ދަ ޑިމޮކްރެޓްސް އުފެއްދުމަށް ހުށަހެޅި ފޯމްތަކުގެ މައުލޫމާތު ލީކުކޮށްފައެއް ނުވާނެ: އިލެކްޝަންސް ކޮމިޝަން
6 ޖޫން 2023 | އަންގާރަ 18:17އެފަދަ އެއްވެސް ކަމަކީ އެ ކޮމިޝަންގެ ތެރޭގައި ހިނގާފައިވާ ކަމެއް ނޫން
ދަ ޑިމޮކްރެޓްސް ޕާޓީ ރަޖިސްޓްރީ ކުރަން ފޯމްތައް ހަވާލުކުރަނީ
އަލަށް އުފައްދާ "ދަ ޑިމޮކްރެޓްސް" ރަޖިސްޓްރީ ކުރުމަށް ސޮއިކުރި 3565 މެންބަަރުންގެ ނަން ލިސްޓް ހިމެނޭ ލިސްޓް ލީކޮށްފައިނުވާނެ ކަމަށް އިލެކްޝަންސް ކޮމިޝަން ބުނެފިއެވެ.
އަންގާރަ ދުވަހުގެ ރޭ އެ ކޮމިޝަނުން ނެރުނު ނޫސްބަޔާނެއްގައި ބުނީ ފޯމްތަކުގެ މައުލޫމާތު ލީކުކޮށްފައިވާކަމަށް ބުނެ ޚަބަރު ފަތުރަމުންދާ ކަމަށެވެ. އަދި އެފަދަ އެއްވެސް ކަމަކީ އެ ކޮމިޝަންގެ ތެރޭގައި ހިނގާފައިވާ ކަމެއް ނޫން ކަމަށާއި އެފަދަ އެއްވެސް އަމަލެއް ކޮމިޝަންގެ އެއްވެސް މެމްބަރަކު ނުވަތަ މުވައްޒަފަކު ހިންގާފައިނުވާ ކަމަށް އެ ކޮމިޝަނުން ބުނެފައި ވެއެވެ.
އިލެކްޝަންސް ކޮމިޝަނުން ވަނީ ރިޔާސީ އިންތިޚާބަށް ކޮމިޝަނުން ތައްޔާރުވަމުންދާ މި ދަނޑިވަޅުގައި ކޮމިޝަނާއި ކޮމިޝަންގެ މެމްބަރުންނާއި މުވައްޒަފުންނަށް ރައްޔިތުންގެ މެދުގައި އޮތް އިތުބާރު ގެއްލޭގޮތަށް އެއްވެސް ފަރާތުން ކޮމިޝަނާއި މަތިކޮށް އެއްވެސް ވާހަކައެއް ނުފެތުރުމަށް އިލްތިމާސްކޮށްފައެވެ.
އިލެކްޝަންސް ކޮމިޝަނުން މިފަދައިން ބަޔާން ނެރެފައިވާއިރު އެމްޑީޕީގެ ކުރީގެ ނާއިބު ރައީސް އަދި ޑިމޮކްރެޓްސްގެ އިސް ބޭފުޅެއް ކަމަށްވާ މުހައްމަދު ޝިފާޒް ވިދާޅުވީ ދައުރުވަމުންދާ ލިސްޓަށް ބަލާއިރު އެއީ ކޮމިޝަންގެ ތެރެއިން ބޭރުވި ލިސްޓެއްކަން ޔަގީން ކުރެވޭ ކަމަށެވެ. ޝިފާޒް ވިދާޅުވި ގޮތުގައި އެ ލިސްޓް ސަރުކާރުގެ ވެރީންނާއި ސިޔާސީ ބޭފުޅުން އެބަ ގެންގުޅުއްވައެވެ. އަދި ލިސްޓްގައި ހިމެނޭ ސަރުކާރުގެ ކުންފުނިތަކާއި އޮފީސްތަކުގައި ވަޒީފާ އަދާކުރާ މީހުންނަށް ގުޅާ ބިރު ދައްކަމުންދާ ކަމަށް ޝިފާޒް ވިދާޅުވެފައި ވެއެވެ.
"ދަ ޑިމޮކްރެޓްސް" އިން މި ތުހުމަތުތައް ކުރަމުންދާއިރު އެ ޕާޓީއަށް ސޮއިކުރާ މެންބަރުންނަށް ސަރުކާރުން އަދި އެމްޑީޕީންވެސް ބިރު ނުދައްކާ ކަމަށް ރައީސް އޮފީހުގެ މިނިސްޓަރު އަދި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބްރޭ) ވަނީ ވިދާޅުވެފައެވެ.
