ޓުޗެލް ބޭނުންވަނީ ރަފީނިއާ ބަޔާނަށް ގެންނަން

ކުރިއަށް އޮތް ސީޒަނަށް ޓީމު ވަރުގަދަ ކުރުމަށް ބަޔާން މިއުނިކުން ކުރަމުން އަންނަ މަސައްކަތުގެ ތެރެއިން އެ ޓީމުގެ ކޯޗު ތޯމަސް ޓުޗެލް ބޭނުންވަނީ ބާސެލޯނާ އަށް ކުޅެމުން އަންނަ ބްރެޒިލްގެ ރަފީނިއާ އެ ޓީމަށް ގެންނަން ކަމަށް ޖަރުމަނުގެ ނޫސްތަކުގައި ބުނެފި އެވެ.

ރަފީނިއާ ބާސެލޯނާއާއެކު ހަދާފައިވާ ފަސް އަހަރު ދުވަހުފެ އެއްބަސްވުން ހަމަވާނީ 2027 ވަނަ އަހަރު އެވެ. އޭނާ ބާސެލޯނާ އަށް ބަދަލުވީ ލީޑްސް ޔުނައިޓެޑު ދޫކޮށެވެ. ރަފީނިއާ އެ ޓީމުގައި ހުރި ދުވަސްވަރު ވެސް ޓުޗެލް އޭނާ ގެންނަން ބޭނުންވި އެވެ. އެހެންކަމުން ޓުޗެލްގެ ކުރީގެ ކުލަބު ޗެލްސީން އޭރު އޭނާ ހޯދުމުގެ މަސައްކަތް ވެސް ކުރި އެވެ. ނަމަވެސް ޗެލްސީގެ މައްޗަށް ކުރި ހޯދީ ބާސެލޯނާ އިންނެވެ. އެހެންކަމުން އޭރުން ފެށިގެން ވެސް ރަފީނިއާ އަކީ ޓުޗެލް ގަޔާވާ ކުޅުންތެރިޔެކެވެ. ޚާއްސަކޮށް ރަފީނިއާގެ ކުޅުމުގެ ވައްޓަފާޅި އާއި އޭނާގެ ހުނަރާ މެދު އޭރު ވެސް ޓުޗެލް ހިތްހަމަ ޖެހެ އެވެ. އެހެންކަމުން ރަފީނިއާ ބަޔާނަށް ގެނައުމަކީ ޓުޗެލް މިވަގުތު އެންމެ ބޭނުންވާނެ އެއް ގޮތް ކަމަށް ރިޕޯޓުތަކުގައި ވަނީ ބުނެފަ އެވެ. ރަފީނިއާ ހޯދުމަށް ޓުޗެލް ބޭނުންވަނީ، ބަޔާންގެ ޑިފެންޑަރު ބެންޖަމިން ޕަވާޑް ބާސެލޯނާ އަށް ދޫކޮށްލުމަށް ފަހު އެވެ. އެއީ ޕަވާޑް އަކީ ބާސެލޯނާ އިން ގެންނަން ބޭނުންވާ ކުޅުންތެރިޔަކަށް ވުމުން ކަމަށް ރިޕޯޓުތަކުގައިވެ އެވެ.

ރަފީނިއާ ވަނީ ބާސެލޯނާ އަށް 50 މެޗު ކުޅެދީ 10 ލަނޑު ޖަހައިފަ އެވެ. ޓުޗެލްއެކޭ އެއްފަދައިން ރަފީނިއާ އަކީ ބާސެލޯނާގެ ކޯޗު ޒަވީ ހެނާންޑޭޒް ވެސް ބޭނުންވާ ކުޅުންތެރިޔެކެވެ. އެހެންކަމުން ޓުޗެލް ރަފީނިއާ ހޯދުމަށް ބޭނުންވި ނަމަވެސް، ރަފީނިއާ ދޫކޮށްލުމަށް ޒަވީ ބޭނުންނުވާ ކަމަށް ވަނީ ބުނެފަ އެވެ. ބާސެލޯނާގައި ކާމިޔާބު ސީޒަނެއް ހޭދަ ކުރުމަށް ފަހު، ކުރިއަށް އޮތް ސީޒަނަށް ޒަވީ ކުރިމަތިލާއިރު އޭނާ ބޭނުންވާ ކުޅުންތެރިންގެ ތެރޭގައި ރަފީނިއާ ހިމެނޭ ކަމަށް ރިޕޯޓުތައް ބުނެ އެވެ.