ނަޝީދު މަޖިލީހުގެ ރައީސްކަމުން ވަކިކުރުމާމެދު ދަނީ ވިސްނަމުން، މަޑުކުރަނީ ޕާޓީގެ ރައީސްވީމަ: އެމްޑީޕީ

ރައްޔިތުންގެ މަޖިލީހުގެ ރައީސްކަމުގެ މަގާމުގައި ހުންނެވި އެމްޑީޕީގެ ރައީސް، ރައީސް މުހައްމަދު ނަޝީދު މަޖިލީހުގެ ރައީސްކަމުގެ މަގާމުން ވަކިކުރުމާމެދު އެމްޑީޕީގެ ޕާލަމަންޓްރީ ގްރޫޕުގައި ވިސްނަމުންދާކަމަށް އެގްރޫޕްގެ މީޑިޔާ ކޯޑިނޭޓަރ އަދި ވެލިދޫ ދާއިރާގެ މެމްބަރ މުހައްމަދު އަބްދުﷲ ޝަފީގް ވިދާޅުވެއްޖެއެވެ.

ހޯމަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ބައްދަލް ވުމާމެދު އެމްޑީޕީ ޕީޖީގްރޫޕްގެ ހުރި ކަންބޮޑުވުންތައް ހާމަކުރުމަށް މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިން ވަނީ ރިޔާސަތާމެދު އެމްޑީޕީން ކަންބޮޑުވުންފާޅުކުރާތާ އެތައް ދުވަހެއްވާއިރު އެމަގާމުގައި ރައީސް ނަޝީދު ބަހައްޓަވަނީ ކީއްވެތޯ ސުވާލުކޮށްފައެވެ. އެސުވާލުގެ ޖަވާބު ދެއްވަމުން މުހައްމަދު އަބްދުﷲ ޝަފީގް ވިދާޅުވީ މަޖިލީހުގެ ރައީސްކަމުގެ މަގާމުން ނަޝީދު ވަކިނުކުރަނީ އެމްޑީޕީގެ ރައީސްއަކީ ނަޝީދުކަމަށްވާތީ ކުރާ އިހުތިރާމެއްގެ ގޮތުންކަމަށެވެ. ނަމަވެސް ރިޔާސަތުން ތަކުރާރުކޮށް މަޖިލީހުގެ ގަވާއިދާ ޚިލާފަށް ކަންކަން ކުރަމުންދާތީ އެކަމާމެދު ވިސްނަމުންދާކަމަށް ވިދާޅުވިއެވެ.

މުހައްމަދު އަބްދުﷲ ޝަފީގް ވިދާޅުވީ ޕާޓީގެ ރައީސްކަމުގައި ހުންނެވީ ނަޝީދު ކަމަށްވާތީވެ ކުރާ އިހުތިރާމެއްގެ ސަބަބުން ވާހަކަދައްކައިގެން ކަންކަން ހައްލުކުރެވޭތޯ މަސައްކަތްކުރަމުންދާކަމަށެވެ.

އެމްޑީޕީގެ ޕީޖީން ރިޔާސަތުގައި ނަޝީދު އިންނަވާ މަޖިލީހުގެ ގަވާއިދާ ޚިލާފަށް ކަންކަން ކުރައްވަމުންގެންދަވާކަމަށް އަންނަނީ ތަކުރާރުކޮށް ފާހަގަކުރަމުންނެވެ. އެކަމާއި ގުޅޭގޮތުން ހޯމަ ދުވަހުގެ ޖަލްސާގައި ވާހަކަދައްކަވަމުން ނަޝީދު ވިދާޅުވީ މަޖިލީހުގެ މެމްބަރުންގެ 100 އިންސައްތަ ތާއީދު އެމަނިކުފާނަށް އެބައޮތްކަމަށެވެ. އެގޮތަށް ނަޝީދު ވިދާޅުވީ ބަންޑާރަނައިބް އިބްރާހީމް ރިފްއަތުގެ އިތުބާރު ނެތް ކަމުގެ މައްސަލައިގައި މަޖިލީހުގެ ރައީސްގެ ހައިސިއްޔަތުން ރައީސް ނަޝީދު އަމަލުކުރައްވަނީ ގާނޫނުއަސާސީއާއި ރައްޔިތުންގެ މަޖިލީހުގެ ގަވައިދާ ހިލާފަށް ކަމަށް އެމްޑީޕީގެ މަރަދޫ ދާއިރާގެ މެންބަރު އިބްރާހީމް ޝަރީފް ތަކުރާރުކޮށް ވިދާޅުވުމާ ގުޅިގެންނެވެ.