ސީއެމްޑީއޭ އަދި ޕީސީބީން ކޯޕަރޭޓް ގަވަރނަންސް ކޯޑު ހާމަނައިޒްކުރުމުގެ މަސައްކަތް ފަށައިފި
5 ޖޫން 2023 | ހޯމަ 12:34ކުރިމަގުގައި މި ދާއިރާ ހަރުދަނާ ކުރުމަށް ކުރެވެންހުރި ކަންކަން ދެނެގަނެވިގެންދާނެ
ސީއެމްޑީއޭ އަދި ޕީސީބީން ކޯޕަރޭޓް ގަވަރނަންސް ކޯޑު ހާމަނައިޒްކުރުމުގެ އެއްބަސްވުމުގައި ސޮއިކުރުން
ކެޕިޓަލް މާރކެޓް ޑިވެލޮޕްމަންޓް އޮތޯރިޓީއާއި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ކޯޕަރޭޓް ގަވަނަންސް ކޯޑު ހާމަނައިޒްކުރުމާއި އިތުރަށް ފުރިހަމަކުރުމަށް އެކުގައި މަސައްކަތްކުރުމަށް އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ކެޕިޓަލް މާރކެޓް ޑިވެލޮޕްމަންޓް އޮތޯރިޓީގެ ފަރާތުން ސޮއިކުރެއްވީ ސީއީއޯ މުޙައްމަދު ޙުސައިން މަނިކުއެވެ. އަދި ޕީސީބީގެ ފަރާތުން ސޮއިކުރެއްވީ ޕީސީބީގެ ރައީސް އާސިމް މުޙައްމަދެވެ.
އެމްއޯޔޫގައި ސޮއިކުރެއްވުމަށްފަހު ދެ ފަރާތުންވެސް ފާހަގަކުރެއްވީ މިއީ މުހިންމު ފެށުމެއްކަމަށާއ،ި ކޯޕަރޭޓް ގަވަނަންސް ހަރުދަނާކޮށް އޮތުމަކީ ވިޔަފާރިތަކަށާއި އިންވެސްޓަރުންނަށްވެސް ނުހަނު ބޭނުންތެރިކަމެއްކަމަށެވެ. އަދި މި ފެށުމާއި އެކުގައި ކުރިމަގުގައި މި ދާއިރާ ހަރުދަނާ ކުރުމަށް ކުރެވެންހުރި ކަންކަން ދެނެގަނެވިގެންދާނެކަމަށް އުންމީދުކުރައްވާ ކަމަށެވެ.
މި އެމްއޯޔޫގެ ދަށުން ދެ މުއައްސަސާއިން ފުރިހަމަކުރުމަށް ނިންމާފައިވާ ކަންކަމަކަމުގެ ތެރޭގައި މިހާރު ސީއެމްޑީއޭ އަދި ޕީސީބީން އެކުލަވާލައި އާންމުކޮށްފައިވާ ކޯޕަރޭޓް ގަވަނަންސް ކޯޑު ނުވަތަ ޤަވާއިދު ހަރުދަނާކުރުމަށް ދިރާސާކުރުމާއި އެގޮތުން ގެންނަން ހުށަހަޅާ އިޞްލާޙު ހިމެނޭ ކަރުދާހެއް އެކުލަވާލައި ދެ މުއައްސަސާއާއި ހިއްސާކުރުން ހިމެނެއެވެ.
ސީއެމްޑީއޭ އަދި ޕީސީބީން އެކުލަވާލައި އާންމުކޮށްފައިވާ ކޯޕަރޭޓް ގަވަރނަންސް ކޯޑު(ގަވާއިދު) ހާމަނައިޒްކުރުމާއި ގުޅޭގޮތުން ދިރާސާކޮށް އެކަންކުރުމަށް އަޅަންޖެހޭ ފިޔަވަޅުތަކާއި ގުޅޭގޮތުން ކަރުދާހެއް އެކުލަވާލައި ސީއެމްޑީއޭ އަދި ޕީސީބީއާ ހިއްސާކުރުންވެސް ހިމެނެއެވެ. އަދި ސީއެމްޑީއޭއާއި، ޕީސީބީން ސިންގަލް ކޯޕަރޭޓް ގަވަނަންސް ކޯޑު ނުތަތަ ގަވާއިދު އެކަށަ އެޅިދާނެތޯ ބަލައި އެމަގަށް މަސައްކަތްކުރެވެން އޮތްނަމަ މަސައްކަތްކުރުންވެސް ހިމެނެއެވެ.
މި އެމްއޯޔޫގެ ދަށުން ދެ މުއައްސަސާއިން އެއްބަސްވެފައިވަނީ ކޮންމެ ފަރާތަކުންވެސް ތިން މެންބަރުން ހިމެނޭގޮތުން ކޯޕަރޭޓް ގަވަނަންސް އިންޓަރއޯގަނައިޒޭޝަނަލް ކޮމިޓީއެއް އުފައްދައި އެ ކޮމިޓީއިން އެއްބަސްވާ ކަންކަން ފުރިހަމަކުރުމަށް މަސައްކަތްކުރުމަށެވެ.
