ދުނިޔެ ދުށް މޮޅު ފޯވާޑުންގެ ތެރޭގައި ހިމެނޭ ސްވިޑްންގެ ޒަލަޓާން އިބްރަހިމޮވިޗް ފުޓްބޯޅަ ކުޅުން ހުއްޓާލިކަން އިއުލާންކޮށްފިއެވެ.

އޭސީ މިލާން ސީޒަންގެ ފަހު މެޗުގައި ލީގުގައި ވެރޯނާއާ ދެކޮޅަށް ނުކުތުމުގެ ކުރިން އިއުލާންކޮށްފައި އޮތީ މިލާނާއެކު އޮތް އެއްބަސްވުން އައުނުކުރާނެކަމެވެ. މިލާނުން އެކަން އިއުލާންކޮށް, ސަޕޯޓަރުންނަށް އެނގިފައި އޮތީ ފަހު މެޗަށްފަހު ކްލަބަށް އިބްރަހިމޮވިޗް އަލްވަދާއި ކިޔާކަމެވެ. ނަމަވެސް މިލާންގެ ފަހު މެޗަށްފަހު އިބްރަހިމޮވިޗް ވަނީ ފުޓްބޯޅައިން ރިޓަޔަ ކުރިކަން އިއުލާންކޮށްފައެވެ. އެނިންމުން އިއުލާންކުރީ ކަރުނައާއެކުއެވެ. އޭނާގެ އިތުރުން އެނިންމުންވީ ސަޕޯޓަރުުން ވެސް ރޮއްވާލި ނިންމުމަކަށެވެ. 41 އަހަރުގައި އިބްރަހިމޮވިޗް ކުޅުން ހުއްޓާލިއިރު އޭނާ ހިމެެނެނީ އެންމެ ސްޓައިލިޝް, އެންމެ މޮޅު ފޯވާޑުންގެ ތެރޭގައެވެ.

ކްލަބް ކެރިއަރުގައި އިބްރަހިމޮވިޗް ބަނީ 511 ގޯލް ޖަހާފައެވެ. އޭގެތެރޭގައި އޭސީ މިލާން, ޕީއެސްޖީ, މެންޗެސްޓަރ ޔުނައިޓެޑް, އިންޓަރ މިލާނަށް ޖަހައިދިން ގޯލްތައް ހިމެނެއެވެ. ހަތަރު ޤައުމެއްގެ ލީގު ހޯދިއެވެ. ކެރިއަރު ނިންމާލި ކްލަބް އޭސީ މިލާނަށް ދެވަނަ ފަހަރަށް ބަދަލުވީ 2020 ވަނަ އަހަރުއެވެ. ދެވަނަ ފަހަރަށް ބަދަލުވެވެސް, ލީގު ހޯދިއެވެ. އެކަމަކި މިސީޒަންގައި އަނިޔާގެ ސަބަބުން ކުޅެވުނީ އެންމެ ހަތަރު މެޗެވެ.

އިބްރަހިމޮވިޗް ބުނީ އޭނާއަށް މިލާނުން މަރުހަބާކީ ހުޅުވާލެވިފައިވާ އަތަކުންކަމަށެވެ. އަދި އޭނާއަށް މިލާން އިހުސާސްވީ އަމިއްލަ ގޭގެ ގޮތުގައި ކަމަށާއި, ބާކީބައި ހޭދަކުރާނީ މިލާންގެ ސަޕޯޓަރެއްގެ ގޮތުގައި ކަމަށެވެ. ކާމިޔާބު ކެރިއަރު ނިންމާލިއިރު އޭނާ ވަނީ 34 ތަށި ހޯދާފައެވެ. އޭގެތެރޭގައި 14 ލީގު ތަށި ހިމެނެއެވެ. 11 ފަހަރު ބެލެންޑިއޯ އަށް ނޮމިނޭޓްވިއެވެ. ކާމިޔާބު ކެރިއަރުން އުނިވީ ޗެމްޕިއަންސް ލީގު ތަށްޓެވެ. އެކަމަކު މެންޗެސްޓަރ ޔުނައިޓެޑާ އެކު ޔޫރޮޕާ ލީގު ހޯދިއެވެ.

އިބްރަހިމޮވިޗް ކުޅުން ހުއްޓާލިކަން އިއުލާންކުރި މެޗުން އޭސީ މިލާން މޮޅުވީ 3-1 ނެވެ.