ފައިނަލުގެ ކުރިން މޮރީނިއޯ: ތަށި ހޯދަން މޮޅީ ސެވިއްޔާ

އޭނާގެ ނަޒަރުގައި ޔޫރޮޕާ ލީގުގެ ތަށި ހޯދުމުގެ އެޑްވާންޓޭޖް ބޮޑީ އަދި ފައިނަލް މެޗުގެ ހޮޓް ފެވަރިޓަކީ ސެވިއްޔާ ކަމަށް ރޯމާގެ ކޯޗު ހޯސޭ މޮރީނިއޯ ބުނެފި އެވެ.

އޭނާ މިހެން ބުނީ މިރޭ ދަންވަރު ކުޅޭ މުބާރާތުގެ ފައިނަލް މެޗުގެ ކުރިން ވާހަކަ ދައްކަމުންނެވެ.

ސެވިއްޔާ ވަނީ ޔޫރޮޕާ ލީގު ހަ ފަހަރު ކާމިޔާބުކޮށްފަ އެވެ. މުބާރާތުގެ އެންމެ ކާމިޔާބު ޓީމަކީ ވެސް އެއީ އެވެ. ނަމަވެސް ޔޫރަޕުގެ މުބާރާތްތަކުގެ ފައިނަލްގައި މޮރީނިއޯ އަކީ ވެސް ވަރަށް ކާމިޔާބު ކޯޗެކެވެ. އޭނާ ވަނީ ޔޫރަޕުގެ އެންމެ ޝަރަފުވެރި މުބާރާތް ކަމަށްވާ ޗެމްޕިއަންސް ލީގު ޕޯޓޯ އާއި އިންޓަމިލާނުގައި ކާމިޔާބުކޮށްފަ އެވެ. އަދި ޔޫރޮޕާ ލީގުގެ ދެ ފަހަރު ކާމިޔާބުކޮށް މިދިޔަ އަހަރު އަލަށް ތައާރަފްކުރި ކޮންފަރެންސް ލީގު ވަނީ ރޯމާ އަށް ކާމިޔާބުކޮށްދީފަ އެވެ.

މި ފައިނަލް މެޗުން މޮޅުވާ ބަޔަކަށް ޔޫރޮޕާ ލީގުގެ ޗެމްޕިއަނުންގެ ގޮތުގައި ޗެމްޕިއަންސް ލީގު ކުޅުމުގެ ފުރުސަތު ލިބޭނެ އެވެ. މި ދެ ޓީމަށް ބަލާއިރު ދެ ޓީމު ވެސް އޮތީ އަމިއްލަ ލީގުގައި ޗެމްޕިއަންސް ލީގުން ކަޓާ ހިސާބުގަ އެވެ. ސެވިއްޔާ ސްޕެނިޝް ލީގު ނިންމަން ބާކީ އެއް މެޗަށްވީއިރު އޮތީ ތާވަލުގެ 11 ވަނާގަ އެވެ. އިޓާލިއަން ލީގުގައި ރޯމާ އޮތީ 6 ވަނާގަ އެވެ. މިހެންވެ ލީގުގެ ފަހު މެޗުން މޮޅުވެގެން އެމީހުންނަށް އަންނަ ސީޒަނުގެ ޔޫރޮޕާ ލީގުން ފުރުސަތު ލިބިގެންދާނެ އެވެ.

މޮރީނިއޯ ބުނީ ވެސް ރޯމާ އަށް ޕްރެޝަރެއް ކަމަށެވެ.