ނެޝަނަލް އެޕްރެންޓިސްޝިޕް ޕްރޮގްރާމުގެ ދަށުން 665 ޒުވާނުންނަށް ފުރުސަތު ފަހިކޮށްދެވިފައިވޭ: ރައީސް ޞާލިހު
މިހާތަނަށް 15 ކުންފުންޏަކުން، ތަފާތު ދާއިރާތަކުން 1370 ޖާގަ ހަމަޖެހިފައިވޭ
މަތީއަރުތަވެރިންގެ ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވާހަކަފުޅު ދައްކަވަނީ
ހުނަރުވެރި މަސައްކަތްތަކަށް ޒުވާނުން އަހުލުވެރިކުރުމަށް ކުރިއަށް ގެންދާ ނެޝަނަލް އެޕްރެންޓިސްޝިޕް ޕްރޮގްރާމުގެ ދަށުން 665 ޒުވާނުންނަށް ފުރުސަތު ފަހިކޮށްދީފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ބުދަ ދުވަހުގެރޭ ކުރިއަށް ގެންދިޔަ މަތީ އަރުތަވެރިންގެ އިނާމު ދިނުމުގެ ޖަލްސާގައި ވާހަކުފުޅުދައްކަވަމުން ރައީސް ޞާލިހު ވިދާޅުވީ ހުނަރުވެރި މަސައްކަތްތަކަށް ޒުވާނުން އަހުލުވެރިކުރުމަށް ނެޝަނަލް އެޕްރެންޓިސްޝިޕް ޕްރޮގްރާމެއް ސަރުކާރުން ހިންގަމުންދާ ކަމަށާއި، އެއީ ތަފާތު ހުނަރުތަކުގެ ތަޖުރިބާކާރުންގެ ބެލުމުގެ ދަށުން މަސައްކަތްތައް ދަސްކޮށް، ތަމްރީނާއި ތަޖުރިބާ ހޯދައިދިނުމަށް ގައުމީ ފެންވަރުގައި ހިންގާ ޚާއްސަ ޕްރޮގްރާމެއް ކަމަށެވެ.
ރައީސް ޞާލިހު ވިދާޅުވީ މިހާތަނަށް 15 ކުންފުންޏަކުން، ތަފާތު ދާއިރާތަކުން 1370 ޖާގަ ހަމަޖެހިފައިވާ ކަމަށާއި، ނޭޝަނަލް އެޕްރެންޓިސްޝިޕް ޕްރޮގްރާމުގެ ފުރުސަތު ޖުމްލަ 665 ޒުވާނަކަށް މިހާތަނަށް ފަހިކޮށްދެވިފައިވާ ކަމަށެވެ. އަދި އެ ޕްރޮގްރާމް ހިންގުމަށް އިތުރު 8 ކުންފުންޏަކާއެކު އެމް.އޯ.ޔޫގައި ސޮއި ކުރުމަށް ތައްޔާރުވަމުންދާ ކަމަށް އެމަނިކުފާނު ވިދާޅުވިއެވެ.
ރައީސް ޞާލިހު ވިދާޅުވީ އެއާޕޯޓެއް އެޅިޔަސް އެއީ ކުދިންނަށް ހުރި ވަޒީފާ ކަމަށާއި، ސިއްހީ މަރުކަޒެއްގެ ފެންވަރު މަތިކުރިޔަސް އެއީ އުފެދޭ އިތުރު ވަޒީފާ ކަމަށެވެ. ޓާޝަރީ ފެންވަރަށް ތަރައްގީކުރާ ފަސް ހޮސްޕިޓަލަކީވެސް، ޑޮކްޓަރުންނާއި ނަރުހުންނާއި ލެބް ޓެކްނީޝަނުންނަށްޓަކައި ރަށްރަށުގައި އުފެދޭ ވަޒީފާތައް ކަމަށާއި، ފެނާއި ނަރުދަމާ ގާއިމުކުރިޔަސް، އެއީ ވެސް ހަމަ ކުދިންނަށްޓަކައި އުފެދޭ ވަޒީފާތައް ކަމަށް ރައީސް ޞާލިހު ވިދާޅުވިއެވެ.
ރައީސް ޞާލިހު ވިދާޅުވީ ފަތުރުވެރިކަން މުޅި ރާއްޖެއަށް ފުޅާވެ، އިތުރު ރިސޯޓްތަކާއި ގެސްޓް ހައުސްތައް ހުޅުވެމުންދާ ކަމަށާއި، އެއީ ވެސް ޒުވާނުންނަށް އުފެދޭ އިތުރު ވަޒީފާތައް ކަމަށެވެ. އައިސް ޕްލާންޓްތަކާއި މަސްކިރާ ބޯޓުތައް އިތުރުވާ ކަމަށާއި، އެއީ ވެސް ތަރައްގީގެ މަޝްރޫއުތަކުގެ ތެރެއިން އުފެދޭ ވަޒީފާ ކަމަށް ރައީސް ޞާލިހު ވިދާޅުވިއެވެ. އަދި މި ވަޒީފާތަކަށް ދިވެހި ޒުވާނުން އުފައްދަންޖެހޭނީ ތައުލީމާއި ތަމްރީން ދީގެން ކަމަށް އެމަނިކުފާނު ފާހަގަކުރެއްވިއެވެ.
ރައީސް ޞާލިހު ވަނީ ބެލެނިވެރިންނަށް ވެސް ޚާއްސަ އިލްތިމާއްސެއް ކުރައްވާފައެވެ. އަދި ވިދާޅުވީ ލޯބިވާ ދަރިންގެ ކިބައިގައި ހުރި ހުނަރާއި ގާބިލުކަން އިތުރަށް ތަރައްގީ ކުރުމުގައި އެކުދިންނަށް ރަނގަޅު މަގު ދައްކައި ފުރުސަތު ދިނުމަށާއި، އެ ކުދިން ޝައުގުވެރިވާ ދާއިރާތަކުން ކުރިއަށް ދިއުމަށް ހިތްވަރުދީ އެހީތެރިކަން ފޯރުކޮށްދިނުމަށް އެމަނިކުފާނު އެދިވަޑައިގެންނެވިއެވެ.
މީގެ އިތުރުން ރައީސް ޞާލިހު ވިދާޅުވީ ޒަމާނީ ފެންވަރަށް ގައުމު ތަރައްގީ ކުރުމަށް ދިވެހި ޒުވާނުންގެ އެހީތެރިކަމާއި ބައިވެރިވުމަށް ދިވެހި ގައުމު މިއަދު އޮތީ އެދިއެދި ކަމަށާއި، ކުރިމަގުގެ ޖީލުތަކަށް ގައުމު ގެންގޮސްދޭން މިއަދު ތިބީ ޒުވާނުން ކަމަށެވެ. ތަހުޒީބީ އަދި ތަރައްގީ ގައުމެއްގެ ގޮތުގައި، ކުރިމަގުގެ ޖީލުތަކާ ހަމައަށް ރާއްޖެ ގެންގޮސްދިނުމަކީ ޒުވާނުންގެ ކޮނޑުގައި އެޅިފައިވާ ގައުމީ ވާޖިބެއް ކަމަށް ރައީސް ޞާލިހު ވިދާޅުވިއެވެ. އަދި ވިދާޅުވީ މަތީ ތައުލީމުގެ މަރުހަލާއަށް ދަރިވަރުން ފަށާ ދަތުރަކީ، އެ ވާޖިބު އަދާކުރުމަށް އަޅާ ފުރަތަމަ ފިޔަވަޅު ކަމަށާއި، އެ ފިޔަވަޅުމަތީގައި ސާބިތުވެ ތިބެންޖެހޭ ކަމަށެވެ.
