އައްޑޫ ސިޓީ އިތުރަށް ތަރައްގީކުރުމަށް ބިން ބޭނުންވޭ، އެ މަޝްރޫއު ކުރިއަށްދާނެ: ސަރުކާރު

އައްޑޫ ސިޓީ އިތުރަށް ތަރައްގީ ކުރުމަށް ބިން ބޭނުންވާކަމަށާއި، އެމަޝްރޫއު ކުރިއަށްދާނެކަމަށް ސަރުކާރުން ބުނެފިއެވެ.

އައްޑޫގެ ބިން ހިއްކުމުގެ ބިޔަ ބޮޑު މަޝްރޫއެއް ފަށާފައިވާތީ، އެކަމާ ބައެއް ފަރާތްތަކުން ދެކޮޅުހަދައި ''ސޭވް އައްޑޫ''ގެ ނަމުގައި ދަނީ ކެމްޕޭނެއް ކުރިއަށް ގެންދަމުންނެވެ. އަދި މި ކެމްޕޭން ކުރިއަށްގެންދަނީ އައްޑޫގެ ތިމާވެއްޓަށް ވަރަށް ބޮޑަށް ގެއްލުން ލިބޭތީ ކަމަށް، ކެމްޕޭން ކުރިއަށްގެންދާ ފަރާތްތަކުން ބުނެއެވެ. މިކެމްޕޭނާ ގުޅިގެން މީގެ ކުރިން ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވީ، މީސްމީޑިއާގައި ބޭނުންކުރަމުންދާ ''ސޭވް އައްޑޫ'' ސްލޯގަންއަކީ ސަރުކާރާ ދެކޮޅަށް ގެންގުޅޭ ކެމްޕޭނު ސްލޯގަންއެއް ކަމަށެވެ.

މި މައްސަލައާ ގުޅިގެން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، އައްޑޫ ތަރައްގީކުރުމަށް ބިން ބޭނުންވާކަމަށާއި، އައްޑޫ ތަރައްގީކުރަނީ ވަކި ޕްލޭނެއްގެ ދަށުން ކަމަށެވެ.

މިއުވާން ވިދާޅުވީ ތަރައްގީގެ މަޝްރޫއުތައް ކުރިއަށްގެންދަނީ ކައުންސިލާ ފުރިހަމައަށް މަޝްވަރާ ކުރުމަށްފަހު ކަމަށާއި، ތިމާވެއްޓަށްވެސް ބަލައިގެން ކަމަށެވެ. މިހާރު ހިއްކާފައިވާ ބިންތައް ބޭނުންކުރާނެ ގޮތުގެ ފުރިހަމަ ޕްލޭންތައް ކައުންސިލްގައި ހުންނާނެކަމަށް މިއުވާން ވިދާޅުވިއެވެ.

އައްޑޫ ސިޓީގެ ތަރައްގީއާއި އިގްތިސާދާ ގުޅިފައިވާ، ބިންހިއްކުމުގެ މަޝްރޫއު ރައީސް އިބްރާހީމް މުހައްމަދު ސާލިހު ރަސްމީކޮށް ފައްޓަވައިދެއްވީ 03 ޖޫން 2023ގައެވެ.

މި މަޝްރޫއުގެ ދަށުން އެ ސިޓީއަށް ޖުމުލަ 194.3 ހެކްޓަރުގެ ބިން އިތުރުކުރެވޭނެއެވެ. އަދި މި މަޝްރޫއުގެ ދަށުން ގޮނޑުދޮށް ހިމާޔަތް ކުރުމުގެ މަސައްކަތްވެސް ކުރާނެއެވެ.