ފްރާންސްގެ ޕީއެސްޖީ އަށް ކުޅުނު ފަހު މެޗުގައި އާޖެންޓީނާގެ ކެޕްޓަން އަދި ދުނިޔޭގެ މޮޅު ކުޅުންތެރިޔާ އާއި ސަޕޯޓަރުން ދިމާކޮށްލައިފި އެވެ.

މި މެޗުގެ ކުރިން ޕީއެސްޖީގެ މެނޭޖްމަންޓުން ވަނީ މެސީ ކުލަބާ ވަކިވާނެކަން އިއުލާނުކޮށްފަ އެވެ. މިއާއެކު މެޗުގެ ފުރަތަމަ 11ގައި ކުޅޭ ކުޅުންތެރިންގެ ނަން އިއުލާނުކުރަމުން މެސީގެ ނަން ކިއުމާއެކު ސަޕޯޓަރުންގެ އަޑުގަދަކޮށް އޭނާ އަށް މަލާމާތްކުރަން ފެށި އެވެ. އަދި މެޗު ފެށިގެން ނިމެންދެން ވެސް ޕީއެސްޖީގެ ސަޕޯޓަރުން އޭނާ އަށް ބޯޅަ ލިބޭ ގިނަ ވަގުތުތަކުގައި މަލާމާތްކުރި އެވެ.

މެސީއާ މެދު ޕީއެސްޖީގެ ސަޕޯޓަރުން ހިތްހަމަނުޖެހޭ މައިގަނޑު ސަބަބަކީ ބާސެލޯނާގައި އޭނާ ދެއްކި މޮޅު ކުޅުން ނުދެއްކުމާއި އަލުން އެކުލަބަށް ހިނގައިދާނެ ކަމަށް ފެތުރެމުންދާ އަޑުތަކެވެ. އަދި ބާސެލޯނާގެ ސަޕޯޓަރުން މިހާރު ވެސް ދަނީ އެކުލަބުގެ ކުޅޭ ކޮންމެ މެޗެއްގެ 10 ވަނަ މިނެޓުގައި މެސީ އަށް ތައުރީފްކޮށް ހަދަމުންނެވެ.

ކޮންޓްރެކްޓް އައުކުރުމަށް ޕީއެސްޖީގެ އަގުބޮޑު ހުށަހެޅުމެއް ލިބިފައިވަނިކޮށް ކުރިމަގުގައި ކުޅޭނެ ވަކި ކުލަބެއް ނުނިންމައި މެސީ ޕީއެސްޖީ ދޫކޮށްލުމުގެ ފަހަތުގައި ވެސް ސަޕޯޓަރުންގެ ދައުރެއް އެބައޮތެވެ. މި ގޮތުން މިދިޔަ ޑިސެމްބަރު މަހު އޭނާގެ ކެޕްޓަންކަމުގެ ދަށުން އާޖެންޓީނާ ވޯލްޑްކަޕް ކާމިޔާބު ކުރުމުން ދުނިޔޭގެ ތައްޓާއެކު ސަޕޯޓަރުން ކުރިމައްޗަށް ނުކުތުމަށް ޕީއެސްޖީގެ ސަޕޯޓަރުން ވަނީ ފުރުސަތުނުދީ އެކަމާ ދޮކޮޅު ހަދައިފަ އެވެ. ސަބަބަކީ އާޖެންޓީނާ ތަށި ހޯދީ ޕީއެސްޖީ ނިސްބަތްވާ ފްރާންސް ބަލިކޮށްފައި ކަމަށްވުމެވެ. ނަމަވެސް ބާސެލޯނާގެ ސަޕޯޓަރުން މެސީގެ ކާމިޔާބީ ފާހަގަކުރި އެވެ.

ނަމަވެސް ކުލަބުގެ މެނޭޖްމަންޓުން ވަނީ މެސީ އަށް ތައުރީފު ކޮށްފަ އެވެ. ކުލަބުގެ ވެރިޔާ ގަތަރުގެ ނަސީރު އަލް ހަލީފާ ބުނީ ދުނިޔޭގައި އުފެދުނު އެންމެ މޮޅު ކުޅުންތެރިޔާ ދެ އަހަރު ޕީއެސްޖީގައި ކުޅުމަކީ އެ ޓީމަށް ލިބުނު ޝަރަފަކާއި ކުރިއެރުމެއް ކަމަށެވެ.

އުމުރުން 35 އަހަރުގެ ބާސެލޯނާގެ ކުރީގެ ކެޕްޓަން އެނބުރި ދިއުން ގާތީ ވެސް ބާސެލޯނާ އަށެވެ. ނަމަވެސް އޭނާ އަށް ސައޫދީ އަރަބިއްޔާ އާއި އެމެރިލާ ލީގުގެ ހުށަހެޅުންތަކެއް ލިބިފައިވެ އެވެ.