ޒުވާން ޓީމު ވަރަށް ހުނަރުވެރި، ސައުދީ ބަލިކުރެވޭނެކަމުގެ އުންމީދު އެބައޮތް: ގައުމީ ކޯޗު

ރާއްޖޭގެ ޒުވާން ޓީމު ވަރަށް ހުނަރުވެރި ކަމަށާއި، ސައުދި އަރަބިއްޔާއާ ދެކޮޅަށް ކުޅޭ މެޗު ކާމިޔާބުކުރެވޭނެ ކަމަށް ރާއްޖޭގެ ގައުމީ ކޯޗު ޕީޓަރ ސެގާޓް ބުނެފިއެވެ.

އޭއެފްސީ 23 އަހަރުން ދަށުގެ މުބާރާތުގެ ކޮލިފައިން ރައުންޑުގެ ގްރޫޕް ޑީ ގައި ސައުދީއާ ދެކޮޅަށް ރާއްޖެ ނިކުންނަ މެޗުގެ ކުރިން ނޫސްވެރިންނަށް މައުލޫމާތު ދެމުން ސެގާޓް ބުނީ، ރާއްޖޭގެ ޓީމަކީ ވަރަށް ހުނަރުވެރި ޓީމެއް ކަމަށާއި، ޓީމުގައި 17 އަހަރުގެ ކުޅުންތެރިންވެސް ހިމެނޭ ކަމަށެވެ.

އެގޮތުން ސެގާޓް ބުނީ، ރާއްޖެ ވަނީ ނިމިދިޔަ ސާފް ޗެމްޕިއަންޝިޕްވެސް ކާމިޔާބުކޮށްފައި ކަމަށާއި، އެއީ ރާއްޖެއަށް ލިބުނު ބޮޑު ކާމިޔާބީއެއް ކަމަށެވެ. އަދި ސައުދީއާ ދެކޮޅަށް ނިކުންނަ މެޗުވެސް ކާމިޔާބުކުރެވޭނެކަމުގެ އުންމީދު އެބައޮތް ކަމަށް އޭނާ ވަނީ ބުނެފައެވެ.

ގްރޫޕްގައި ހިމެނެނީ ވަރުގަދަ ޓީމުތައްކަން ފާހަގަކުރަމުން ސެގާޓް ބުނީ، މެޗުތަކުން ރަނގަޅު ނަތީޖާތަކެއް ނެރެން މަސައްކަތް ކުރާނެ ކަމަށާއި، އެކަމަށް ވަރަށް ބޮޑަށް އުންމީދުވެސް ކުރާ ކަމަށެވެ.

ކޮލިފައިންގައި ރާއްޖެ ހިމެނެނީ ގްރޫޕް ޑީގައި ސައުދީ، ޔުނައިޓެޑް އަރަބް އެމިރެޓްސް އަދި ލެބްނާންއާ އެކުގައެވެ.

މުބާރާތަށް ފުރުމުގެ ކުރިން ޒުވާން ޓީމު ވަނީ ހަތަރު ހަފްތާގެ ތަމްރީން ދަތުރެއް ފިލިޕިންސްގައި ހޭދަކޮށް، މެޗުތަކެއްވެސް ކުޅެފައެވެ. ސެގާޓް ބުނީ، އެ ތަމްރިން ދަތުރު ދިޔައީ ވަރަށް ފުރިހަމަކޮށް ކަމަށެވެ.

ސައުދީއާ ދެކޮޅަށް ޒުވާން ޓީމު ނިކުންނަ މެޗުގައި ކޯޗުކޮށްދޭނީ ސީނިއާ ޓީމުގެ އެސިސްޓެންޓް ކޯޗު އަހުމަދު ޝާކިރު (ޝާކިއްޓެ) އެވެ. ސީނިއާ ޓީމުގެ ކޯޗު ސެގާޓް ޒުވާން ޓީމާއެކު ތަމްރީންތަކުގެ އިތުރުން ސައުދީއަށް ދަތުރުކުރީ އެފްއޭއެމްގެ އެދުމުގެ މަތިންނެވެ.

ޝާކިއްޓެއާ ބެހޭގޮތުން ވާހަކަދައްކަމުން ސެގާޓް ބުނީ، އެއީ އެންމެ ކާމިޔާބު ޔޫތު ކޯޗު ކަމަށާއި، ޝާކިއްޓެއަށް ކާމިޔާބީއަށް އެދޭ ކަމަށެވެ. އަދި ސެގާޓް ބުނީ، އެފްއޭއެމުން ބޭނުންވަނީ ޔޫތު ކޯޗުންނާއި، ކުޅުންތެރިން ކުރިއަރުވަން ކަމަށާއި، އެކަމަށް މަރުހަބާ ކިޔާ ކަމަށެވެ.

ރާއްޖެ އަދި ސައުދީ ބައްދަލުކުރާ މެޗު އޮންނާނީ ހުކުރު ދުވަހުގެ ރޭ ރާއްޖެ ގަޑިން 10:25 ގައެވެ.