ހައްޖު ކިއު ވަރަށް ދިގު ކަމަށާއި، 5000ށް ވުރެ ގިނަ މީހުން ލިސްޓުގައި އެބަތިބި ކަމަށް ހައްޖު ކޯޕްރޭޝަނުން ބުނެފިއެވެ.
ރާއްޖެޓީވީގައި ވާހަކަދައްކަވަމުން ހައްޖު ކޯޕަރޭޝަންގެ ކޯޕަރޭޓް އެފެއާޒްގެ މެނޭޖަރު އާއިޝަތު ޤާހިރު ވިދާޅުވީ ހައްޖު ކިޔު ވަރަށް ދިގު ކަމަށާއި، މިހާރު 2029 ވަނަ އަހަރު ހައްޖަށް ދާން ބޭނުންވާ މީހުންނަށް އެފުރުސަތު ހުޅުވާލާފައިވާ ކަމަށެވެ. 2029 ވަނަ އަހަރު ހައްޖަށް ދިއުމަށް މިހާރު އެއްކޮށް ފައިސާ ދައްކައިފިނަމަ ނުވަތަ 75 އިންސައްތަ ފައިސާ ދައްކައިފިނަމަ ކިޔުގައި ނަން ނޯޓު ކުރެވޭނެ ކަމަށް އޭނާ ވިދާޅުވިއެވެ.
މިއަދު އަޅުގަނޑުމެން މިފެށީ 2029 ވަނަ އަހަރަށް ނޯޓު ކުރަން އެހެންވީމަ މިއަދު ފުލް އަގު ދައްކާފިކަމަށްވާނަމަ ނުވަތަ 75 އިންސައްތައަށް ވާވަރަށް ފައިސާ ފުރިހަމަކޮށްފިނަމަ އިރާދަކުރެއްވިއްޔާ 2029 ވަނަ އަހަރަށް ނޯޓު ކުރާނަން. އެއީ ގާތްގަނޑަކަށް 800 އެއްހާ މީހުން ގެންދެވޭ ކަމަށް ބަލައިގެން އަޅުގަނޑުމެން މިހާތަނަށް ނޯޓު ކުރަމުން މިއައީ އެގޮތަށް ލަފާކޮށްގެން. ނަމަވެސް އެކި ސަބަބުތަކާއި ހުރެ އެކި އަހަރުތަކުގައި އަޅުގަނޑުމެންނަށް ލިބޭ ކޯޓާގެ އަދަދު ވެސް މަދުވޭ. އެހެންވީމަ ކޯޓާގެ އަދަދަށް ބަރޯސާވޭ ގެންދެވޭ އަދަދު ވެސް.އާއިޝަތު ޤާހިރު / ހައްޖު ކޯޕަރޭޝަންގެ ކޯޕަރޭޓް އެފެއާޒްގެ މެނޭޖަރު
ކޮވިޑް-19ގެ ހާލަތަށް އިޝާރާތްކުރައްވައި އާއިޝަތު ވިދާޅުވީ ދެއަހަރު ފަހަތަށް ޖެހެން ޖެހުނު ކަމަށެވެ. އެގޮތުން މިދިޔަ އަހަރު ކޯޓާ ލިބުނީ ވަރަށް މަދުން ކަމަށާއި، ހައްޖަށް ދެވޭނެ ކަމަށް އުންމީދު ކުރި ގިނަ ބަޔަކަށް ވެސް ނުދެވުނު ކަމަށެވެ. އަދި ވިދާޅުވީ މިދިޔަ އަހަރުގެ އުސޫލުތައް ހުރި ގޮތުން 60 އަހަރުން މަތީގެ މީހުންނަށް ހައްޖަށް ދިއުމަށް ވިސާ ނުލިބުނު ކަމަށާއި، މިއަހަރު އެ މީހުންނަށް ފުރުސަތުދީފައިވާ ކަމަށެވެ.
މީގެ އިތުރުން އާއިޝަތު ވިދާޅުވީ މިއަހަރު ހައްޖަށްދާ މީހުންގެ ތެރެއިން ގިނައީ އުމުރުން ދުވަސްވީ މީހުން ކަމަށެވެ. އެހެންކަމުން ޚާއްސަ އިންތިޒާމްތަކެއް ހަމަޖައްސާފައިވާކަން އޭނާ ފާހަގަކުރެއްވިއެވެ.
ހައްޖުގެ ކިޔުގައި 5000ށްވުރެ ގިނަ މީހުން ތިބިއިރު ކޯޓާ އިތުރު ކުރުމަށް ވެސް ސައުދީ ސަރުކާރާއެކު މަޝްވަރާ ކުރަމުންދާ ކަމަށް އިސްލާމިކް މިނިސްޓްރީން ބުނެއެވެ. އަދި ސައުދީ ސަރުކާރުން ކޯޓާ އިތުރުކޮށްދެނީ ވެސް އެ ގައުމެއްގައި ދިރިއުޅޭ މުސްލިމުންގެ އާބާދީއަށް ބެލުމަށްފަހު އެވެ. މިދިޔަ އަހަރު މަދުން ކޯޓާ ލިބުނު ނަމަވެސް އާއްމު ގޮތެއްގައި ކޯޓާ ދޭ މިންވަރަށް މި އަހަރު ކޯޓާ ދޫކޮށްފައިވާކަން މިނިސްޓްރީން ފާހަގަކުރިއެވެ.
މީގެ އިތުރުން ކޯޓާގެ 5 އިންސައްތަ ޚާއްސަކުރަނީ ފުރާނައަށް ނުރައްކާވާފަދަ ބޮޑެތި ބަލިތައް ތަހައްމަލް ކުރާ މީހުންނަށެވެ. އެގޮތުން މިއަހަރު ވެސް އެފުރުސަތު ހުޅުވާލާ އިވެލުއޭޓް ކުރުމަށްފަހު، ކިޔުގެ ތަރުތީބު އެފަދަ މީހުންނަށާއި، އެހީތެރިޔާއަށް ފުރުސަތު ދީފައިވެއެވެ.
