިޓުއަރ ލިންކު ރޯޑުގެބްރިޖުގެ އެމްބޭންޓްމަންޓަށް 3.3 ހެކްޓަރު ބިން ހިއްކުމަށް ވަނީ ހަމަޖެހިފައެވެ.