ލެސްޓާގެ މިޑްފީލްޑަރު ޔޫރީ ޓިލެމަންސް އާއެކު އެސްޓަން ވިލާއިން އެއްބަސްވުމުގައި ސޮއިކޮށްފިއެވެ.

އުމުރުން 26 އަހަރުގެ ބެލްޖިއަމް ގައުމީ ޓީމުގެ ކުޅުންތެރިޔާ އެސްޓަން ވިލާއާ ގުޅޭނީ ލެސްޓާގެ ކޮންޓްރެކްޓް ހަމަވުމުން، ޖުލައި މަހުގެ އެއްވަނަ ދުވަހުއެވެ.

ޕްރިމިއާ ލީގުން ލެސްޓާ ރެލިގޭޓްވުމާ ގުޅިގެން އާސެނަލް، މެންޗެސްޓާ ޔުނައިޓެޑް އަދި ރޯމާ އިން ޓިލެމަންސް އަށް ޝައުގުވެރިވާ ކަމަށް އަޑު ފެތުރިފައިވެއެވެ. މި ހޫނު މޫސުމުގައި ވިލާއަށް ގެނައި ފުރަތަމަ ކުޅުންތެރިޔާ 2019 ވަނަ އަހަރު ލެސްޓާއާ ގުޅުނުއިރު، އޭނާ ވަނީ 2021 ވަނަ އަހަރު ލެސްޓާއަށް އެފްއޭ ކަޕް ކާމިޔާބުކޮށްދީފައެވެ. ފައިނަލް މެޗުގައި ޗެލްސީ އަތުން 1-0 އިން ލެސްޓާ މޮޅުވި މެޗުގެ ހަމައެކަނި ލަނޑު ޖަހައިދީފައިވަނީ ޓިލެމަންސްއެވެ. ހުރިހާ މުބާރާތެއް ހިމެނޭހެން ކުޅުނު 195 މެޗުގައި އޭނާ ވަނީ ލެސްޓާއަށް 28 ލަނޑު ޖަހައިދީފައެވެ.

ޓިލެމަންސް ފުރަތަމަ ލޯނެއްގެ ދަށުން މޮނާކޯއިން ލެސްޓާއާ ގުޅުނީ 2019 ވަނަ އަހަރުގެ ޖެނުއަރީ މަހުގައެވެ. އޭގެފަހުން އޭނާ ވަނީ އޭރުގެ ކްލަބުގެ ރެކޯޑް 40 މިލިއަން ޕައުންޑްގެ އެއްބަސްވުމެއްގައި އެ އަހަރުގެ ޖުލައިގައި ސޮއިކޮށްފައެވެ.

އޭނާ ވަނީ 2018 އަދި 2022 ގެ ވޯލްޑް ކަޕުގެ އިތުރުން 2020 ވަނަ އަހަރުގެ ޔޫރޯގައިވެސް ކުޅެފައެވެ.

އެސްޓަން ވިލާ ސީޒަން ނިންމާލީ ތާވަލުގެ ހަތް ވަނަ ހޯދައި، ކޮންފަރެންސް ލީގުގެ ޖާގައެއް ކަށަވަރުކުރުމަށްފަހުއެވެ. މެއި މަހު ޓިލެމަންސް ވަނީ އިންސްޓަގްރާމްގައި ލެސްޓާގެ ސަޕޯޓަރުންނަށް ވަދާއީ ވީޑިއޯ މެސެޖަކުން ޝުކުރު އަދާކޮށްފައެވެ.