މިރޭގެ އެއްވުމުގައި ގާނޫނާ ހިލާފު އަމަލުތައް ހިންގުމަށް ރާވަމުންދާކަމުގެ މައުލޫމާތު ލިބިފައިވޭ: ފުލުހުން
ގާނޫނާ އެއްގޮތަށް ސުލްހަވެރިކަމާއެކު ހިންގާ ހަރަކާތްތަކަށް ރައްކާތެރިކަން ފޯރުކޮށްދޭނެ
ޝަހީދު ހުސެއިން އާދަމް ބިލްޑިންގ
ޗާގޮސް މައްސަލައާ ގުޅުވައި ހުކުރު ދުވަހުގެ ރޭ ބާއްވާ އެއްވުމުގައި ގާނޫނާ ހިލާފު އަމަލުތައް ހިންގުމަށް ރާވަމުންދާކަމުގެ މައުލޫމާތު ލިބިފައިވާ ކަމަށް ފުލުހުންގެ ޚިދުމަތުން ބުނެފިއެވެ.
ސިޔާސީ ބައެއް ފަރާތްތަކުން އިސްނަގައިގެން 02 ޖޫން 2023 ވާ ހުކުރު ދުވަހުގެ ރޭ މާލޭގެ ކާނިވާ ސަރަހައްދުގައި ބޭއްވުމަށް ތައްޔާރުވަމުންދާ ހަރަކާތާއި ގުޅިގެން ފުލުހުން ބުނީ ގާނޫނު އަސާސީގެ 32 ވަނަ މާއްދާއިން ލިިބިދޭ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ހައްގު ބޭނުންކުރުމުގެ ހަމަތައް ''ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނު'' އާއި އެ ގާނޫނަށް އިސްލާހު ގެނެސްފައިވާ ގާނޫނުތަކުގައި ބަޔާންކޮށްފައިވާ ކަމަށެވެ.
ގާނޫނާ އެއްގޮތަށް ސުލްހަވެރިކަމާއެކު ހިންގާ ހަރަކާތްތަކަށް ފޯރުކޮށްދޭންޖެހޭ ރައްކާތެރިކަމާއި އެފަދަ ހަރަކާތްތައް ހިންގާ ސަރަހައްދުތަކުގެ މަގުތަކާއި އެނޫން ވެސް ތަންތަނުގެ ސަލާމަތާއި ރައްކާތެރިކަން ބެލެހެއްޓުމުގެ އިންތިޒާމްތައް ހަމަޖެއްސުމަކީ ވަރަށް ބޮޑު އިސްކަމެއް ދީގެން ކުރަމުންދާ ކަންކަމެއް ކަމަށް ފުލުހުން ބުނެއެވެ.
ފުލުހުން ބުނީ މިރޭ ކުރިއަށް ގެންދިއުމަށް ތައްޔާރުވަމުންދާ ހަރަކާތުގައި ބައިވެރިވުމަށް އަތޮޅުތެރެއިން މީހުން އަންނަ ކަމަށާއި، މިހަރަކާތުގައި ބައިވެރިވާ ބައެއް ފަރާތްތަކުން ގާނޫނާ ހިލާފު އަމަލުތައް ހިންގުމަށް ރާވަމުންދާކަމަށް މައުލޫމާތު ލިބިފައިވާ ކަމަށެވެ. އަދި ބައެއް ފަރާތްތަކުން ގާނޫނާ ހިލާފު އަމަލުތައް ހިންގާނެ ކަމަށް ބުނަމުންދާ ކަމުގެ މައުލޫމާތު ވެސް ފުލުހުންނަށް ލިބިފައިވާ ކަމަށެވެ.
އެހެންކަމުން މިހަރަކާތުގައި އާއްމު ސުލްހައަށް ބުރޫއަރާނެ އެއްވެސް ކަމެއް ނުކުރުމަށާއި، ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުގައި ބަޔާންކުރާ ހަމަތަކުގެ މަތިން ކުރިއަށް ގެންދިއުމަށާއި ގާނޫނާ ހިލާފު އެއްވެސް އަމަލެއް ނުހިންގުމަށް ފުލުހުން ވަނީ އިލްތިމާސްކޮށްފައެވެ.
