އަސްލު މައްސަލައަކީ ނަޝީދާއި އީވާވެސް ރިޔާސަތާ ދުރަށް ވަޑައިގަންނަވަން ބޭނުންފުޅުނުވުން: ރީކޯ މޫސަ

މިހާރު ދިމާވެގެން މި އުޅޭ ހަގީގީ މައްސަލައަކީ މަޖިލީހުގެ ރައީސް ނަޝީދާއި، ނައިބުރައީސް އީވާ އަބްދުﷲ ވެެސް މަޖިލީހުގެ ރިޔާސަތާ ދުރަށް ވަޑައިގަންނަވަން ބޭނުންފުޅުނުވުން ކަމަށް ރައްޔިތުންގެ މަޖިލީހުގެ ކުރީގެ ނައިބުރައީސް އަދި އެމްޑީޕީގެ ކުރީގެ ޗެއަރޕަރސަން މޫސާ މަނިކު (ރީކޯ މޫސަ) ވިދާޅުވެއްޖެއެވެ.

މޫސަ މިހެން ވިދާޅުވީ ހޮނިހިރު ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅުދައްކަވަމުންނެވެ.

ރައްޔިތުންގެ މަޖިލީހުގެ މަސައްކަތްތައް ގާނޫނުއަސާސީގައި ވަރަށް ތަފްސީލުކޮށް ބަޔާންކޮށްފައިވާކަން ފާހަގަކުރައްވައި މޫސަ ވިދާޅުވީ، މިހާރު މަޖިލިސް ހުއްޓުވާލައްވައިގެން އުޅުއްވަނީ މަޖިލީހުގެ މިހާރުގެ ރިޔާސަތުން ކަމަށެވެ.

މަޖިލީހުގެ ރައީސް ނަޝީދާއި، ނައިބުރައީސް އީވާ އަބްދުﷲ ވެެސް މަޖިލީހުގެ ރިޔާސަތާ ދުރަށް ވަޑައިގަންނަވަން ބޭނުންފުޅުނުވާކަމަށް މޫސަ ވިދާޅުވިއެވެ. ނަމަވެސް އެއީ ހުދުމުޚުތާރުވުންކަން އެބޭފުޅުންނަށްވެސް އެނގިވަޑައިގަންނަވަން ޖެހޭނެކަން މޫސަ ފާހަގަކުރެއްވިއެވެ.

އޭގެ އިތުރުން، މަޖިލީހުގެ ރައީސާއި ނައިބުރައީސްގެ އިތުބާރު ނެތްކަމުގެ މައްސަލަ ހުށަހަޅާފައިވުމަކީ މުހިއްމު މަސައްކަތްތައް މެދުކަނޑާލައި މަޖިލީހުގައި މަރުތަޅު އަޅުވަންޖެހޭ ސަބަބެއް ނޫންކަން ފާހަގަކުރައްވައި މޫސަ ވިދާޅުވީ، ދެން އެހިސާބުން ކަންކަން ކުރަންޖެހޭ ގޮތްވެސް ގާނޫނުއަސާސީގައި ސާފުކޮށް ބަޔާންކޮށްފައިވާކަމަށެވެ.

ރައްޔިތުންގެ މަޖިލީހަކީ ނުހަނު ގިނަ ބާރުތަކެއް ލިބިގެންވާ މުއައްސަސާއަކަށް ވާއިރު، ގައުމުގެ މުހިންމު މަސައްކަތްތައް މަޑުޖެހުމެއްނެތި އެތަނުގައި ހިނގަންޖެހޭނެ ކަމަށްވެސް މޫސަ ވިދާޅުވިއެވެ.

މޫސަ ވިދާޅުވީ، ކޮމިޓީ ބާއްވަން ބޭނުންވާކަމަށް ވިދާޅުވެ އާންމު ކޮމިޓީގެ 3 މެމްބަރަކު މަޖިލީހަށް ސިޓީ ހުށަހެޅުއްވުމުން، އެ ކޮމިޓީއެއް ބާއްވައިދިނުމަކީ މަޖިލީހުގެ އަމީންއާންމު ކުރައްވަން ޖެހިވަޑައިގަންނަވާނެ ކަމެއް ކަމަށެވެ. އެހާހިސާބުން އާންމު ކޮމިޓީއަށް އަނެއްކާވެސް ކޮމިޓީތަކުގެ ކޮމްޕޮޒިޝަން އެކުލަވާލެވިގެން ދާނެކަމަށް މޫސަ ވިދާޅުވިއެވެ.

ރައްޔިތުންގެ މަޖިލީހުގެ ރައީސް، މުހައްމަދު ނަޝީދު މަޖިލިސް ހިސޯރުކުރައްވާފައި ވަނީ އަމީންއާންމު ފާތިމަތު ނިއުޝާގެ އެއްބާރުލުމާއެކުގައި ކަމަށް ވަނީ ތުހުމަތު ކުރެވެންފަށާފައެވެ.