މި ސަރުކާރުން އިގްތިސާދީ ގޮތުން ކުރާ އެއްވެސް ކަމެއް ދެއުޅިއެއް ނުވާ ކަމަށާއި ރައީސް ޑރ. މުހައްމަދު މުއިއްޒުއާއި ވަޒީރުންނަށް ކަންކަން ތަސައްވަރުކުރާކަށް ނޭނގޭ ކަމަށް ފުވައްމުލަކު މެދު ދާއިރާގެ ކުރީގެ މެންބަރު ޙުސައިން މުޙައްމަދު ދީދީ ވިދާޅުވެއްޖެއެވެ.

އެމްޑީޕީގެ ހަރުގެ ޖަލްސާގައި ވާހަކަ ދައްކަވަމުން ހުސައިން މުހައްމަދު ވިދާޅުވީ މިހާރު ހުންނެވި ރައީސުލްޖުމްހޫރިއްޔާ ވިދާޅުވަމުން ގެންދެވީ، ތިމަންނަމެންނަށް ވެރިކަން ލިބިއްޖެއްޔާ ވަކި ގޮތަކަށް ކަންކަން ގެންދަވާނެ ވާހަކަ ކަމަށެވެ. އަދި ކުދި ވިޔަފާރިތައް ތަރައްޤީކުރާނެ ކަމާއި، މެދު ފަންތީގެ ވިޔަފާރިތަކަށް ތަރައްޤީކުރާނެ ވާހަކައާއި، ޑޮލަރުގެ އަގު ތިރިކުރާނެކަމަށް ބުނަމުންދިޔަ ކަމަށެވެ.

ހުސައިން މުހައްމަދު ވިދާޅުވީ މި ހުރިހާ ވަޢުދުތަކެއްވިނަމަވެސް ފެންނަމުންދަނީ މިހާރުގެ ސަރުކާރުން އިޤްތިޞާދީ ގޮތުން ކުރާ އެއްވެސް ކަމެއް ދެ އުޅިއެއް ނުވާ ތަން ކަމަށެވެ. ރައީސުލްޖުމްހޫރިއްޔާ ޑޮލަރުގެ އަގު، ނޫނީ ޑޮލަރުގެ ރޭޓު ދަށްކުރުމަށްޓަކައި ކުރި ކަމަކީ، މަޖުބޫރުކޮށްގެން ރިސޯޓުތަކާއި އަދި އިތުރަށް ގެސްޓްހައުސްތަކުން ޑޮލަރު މަޖުބޫރުކޮށްގެން ދައުލަތަށް ނެގުން ކަމަށާއި، އެ ނަގައިގެން ޑޮލަރުގެ ރޭޓު ދަށްވުމުގެ ބަދަލުގައި އަށާރަ އަތް، ނަވާރަ، ވިހި ގޮސް އެކާވީހެން އަރާ މަންޒަރު ފެނިފައިވާ ކަމަށް އޭނާ ވިދާޅުވިއެވެ.

ހުސައިން މުހައްމަދު ވިދާޅުވީ މުއިއްޒު ރައީސަކަށް އައިސް، ކުރީގައި މިނިސްޓަރަކަށް ހުންނަވައިގެން ވެސް ކުރެއްވި މަސައްކަތަކީ މާފަންނުގައި ބޮޑު ސިންގާ ގެއެއް އެޅުއްވުން ކަމަށެވެ. އަދި ރައީސް މުއިއްޒުއަކަށް ޤައުމަކަށް، ރައްޔިތަކަށް ކަމެއް ކޮށްދޭން އެނގިވަޑައިނުގަންނަވާނެ ކަމަށާއި، ކުރެވޭނެ ކަމަކީ ޖީބު ބޮޑުކުރުމާއި، ރައްޓެހިންނަށް ކަޓުދިނުމާއި، އެ މީސްމީހުންނަށް އެއްޗެއް ހޯދައިދިނުން ކަމަށެވެ.

އޭނާ ވިދާޅުވީ ގިނަ ދިވެހި ރައްޔިތުންނަށް ފެނުނީ، ގިނަ ދިވެހި ރައްޔިތުންނަށް އަޑުއިވުނީ، ރައީސުލްޖުމްހޫރިއްޔާއަކަށް މިހާރު ހުންނެވި ޑޮކްޓަރ މުޢިއްޒު ދައްކަވަމުންގެންދިޔަ ވާހަކަތައް ކަމަށެވެ. ޑޮލަރުގެ ރޭޓު ދަށްކުރާނެ ވާހަކަ ވިދާޅުވި ކަމަށާއި، ނަމަވެސް ޑޮލަރު ރޭޓް ދަނީ ބޮޑުވަމުން ކަމަށް ވިދާޅުވިއެވެ. އަދި ކުދި އަދި މެދު ފަންތީގެ ވިޔަފާރ މިހާރު އޭރުގެ ސަރުކާރުން ޖޫރިމަނާކުރާ ވާހަކައާއި މީރާއިން އުނދަގޫކުރާ ވާހަކަތައް އެ ބޭފުޅުން ދައްކަމުންގެންދިޔަ ކަމަށާއި، އޭރުގެ މަޖިލީހުގައި ތިއްބެވި އިދިކޮޅު ޕާޓީގެ މެންބަރުން އަދި މިހާރުގެ މިނިސްޓަރުން ވެސް އެ ވާހަކަތައް ދައްކަމުންގެންދިޔަ ކަމަށެވެ. ނަމަވެސް މިހާރު މި ފެނުނީ މީރާއިން ދުވާލަކަށް އޮންނަ ޕެނެލިޓީ ދެގުނަކުރިތަން ކަމަށެވެ.

އޭނާ ވިދާޅުވީ މީގެ ނަތީޖާއަކީ، ދިވެހިރާއްޖޭގެ ކޮންސްޓްރަކްޝަން އިންޑަސްޓްރީގައި މިހާރުވެސް ޕްރޮޖެކްޓެއް ނުލިބި ސަރުކާރުން ފައިސާ ނުލިބި ޖޫރިމަނާ ކޮށް ވިޔަފާރިތަކަށް އުނދަގޫކުރުން ކަމަށެވެ. އަދި މިއީ މިހާރުގެ ރައީސުލްޖުމްހޫރިއްޔާ އަލުން އިޤްތިޞާދު ކުރިއެރުވުމަށް ކުރެވޭ މަސައްކަ ކަމަށެވެ. އަދި މިހާރު ގޯސްވިޔަސް ފަހުގެ ތިން އަހަރު ރަނގަޅުކުރައްވާނޭ ކަމަށް ވިދާޅުވަމުން ދިޔަޔަސް އެއްގޮތަކަށްވެސް މިހާރު ރައީސުލްޖުމްހޫރިއްޔާ ކުރައްވާ ކަންތައްތަކަކުން، ހައްދަވާ ޕޮލިސީތަކަކުން، އެއްވެސް ވަރަކަށް ޤައުމު ކުރިއަށް އޮތް ދުވަސްތަކެއް ވެސް ރަނގަޅުކުރުމުގެ އެއްވެސް ވިސްނުމެއް، ނޫނީ އެ މިސްރާބަށް ދާ މަންޒަރެއް ނުފެންނަ ކަމަށެވެ.

ހުސައިން މުހައްމަދު ވިދާޅުވީ ކުރިއަށް މި އޮތް ލޯކަލް ކައުންސީ އިންތިޚާބު މިހާރު ކުޑަތަންވަމުން ދާއިރު، ރައްޔިތުން ވިސްނަންޖެހޭ ކަމަށެވެ. އަދި ކައުންސިލު އިންތިޚާބު ސަރުކާރަށް ދީފިއްޔާ، މިހާރަށްވުރެ ހުދުމުޚުތާރުކަން ބޮޑުވެގެންދާނެ ކަމަށެވެ. އެހެންކަމުން ރައްޔިތުން ވިސްނައި، ކުރިއަށް އޮތް ލޯކަލް ކައުންސިލު އިންތިޚާބުގައި މިހާރުގެ ސަރުކާރަށް ނޫނެކޭ ބުނަން ޖެހޭ ކަމަށެވެ. މިއީ ރައްޔިތުންނަށް ދިމާވާ ދަތިތަކާއި ކުދި އަދި މެދުފަންތީގެ ފިޔަފާރިތަކަށް ދިމާވަމުންދާ ގޮންޖެހުންތަކަށް ނޫނެކޭ ބުނެވޭނެ ފުރުސަތު ކަމަށް ވެސް އޭނާ ވިދާޅުވިއެވެ.