ފަހުގެ ތާރީޚުގައި ނަޝީދު ފެންނަނީ ޑިމޮކްރެޓިކް ހަމަތަކާއި ދުރު ބޭފުޅެއްގެ ގޮތުގައި: އަސްލަމް

ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދު މިފަހުގެ ތާރީޚުގައި ފެނިގެންދަނީ ޑިމޮކްރެޓިކް ހަމަތަކާ ދުރުބޭފުޅެއްގެ ގޮތުގައި ކަމަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރ މުހައްމަދު އަސްލަމް ވިދާޅުވެއްޖެއެވެ.

ރައީސް ނަޝީދު މަޖިލީހުގެ ރައީސްކަމުގެ މަގާމުން ވަކިކުރުމަށް އިތުބާރު ނެތްކަމުގެ މައްސަލަ ހުށަހެޅުމަށް އެމްޑީޕީގެ ޕީޖީން ނިންމިކަން ހާމަކުރައްވާ ޕާލަމެންޓްރީ ގްރޫޕްގައި ހިމެނިވަޑައިގަންނަވާ ގިނަ މެމްބަރުންނާއެކު ނޫސްވެރިންނާ ބައްދަލުކުރައްވާ ވާހަކަދައްކަވަމުން އަސްލަމް ވަނީ ނަޝީދުގެ އިތުބާރުނެތްކަމުގެ މައްސަލަ ހުށަހެޅުމަށް އެމްޑީޕީ ޕީޖީން ނިންމި ސަބަބުތައް ހާމަކޮށްދެއްވާފައެވެ. ނޫސްވެރިން ކުރި ސުވާލުތަކަށް ޖަވާބު ދެއްވަމުން އަސްލަމް ތަކުރާރުކޮށް ވިދާޅުވީ ރައީސް ނަޝީދަކީ ޒަމާންތަކަކަށް އިހުތިރާމާއި ލޯތްބާއެކު ބަލައިގަނެފައިވާ ސިޔާސީ ޝަހުސިއްޔަތެއްކަމަށެވެ.

ދެކެމުންދިޔައީ ނަޝީދަކީ ޑިމޮކްރަޓިކް ހަމަތައް ނަގަހައްޓަވާނެ އަދި ގަބޫލުކުރަމުންދިޔައީވެސް ރާއްޖޭގެ އިސްލާހީ މަސައްކަތުގައި އިސް ސަފުގައި މަސައްކަތްކުރައްވާ ބޭފުޅެއްގެ ގޮތުގައިކަމަށް އަސްލަމް ވިދާޅުވިއެވެ. ނަމަވެސް ފަހުގެ ތާރީޚުގައި ނަޝީދުގެ އަމަލުތައް ހުރި ގޮތުން އެއީ ބަލައިގަނެގެން މިތިބި އުސޫލުތަކާއި ޚިލާފަށް އަމަލުކުރައްވާ ބޭފުޅެއްގެ ގޮތުގައި ފާހަގަވަމުންދާކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ އިސްލާހީ މަސައްކަތަށްވުރެ ބޮޑަށް އަމިއްލަވަންތަކަން ނަޝީދު އިސްކުރައްވާތަން ފެންނަކަމަށެވެ.

އަސްލަމް އިތުރަށް ވިދާޅުވީ އެމްޑީޕީގެ ޕާލަމަންޓްރީ ގްރޫޕުން އަބަދުވެސް ނަޝީދާ ދޭތެރޭ ޚާއްސަ ނަޒަރަކުން ބަލަމުންދާކަން އަބަދުވެސް ފާހަގަކުރެވޭކަމަށެވެ. އެއީ ނަޝީދަކީ އެމްޑީޕީ އުފެދިގެން މިހާހިސާބަށް އައިއިރުވެސް ގިނަ މަސައްކަތްތަކެއް ކުރައްވާފައިވާ އަދި ވަރަށް ގިނަ ބަޔެއްގެ ރުހުން ލިބިފައިވާ ބޭފުޅެއްވީމަ ކަމަށެވެ. މީގެއިތުރުން އެމްޑީޕީގެ ރައީސްކަމުގައި ނަޝީދު ހުންނެވުމުންވެސް ވަރަށް ގިނަ ކަންކަމުގައި ދޫދީފައިވާކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ މިފަދަ ކަންކަމާހެދި ނަޝީދާ މެދު ހިތުގައި އުފެދިފައިވާ ލޯތްބާ ގަދަރު ކުޑަވެގެންގޮސް މިއަދަކީ ދެން އިތުރަށް ނަޝީދު މަޖިލީހުގެ ރައީސްކަމުގައި ބައިންދައިގެން މަޖިލިސް އިތުރަށް ހިންގިދާނެކަމަށް ގަބޫލުނުކުރެވުނު ދުވަސްކަމަށެވެ. ނަޝީދުގެ އިތުބާރު ނެތްކަމުގެ މައްސަލަ ހުށަހަޅަން ނިންމީ އެހެންވެގެންކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ ނަޝީދުގެ އިތުބާރު ނެތްކަމުގެ މައްސަލައިގެ ސޮއިކުރުމަށް ބޭނުންވާ އަގްލަބިއްޔަތު ކަމުގައިވާ 44 މެމްބަރުންގެ ސޮއިލިބޭނެކަމަށެވެ. އަދި އެއަދަދު 50ށް ވުރެ މަތިވާނެކަމަށް އަސްލަމް ވިދާޅުވިއެވެ. ސޮއި ހަމަވުމާއެކު އެމައްސަލަ ހުށަހަޅާނެކަމަށް އަސްލަމް ވިދާޅުވިއެވެ.

މަޖިލީހުގެ ރައީސްކަމުން ނަޝީދު ވަކިކުރުމަށް ސޮއި ހޯދަމުންދާއިރު ނައިބު ރައީސް އީވާ އަބްދުﷲގެ އިތުބާރުނެތްކަމުގެ މައްސަލަވެސް ވަނީ މަޖިލީހަށް ހުށަހަޅާފައެވެ.