ހަލާންޑް ހިފަހައްޓާނެ ޕްލޭނެއް އެބައޮތް: އިންޒާގީ
އޭނާ ބުނަނީ އިސްތަންބޫލުގައި ލިވަޕޫލް 2005ގެ ހޯދި ކާމިޔާބީ މިސާލަކަށް ބަލަންޖެހޭ ކަމަށް
ހާލަންޑް: ސިޓީގެ އެންމެ މުހިންމު ފޯވާޑަކީ އޭނާ
ޗެމްޕިއަންސް ލީގު ފައިނަލްގައި މިރޭ މެންޗެސްޓަރ ސިޓީގެ އެންމެ މުހިންމު ފޯވަޑް އާލިން ހާލަންޑް ހިފަހައްޓާގޮތުގެ ޕްލޭނެއް އެބައޮތްކަމަށް އިންޓަމިލާނުން ބުނެފިއެވެ.
އެ ޓީމުގެ ކޯޗު ސިމޯން އިންޒާގީ ބުނީ ސިޓީއަށް މި ސީޒަނުގައި 52 ގޯލު ޖަހާދީފައިވާ އިސްކޮޅުންދިގު ބިޔަ ފޯވާޑުގެ އިތުރުން، މުޅި ޓީމުވެސް ހިފަހައްޓަންޖެހޭނެ ކަމަށެވެ.
އޭނާ ބުނީ އިންޓަމިލާނަކީ ގަދަ ޓީމެއް ނޫންކަމަށް ދެކެވޭ ވާހަކަތަކަކީ އޭނާގެ ޓީމަށް ލިބޭ ހިތްވަރެއް ކަމަށެވެ.
ތުރުކީގައި މިރޭ ކުޅޭ ފައިނަލާ ބެހޭގޮތުން އޭނާ މިސާލު ދެއްކީ އިޓަލީގެ އޭސީ މިލާނާއި ލިވަޕޫލް 2005 ވަނަ އަހަރު އިސްތަންބޫލުގައި ކުޅުނު ފައިނަލް މެޗުންނެވެ. އެ ފައިނަލަށް އެ ދެ ޓީމު ނުކުތްއިރު އޭސީމިލާނަކީ ޔޫރަޕުގެ ގަދަ ބާރެކެވެ. ލިވަޕޫލް ފައިނަލަށް ދިޔައީ އިނގިރޭސި ލީގުގެ ގަދަ ހަތަރެއްގައިވެސް ނުހިމެނިއެވެ. މިލާން ތިން ލަނޑު ޖަހާފައިވަނިކޮށް އެއްވަރުކޮށް، ޕެނަލްޓީ ޖަހައިގެން ތަށި ހޯދީ ލިވަޕޫލެވެ. މިއީ ޗެމްޕިއަންސް ލީގުގެ ތާރީހުގައި ފެނިގެންދިޔަ އެންމެ އާދަޔާހިލާފު އެއް ފައިނަލެވެ. މި މެޗާއި މިރޭގެ މެޗު އިންޒާގީ ގުޅުވަނީ އިންޓަމިލާނާއި ސިޓީގެ އަމިއްލަ ލީގުގެ ނަތީޖާތަކުންނެވެ. މިރޭގެ ފައިނަލަށް ނުކުންނައިރު ސިޓީ ވަނީ ޖެހިޖެހިގެން ދެވަނަ އަހަރު އިނގިރޭސި ލީގު ކާމިޔާބުކޮށްފައެވެ. އިންޓައަށް މިދިޔަ ސީޒަނުގައި ދެވަނަ، އަދި މި ސީޒަނުގައި އިޓާލިއަން ލީގުގައި ލިބުނީ ތިންވަނައެވެ.
