އަސެންސިއޯ ހޯދުމުގެ ރޭހުގެ ކުރީގައި އޮތީ ޕީއެސްޖީ!

މި ސީޒަނަށް ފަހު ރެއާލް މެޑްރިޑު ދޫކޮށްލަން ނިންމާފައިވާ މާކޯ އަސެންސިއޯ ހޯދުމުގެ ރޭހުގައި ކުރީގައި އޮތީ ފްރާންސްގެ ގަދަ ބާރު ޕެރިސް ސެއިންޓް ޖާމަން (ޕީއެސްޖީ) ކަމަށް މީޑިއާތަކުން ބުނެފި އެވެ.

މި ސީޒަނުގެ ނިޔަލަށް އަސެންސިއޯ ރެއާލާއެކު ހަދާފައިވާ އެއްބަސްވުމުގެ މުއްދަތު ހަމަވާއިރު، މިހާރު އޭނާ ވަނީ އެ ކުލަބު ދޫކޮށްލަން ނިންމައިފަ އެވެ. އެކަން އަސެންސިއޯ ވަނީ ކުލަބަށް ވެސް އަންގާފަ އެވެ. އެކަން އޭނާ އެންގީ ކުލަބުން އައު އެއްބަސްވުމެއް ހުށަހެޅުމުން ކަަމަށް ސްޕެއިންގެ މީޑިއާ ތަކުގައި ވަނީ ބުނެފަ އެވެ. ރެއާލް ދޫކޮށްލަން އަސެންސިއޯ ނިންމުމާއެކު އޭނާ ހޯދުމަށް ކުލަބުތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި އިނގިރޭސި ޕްރިމިއާ ލީގުގެ އެސްޓަން ވިލާ އާއި ޕީއެސްޖީ ހިމެނެ އެވެ. ނަމަވެސް އަސެންސިއޯ ހޯދުމުގެ ރޭހުގައި އެސްޓަން ވިލާ އަށްވުރެ ކުރީގައި އޮތީ ޕީއެސްޖީ ކަމަށް މީޑިއާތަކުން ވަނީ ރިޕޯޓުކޮށްފަ އެވެ. އެގޮތުން ޕީއެސްޖީން އަންނަނީ އަސެންސިއޯގެ އެޖެންޓް ޖޯޖް މެންޑޭސްއާއެކު މަޝްވަރާތައް ކުރިއަށް ގެންދަމުން ކަމަށާއި، އެހެންކަމުން އެސްޓަން ވިލާ އަށް އެއްވެސް ފެހި ސިގްނަލެއް ލިބިފައި ނުވާ ކަމަށް ވަނީ ބުނެފަ އެވެ.

މަޔޯކާ ދޫކޮށް އަސެންސިއޯ ރެއާލަށް ބަދަލުވީ 2014 ވަނަ އަހަރު އެވެ. ހަ އަހަރު ދުވަހަށް އެކުލަވާލި އެ އެއްބަސްވުމުގެ މުއްދަތު ހަމަވާން އޮތީ 2019 ވަނަ އަހަރު އެވެ. ނަމަވެސް އޭގެ ކުރިން 2017 ވަނަ އަހަރު ރެއާލުން ވަނީ އޭނާގެ އެއްބަސްވުން އައުކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ. އަސެންސިއޯ ވަނީ މިހާތަނަށް ރެއާލަށް ކުޅެދިން 285 މެޗުގައި 61 ލަނޑު ޖަހައިފަ އެވެ. އެ ޓީމާއެކު އޭނާ ވަނީ 16 ތައްޓެއްވެސް ކާމިޔާބުކޮށްފަ އެވެ.