ޖުމްހޫރީ ޕާޓީގެ ރިޔާސީ ޓިކެޓް އެޕާޓީގެ ލީޑަރ ގާސިމް އިބްރާހީމަށް އެރުވުމާއެކު އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ގާސިމަށް މަރުހަބާ ވިދާޅުވެއްޖެއެވެ.
ގާސިމަށް މަރުހަބާ ވިދާޅުވެ ނަޝީދު ކުރެއްވި ޓްވީޓެއްގައި ވިދާޅުވީ މިނިވަން އިންސާފުވެރި އިންތިޚާބަކަށް މަގުފަހިކުރުމަކީ އެންމެންގެވެސް ވާޖިބެއްކަމަށެވެ.
ނަޝީދު މިމޭރުމުން ގާސިމަށް މަރުހަބާ ވިދާޅުވެ ޓްވީޓް ކުރައްވާފައިވާއިރު ދަ ޑިމޮކްރަޓްސް އުފެއްދުމުގެ ކުރިން އެމްޑީޕީގެ ތެރޭގައި ހަރަކާތްތެރިވި "ފިކުރެއްގެ ދިރުން" ހަރަކާތުން ވަނީ ޖުމްހޫރީ ޕާޓީއާއެކު ރިޔާސީ އިންތިޚާބުގައި އެކުގައި މަސައްކަތްކުރުމާއި ގުޅޭގޮތުން މަޝްވަރާތައް ކުރިޔަށްގެންގޮސްފައެވެ. އެހެންނަމަވެސް އެވާހަކަތަކުން ނަތީޖާއެއް ނެރެވިފައެއްނުވެއެވެ.
އޭގެފަހުން ވީޓީވީއަށް ދެއްވި އިންޓަރވިއުއެއްގައި ގާސިމް ވަނީ ނަޝީދަށް ވަރަށް ބޮޑަށް ފާޑުވިދާޅުވެ ވާހަކަދައްކަވާފައެވެ. އެގޮތުން ގާސިމް ވިދާޅުވީ އެމްޑީޕީގެ ޕްރައިމަރީން ނަޝީދަށް ލިބިވަޑައިގެންނެވި ނާކާމިޔާބީ އާއެކު، ގާސިމަށް ވެރިކަން ހޯއްދަވައިދެއްވުމަށް މަސައްކަތް ކުރައްވާނެ ކަމަށް ވިދާޅުވެ، ވާހަކަފުޅު ދެއްކެވި ކަމަށެވެ. އަދި އެހީތެރިކަން ފޯރުކޮށްދޭނެ ކަމުގެ ޔަގީންކަން ވެސް ދެއްވި ކަމަށް ގާސިމް ވިދާޅުވިއެވެ. ނަމަވެސް ނަޝީދަކީ ކޮން ބޭފުޅެއްކަން ސިޔާސީ ދާއިރާގައި މަސައްކަތް ކުރާ ކޮންމެ މީހަކަށް ވެސް އެނގޭނެ ކަމަށާއި، އެބޭފުޅާ ނޫން މީހަކު ރާއްޖޭގެ ވެރިކަމުގައި ހުންނަން ނަޝީދު ބޭނުންފުޅުނުވާނެ ކަމަށް ގާސިމް ވިދާޅުވިއެވެ. އަދި އެހެން މީހަކަށް އެފުރުސަތު ދީގެން އެމަނިކުފާނަށް ކެތް ނުވާނެ ކަމަށް ގާސިމް ވިދާޅުވެފައިވެއެވެ.
ގާސިމް ވިދާޅުވީ މިއަހަރުގެ ރިޔާސީ އިންތިޚާބުގައި ވާދަކުރެއްވުމަށް ނިންމެވީ ޕާޓީގެ މެމްބަރުންގެ އެދުމުގެ މަތިން ކަމަށާއި، އެގޮތަށް ޕާޓީގެ ކޮންގްރެސް އަދި ކައުންސިލުން ނިންމެވުމުން ކަމަށެވެ. ނަމަވެސް ނަޝީދުގެ ފަރާތްޕުޅުން ހުށަހެޅުއްވި އެއްބަސްވުމުގައިވާ ގޮތުން އެމަނިކުފާނަކީ ނަޝީދު ވެރިކަމަށް ގެނައުމަށް މަގުކޮށައިދޭނެ ބޭފުޅަކަށް ވާންޖެހޭ ކަމަށް ގާސިމް ވިދާޅުވިއެވެ. އަދި ވިދާޅުވީ އެއާ އެއްގޮތަށް އަމަލުކުރާނަމަ ގާސިމް ވާނީ ނަޝީދުގެ ސްޓެޕިންގ ސްޓޯންއަކަށް ކަމަށެވެ.
ގާސިމް ވިދާޅުވީ ނަޝީދާއެކު މަސައްކަތް ނުކުރާނެ ކަމަށާއި، މީހަކު ދައްކާހާ ވާހަކައަކަށް ޖަހާހާ ބެރަކަށް ގުބޯލެއްހެން ނުނަށާނެ ކަމަށެވެ. އަދި ވިދާޅުވީ ބަސްނުވިކޭ އޮޑިއެއްގެ ދިރުބާކޮޅަށް ނާރާނެ ކަމަށެވެ.
ސެޕްޓެމްބަރ މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ކޯލިޝަން ހެދުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ޖޭޕީއަށް ދައުވަތު ދެއްވާފައިވަނިކޮށް ޖޭޕީގެ ކޮންގްރެސް އާއި ކައުންސިލުން ވަނީ އެޕާޓީގެ ކެންޑިޑޭޓެއް މިއަހަރު އޮންނަ ރިޔާސީ އިންތިޚާބުގައި ވާދަކުރުމަށް ފާސްކޮށްފައެވެ. އަދި އެ ދައުވަތަށް ޖަވާބު ދެއްވަމުން ގާސިމް ރައީސަށް ފޮނުއްވި ސިޓީގައި ވަނީ ޖޭޕީގެ ކައުންސިލުގެ ނިންމުން ތަންފީޒުކުރުމުގައި ސާބިތުވެ ހުންނެވި ކަމަށެވެ.
އޭގެފަހުން ގާސިމަށް ރިޔާސީ ޓިކެޓް އެރުވުމަށް ހުކުރު ދުވަހުގެ ރޭ ޖަލްސާ ބާއްވާފައިވާއިރު އެޖަލްސާއަށް ހާޒިރުވި ސަޕޯޓަރުން މަދުވުމުގެ ސަބަބުން 8:30ގައި ފެށުމަށް ހަމަޖެހިފައިވާ ޖަލްސާ ފަށާފައިވަނީ 10 ޖަހަން ކައިރިވެފައިވަނިކޮށް، ޖަހާފައިވާ ބައެއް ގޮނޑިތައް ނެގުމަށްފަހުއެވެ.
