އައްޑޫ ސިޓީ
|
30 މެއި 2023 | އަންގާރަ 12:48
އައްޑޫ ސިޓީ
އައްޑޫ ސިޓީ
މިހާރު
އައްޑޫގެ އެއްހާސް ގޯތި
އައްޑޫގެ އެއްހާސް ގޯތި: މިވަގުތު ކުރިއަށްދަނީ ފޯމް އިވެލުއޭޓް ކުރުމުގެ މަސައްކަތް
 
4000 ވުރެ ގިނަ މީހުން މި ގޯތިތަކަށް އެދި ފޯމް ހުށަހަޅާފައިވޭ
 
ހިތަދޫން 500 ގޯތި ދޫކުރާއިރު، އައްޑޫގެ އިތުރު ތިން ރަށަކުން 500 ގޯތި ދޫކުރަން ވަނީ ނިންމާފައި

ބޯހިޔާވަހިކަމަށް ބޭނުންވެފައިވާ ގިނަ އަދަދެއްގެ ރައްޔިތުންތަކެއް އައްޑޫ ސިޓީގައި ދިރިއުޅެމުންދާއިރު، އައްޑޫން ދޫކުރުމަށް އިއުލާންކޮށްފައިވާ 1000 ގޯއްޗަށް ކުރިމަތިލި ފަރާތްތަކުގެ ފޯމްތައް އިވެލުއޭޓް ކުރުމުގެ މަސައްކަތް އަންނަ މަހު ނިންމާލެވެނޭ ކަމަށް އައްޑޫ ސިޓީ ކައުންސިލުން ބުނެފި އެވެ.

ސިޓީ ކައުންސިލުން މައުލޫމާތުދިން ގޮތުގައި މިއަހަރުގެ ކުރީކޮޅު އައްޑޫއިން 1000 ގޯތި ދޫކުރުމަށް ހުޅުވާލުމުން 4000 ވުރެ ގިނަ މީހުން މި ގޯތިތަކަށް އެދި ފޯމް ހުށަހަޅާފައިވެއެވެ. މިމަސައްކަތް އަވަހަށް ނިންމުމަށްޓަކައި މިވަގުތު ކުރިއަށްދަނީ ފޯމްތައް އިވެލުއޭޓް ކުރުމުގެ މަސައްކަތް ކަމަށާއި ހުޅުދޫ އަދި މީދޫގެ ގޯތި ފޯމް އިވެލުއޭޝަންގެ ބޮޑުބައި ނިމިފައިވާކަމަށް އައްޑޫ ސިޓީ ކައުންސިލުން ބުނެއެވެ. އަދި ދެން ހުރި ރަށްތަކުގެ ފޯމް އިވެލުއޭޝަންގެ މަސައްކަތް އަންނަ މަހުގެ ނިޔަލަށް ނިންމުމަށް ބާރު ސްޕީޑުގައި މަސައްކަތް ކުރަމުންދާ ކަމަށް ސިޓީ ކައުންސިލުން ބުނެއެވެ.

އިވެލުއޭޝަންގެ މަސައްކަތް ނިމި އިޢުލާން ކުރެވޭނެ ވަކި ދުވަހެއް އަދި ނޭނގޭއިރު ލިސްޓު އިއުލާން ކުރެވޭލެއް ލަސްވުމާއި ގުޅިގެން ބައެއް ފަރާތްތަކުން މިހާރުވެސް ދަނީ ކަންބޮޑުވުން ފާޅުކުރަމުންނެވެ.

އައްޑޫސިޓީ މޭޔަރު އަލީ ނިޒާރު ވިދާޅުވީ ގޯތި ނުލިބުމުގެ މައްސަލައަކީ އައްޑޫގެ އާއްމުންގެ ކަންބޮޑުވުން އިންތިހާއަށް އޮތް މައްސަލައެއް ކަމަށެވެ. ނަމަވެސް 22 އަހަރު ފަހުން ހިތަދޫއިން ގޯތި ދޫކުރުމަކީ އާއްމުންނަށް ލިބޭ އުފަލެއްގެ ގޮތުގައި އޭނާ ވަނީ ސިފަކުރައްވާފައެވެ. އައްޑޫއިން ގޯތި ދޫކުރަން ހަމަޖެހިފައިވާ ގޮތަށް ބަލާއިރު، ހިތަދޫން 500 ގޯތި ދޫކުރާއިރު، އައްޑޫގެ އިތުރު ތިން ރަށަކުން 500 ގޯތި ދޫކުރަން ވަނީ ނިންމާފައެވެ. އޭގެތެރޭގައި ފޭދޫއިން ދޫކުރާ 1،500 އަކަފޫޓުގެ 300 ގޯއްޗާއި، ހުޅުދުއާއި މީދޫއިން، ކޮންމެ ރަށަކުން 2،000 އަކަފޫޓުގެ 100 ގޯތި ހިމެނެއެވެ.

އައްޑޫސިޓީގައި ބޯހިޔާވަހިކަން ބޭނުންވާ ގިނަ ބަޔަކު ތިބިއިރު، ގެދޮރުގެ ދަތިކަން ހައްލުކުރުމަށް ސަރުކާރުން ވެސް ވަނީ ބިޔަ މަޝްރޫއެއް ފަށާފައެވެ. އެގޮތުން އައްޑޫ ބިން ހިއްކުމުގެ މަޝްރޫއުގެ މަސައްކަތް ފެށިގެން ކުރިއަށްދާއިރު، ހިތަދޫއިން ހިތަދޫން 90 ހެކްޓަރުގެ ބިން، މަރަދޫ / މަރަދޫފޭދޫން 76 ހެކްޓަރުގެ ބިން އަދި ހުޅުދޫމީދޫން 3 ހެކްޓަރުގެ ބިން ހިއްކުމަށް ވަނީ ނިންމާފައެވެ. މިކަމުގެ ސަބަބުން އައްޑޫއަށް ދިމާވެފައިވާ ބޯހިޔާވަހިކަމުގެ ދަތިތަކަށް ބޮޑެތި ހައްލުތަކެއް ލިބިގެންދާނެ ކަމަށް އައްޑޫ ސިޓީ ކައުންސިލުން ވަނީ ބުނެފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
0%
ކޮމެންޓް