ސައުދީ ޕްރޮފެޝަނަލް ލީގުގެ އަލް ނަސްރުގައި މަޑުކުރަން ކްރިސްޓިއާނޯ ރޮނާލްޑޯ ނިންމަައިފިއެވެ.

ފަސް ފަހަރު ބެލޮންޑޯ އެވޯޑު ހޯދާފައިވާ ރޮނާލްޑޯ ވަނީ އަލް ނަސްރާއެކު ފުރަތަމަ ސީޒަން ނިންމާލާފައެވެ. 2025 ވަނަ އަހަރާ ހަމައަށް އެއްބަސްވުން ހަދާފައިވާ ރޮނާލްޑޯ ބުނީ ޓީމާ އެކު ކުރިޔަށް ދާނީ ކަމަށެވެ. ރޮނާލްޑޯ ބުނީ ސައުދީ ލީގަކީ ވަރަށް ރަނގަޅު އަދި ވާދަވެރި ވާދަވެރި ލީގެއް ކަމަށެވެ. އަދި ލީގުގައި މޮޅެތި ޓީމުތަކާއި، އަރަބި ކުޅުންތެރިން ހިމެނޭހެން މޮޅެތި ގިނަ ކުޅުންތެރިންތަކެއް ތިބިކަމަށެވެ.

މެސީ، ބެންޒެމާ އަދި މޮޑްރިޗް ފަދަ މަޝްހޫރު ކުޅުންތެރިން ސައުދީ ލީގަށް ދިއުމާ ދޭތެރޭ ގިނަ ވާހަކަތަކެއް ފެތުރޭ ދަނޑިވަޅެއްގައި ރޮނާލްޑޯ ވަނީ ވީހާވެސް ގިނަ ކުޅުންތެރިން ސައުދީ ލީގާ ގުޅުމަށް އެދިފައެވެ. ރޮނާލްޑޯ ބުނީ އެފަދަ ގިނަ ކުޅުންތެރިން ލީގާ ގުޅުނުވަރަކަށް ލީގު އިތުރަށް ވަރުގަދަ ވާނެކަމަށެވެ. އަދި މިހާރު މިދާގޮތަށް ކުރިޔަށްދާނަމަ، ކުރިޔަށް އޮތް ފަސް އަހަރު ތެރޭގައި ދުނިޔޭގެ ގަދަ ފަސް ލީގު ތެރޭ ސައުދީ ލީގު ހިމެނުމުގެ ފުރުސަތު ބޮޑުކަމަށެވެ.

މިދިޔަ އަހަރު ނޮވެމްބަރު މަހު ޔުނައިޓެޑާއެކު އެއްބަސްވުން އުވާލުމަށްފަހު، ރޮނާލްޑޯ ވަނީ އަލް ނަސްރަށް ބަދަލުވެ ކުޅުނު 16 މެޗުން 14 ލަނޑު ޖަހާފައެވެ. އަލް ނަސްރު ނިމުނީ ސައުުުުުުދީ ލީގުގެ ދެވަނައިގައެވެ.