ރާއްޖޭގައި މަގުބޫލުކަން ހޯދާފައިވާ ބައިނަލްއަގުވާމީ ދެ ބްރޭންޑެއް ކަމަށްވާ "ޑޯނަރ ކަބާބް މޯލްޑިވްސް" އާއި "މޫވެންޕިކް" ގުޅިގެން މާލޭގައި ރެސްޓޯރެންޓެއް ހުޅުވައިފިއެވެ.
ލޮނުޒިޔާރަތްމަގުގައި ހުންނަ މި ރެސްޓޯރެންޓް ހުޅުވާފައިވަނީ ހުކުރު ދުވަހު ބޭއްވި ހާއްސަ ހަފްލާއެއްގައެވެ. މި ރެސްޓޯރެންޓް ހުޅުވައިދިނީ މޫވެންޕިކްގެ ސައުތު އޭޝިއާ ބްރޭންޑް އެމްބެސެޑަރ، އޭވީއެމް ރައޯއާއި މޫވެންޕިކްގެ ރާއްޖޭގެ މެނޭޖިންގ ޑިރެކްޓަރ އާމިނަތު އަޝްފާއެވެ.
މިއީ ރާއްޖޭގައި ޑުއަލް ކޮންސެޕްޓަކަށް ރެސްޓޯރެންޓެއް ހުޅުވި ފުރަތަމަ ފަހަރެވެ. މި ރެސްޓޯރެންޓް ޑޯނަރ ކަބާބާއި މޫވެންޕިކުން ހުޅުވާފައިވަނީ ވާލީ އިންޓަނޭޝަނަލްގެ އެފް އެންޑް ބީއާ ވެސް ގުޅިގެންނެވެ.
މި ރެސްޓޯރެންޓުން ޑޯނަރ ކަބާބުގެ ރަހަތަކާއި މޫވެންޕިކް އައިސްކްރީމްގެ ތަފާތު ރަހަތައް ކަސްޓަމަރުންނަށް ތަޖުރިބާ ކުރެވޭނެ ކަމަށް އެ ރެސްޓޯރެންޓުން ބުނެއެވެ. އަދި މިއީ ކާން ތިބެލަން ވަރަށް ހިތްގައިމު ތަނަކަށް ވާނެކަމަށްވެސް ވަނީ ބުނެފައެވެ.
ރެސްޓޯރެންޓް ހުޅުވުމުގެ ރަސްމިއްޔާތަށްފަހު މީޑިއާތަކަށް މައުލޫމާތުދެމުން، މޫވެންޕިކްގެ ސައުތު އޭޝިއާ ބްރޭންޑް އެމްބެސެޑަރ އޭވީއެމް ރައޯ ވިދާޅުވީ، ޑުއަލް ކޮންސެޕްޓަކަށް ރެސްޓޯރެންޓެއް ހުޅުވުމުގެ ބޭނުމަކީ ތަފާތު ރަހަތައް އެއްތަނަކުން ތަޖުރިބާ ކުރުމުގެ ފުރުސަތު ފަހިކޮށްދިނުން ކަމަށެވެ. އަދި މޫވެންޕިކަކީ ކުރިން ސްޓޭންޑިންގ އައުޓްލެޓުތައް ހުރި ބްރޭންޑަކަށްވެފައި އެ ފަދަ ބްރޭންޑެއްގެ އައިސްކްރީމްގެ ތަފާތު ރަހަތައް ރެސްޓޯރެންޓެއްގެ ޒަރީއާއިން އާއްމުންނާ ހިސާބަށް ފޯރުކޮށްދެވުމަކީ ލިބޭ އުފަލެއް ކަމަށްވެސް އޭނާ ބުންޏެވެ.
މި ރެސްޓޯރެންޓާ ގުޅޭގޮތުން ވާހަކަދައްކަމުން ޑޯނަރ ކަބާބް މޯލްޑިވްސްގެ އޮޕަރޭޝަންސް މެނޭޖަރ މުހައްމަދު އިބްރާހީމް ބުނީ، ޔޫރަޕްގެ މަޝްހޫރު ދެ ބްރޭންޑެއް ރާއްޖެއަށް ގެނެސް ޑުއަލް ކޮންސެޕްޓަށް ތައާރަފުކުރުމުގެ ކުރިން މާކެޓް ދިރާސާއެއް ހެދިކަމަށެވެ. އެ ދިރާސާއިން، ތަރުހީބު އޮތްކަން އެނގުނުކަމަށާއި މިއީ ވަރަށް ރަނގަޅު ކޮންސެޕްޓަކަށް ވާނެކަމަށް އޭނާ ބުންޏެވެ.
ސްވިޒަލެންޑުގެ މަގުބޫލު މޫވެންޕިކް ރާއްޖޭގައި ތައާރަފުކުރިތާ 21 އަހަރު ވެފައިވާއިރު، އެ ބްރޭންޑަކީ ދިވެހިންގެ މަގުބޫލުކަން ލިބިފައިވާ ބްރޭންޑެކެވެ. މި ބްރޭންޑުގެ އައިސްކްރީމް ވިއްކާ އައުޓްލެޓްތައް މާލެއާއި ކްރޮސް ރޯޑްސްގައި ވަނީ ހުޅުވާފައެވެ.
ޔޫރަޕުގެ ރަހަތަކާއެކު ޑޯނާ ކަބާބު ރާއްޖެއަށް ތައާރަފުކުރިތާ އެއް އަހަރު ވެފައިވާއިރު، އެ ބްރޭންޑުން މިހާތަނަށް ރާއްޖޭގައި ދެމުން އައީ ޓޭކްއަޥޭގެ ހިދުމަތެވެ. މި ބްރޭންޑަށްވެސް ކުޑަ ދުވަސްކޮޅެއްގެ ތެރޭގައި ގިނަ ބައެއްގެ މަގުބޫލުކަން ވަނީ ލިބިފައެވެ.
