އެއްބަސްވުމާ ޚިލާފުވެ، ހިޔާގެ ދެ ފްލެޓު އެއްކޮށްލުމުން އެ ފްލެޓު ހަވާލުކުރުމަށް އަރބަންކޯއިން އެންގި އެންގުން ހުއްޓުވުމުގެ އަމުރެއް ނުދިނުމަށް ސިވިލް ކޯޓުން ނިންމައިފިއެވެ.

ސިވިލް ކޯޓުން އެގޮތަށް ބުރާސްފަތި ދުވަހު ނިންމާފައިވަނީ އެ ދެ ފްލެޓު ހުސްކޮށް، އަރބަންކޯއާ ހަވާލުކުރުމަށް އެންގުމުން އެ އެންގުމަށް އަމަލުކުރުން ލަސްކުރުމަށާއި އެތަނުގައި ދިރިއުޅުމަށް އެއްވެސް ހުރަހެއް ނޭޅުމަށް އަރބަންކޯއަށް އެންގުމަށް ވަގުތީ އަމުރަކަށް އެދި ފްލެޓުގެ ވެރިފަރާތުން ހުށަހެޅި މައްސަލައިގައެވެ. އެގޮތުން، އަރބަންކޯއިން ފްލެޓުގެ އެއްބަސްވުން ބާތިލުކޮށްފައިވަނީ އެ އެއްބަސްވުމުގެ 16 ވަނަ މާއްދާއާ ޚިލާފަށް ކަމަށް ފްލެޓުގެ ވެރިން ވަނީ މައްސަލައިގައި ބަޔާންކޮށްފައެވެ.

ހުޅުމާލެ ދެވެނަ ފިޔަވަހީގައި ތަރައްގީކޮށްފައިވާ ހިޔާ ޓަވަރުތަކުގެ ދެ ފްލެޓެއްގެ އިންފާރު ތަޅައިލުމަށްފަހު އެ ދެފްލެޓު އެއްކޮށްލުމުން އެއީ އެއްބަސްވުމާ ޚިލާފަށްކޮށްފައިވާ ކަމަކަމަށްވުމުން އަރބަންކޯއިން ވަނީ އެ ފްލެޓުގެ ވެރިފަރާތްތައް އެއްލައްކަ ރުފިޔާއިން ޖޫރިމަނާކޮށް، ފައިސާ ފަސް ދުވަހުގެ ތެރޭގައި ދައްކާ، ފްލެޓުތައް ކުރިން ހުރި ގޮތަށް ބަދަލު ކުރަން އަންގާފައެވެ. ނަމަވެސް ދިން މުއްދަތުގައި އެންގުމާ އެއްގޮތަށް އަމަލު ނުކުރުމުން ފްލެޓުތައް ހުސްކުރުމަށްފަހު، އަރބަންކޯއާ ހަވާލުކުރުމަށް އެ ކުންފުނިން މިހާރު ވަނީ އަންގާފައެވެ.

މި ނިންމުމާ ގުޅިގެން އެ ފްލެޓުތަކުގެ ވެރިން ސިވިލް ކޯޓަށް ހުށަހެޅި މައްސަލައިގައި ބުނީ އަރބަންކޯއިން ފްލެޓުތައް އަތުލަން ނިންމުމުގެ ސަބަބުން އެތަނުގެ ފިނިޝިންގ އާއި އެހެނިހެން މަސައްކަތްތަކަށް ކޮށްފައިވާ އިންވެސްޓްމަންޓު ގެއްލި އެ ފަރާތްތަކަށް ބޮޑެތި ގެއްލުންތަކެއް ލިބިގެންދާނެ ކަމަށެވެ. އަދި އިންފާރު އަލުން ރާނައި ކުރިން ހުރި ގޮތަށް އިއާދަކުރުމަަށް ދީފަައިވާ މުއްދަތަކީ އެކަން ކުރުމަށް އެކަށީގެންވާ މުއްދަތެއް ނޫން ކަމަށް ވެސް ވަނީ ބުނެފައެވެ.

މި މައްސަލައާ ގުޅިގެން ސިވިލް ކޯޓުން ވަގުތީ އަމުރެއް ނުދިނުމަށް ނިންމާފައިވަނީ ފްލެޓުތަކުގެ ވެރިން އަރބަންކޯއާއެކު ވެފައިވާ އެއްބަސްވުމުގެ މާއްދާތަކާއި، އިމާރާތްކުރުމުގެ ގާނޫނާ އެނގި ތިބެ ހިލާފުވެފައިވާތީއެވެ. އަދި، އެ ތަން އަތުލީ ގޯސްކޮށް ކަމަށް ކޯޓުން ނިންމާ ހާލަތުގައި ވެސް ނަތީޖާއަކަށް ވާނީ އެތަން އަނބުރާ ހަވާލުކުރަން އެންގުން ކަމަށާއި، އެހެންވެ އަމުރެއް ނުނެރުނަސް، އިއާދަ ނުކުރެވޭނެ ގެއްލުންތަކެއް ލިބޭނެ ކަމަށް ނުބެލެވޭ ކަމަށް ސިވިލް ކޯޓުގެ ނިންމުމުގައި ވަނީ ބަޔާންކޮށްފައެވެ.

ހިޔާ ފްލެޓުގައި ދިރިއުޅޭ ކޮންމެ މީހަކުވެސް އެތަނުގައި ދިރިއުޅެނީ އަރބަންކޯއާއެކު ވެފައިވާ އެއްބަސްވުމެއްގެ ދަށުންނެވެ. އެ އެއްބަސްވުމުގައި އާންމުންގެ ސަލާމަތާއި ރައްކާތެރިކަން ގެއްލޭނެފަދަ އެއްވެސް އަމަލެއް ކުރުމާއި އުނދަގޫވާނެ ކަންކަން ކުރުމަކީ މަނާކަމެއް ކަމަށް ބަޔާންކޮށްފައިވެއެވެ. މީގެ ތެރޭގައި ސިނގިރޭޓު ބުއިމާއި، އަލިފާން ރޯކުރުމާއި، އިމާރާތަށް ގެއްލުން ދިނުމާއި، ބެލްކަނީގައި ނުވަތަ ކޮރިޑޯގައި ވޭޕްކުރުމާއި, ސިނގިރޭޓު ބުއިން، އަދި އަޅި ކެނޑުމަކީވެސް މަނާކަމެކެވެ.

އެއްބަސްވުމާ ހިލާފުވެފައިވާ މިންވަރަށް ބަލައި 1،000 ރުފިޔާއާއި 100،000 ރުފިޔާއާ ދެމެދުގެ އަދަދަކުން ޖޫރިމަނާކުރުމާއި، އިހުމާލުވެފައިވާ ފަރާތްތަކުގެ ޔުނިޓް އަތުލުމުގެ ހައްގުވެސް އަރބަންކޯއަށް ލިބިގެންވެއެވެ.