އައްޑޫ ސިޓީގެ ހިތަދޫ ގެއެއްގެ ގޯތި ތެރޭގައި ބާއްވާފައި އޮތް ކާރެއް ރޯވެ، ބޭނުން ނުކުރެވޭ ވަރަށް އަނދައިފި އެވެ.
ރާއްޖެއެމްވީއާ ވާހަކަ ދައްކަވަމުން ފުލުހުންގެ މީޑިއާ އޮފިޝަލް ވިދާޅުވީ ރޭ ދަންވަރު 2:30 ހާއިރު މިކަމުގެ މައުލޫމާތު ލިބިފައިވާ ކަމަށާއި ޕޮލިހަށާއި، އެމްއެންޑީއެފްގެ ފަޔަރުން ކުރި މަސައްކަތުން އަލިފާން ނިއްވާލާފައި ވަނީ 3:30 ހާއިރު ކަމަށެވެ.
މިއީ ހޮންޑާ ފިޓް ބްރޭންޑްގެ ކާރެއް ކަމަށާއި މި އަލިފާން ކޮންޓްރޯލް ކުރެވުނު އިރު ކާރު އޮތީ ބޭނުން ނުކުރެވޭ ވަރަށް އަނދައިފަ އެވެ.
ފުލުހުން ބުނީ މި ކާރު އެންމެ ފަހުން ދުއްވުމަށް ފަހު ގެއަށް ވައްދާފައި ވަނީ ރޭ ދަންވަރު 1:30 ހާއިރު ކަމަށެވެ.
މިކާރަކީ ވަރަށް ފަހުން ބޭނުން ކުރަން ފެށި ކާރަކަށްވެފައި ކާރުގައި އަލިފާން ރޯ ވާން ޖެހޭ އެއްވެސް ކަމެއް ދިމާވެފައި ހުންނާނެ ކަމަށް ގަބޫލު ނުކުރެވޭތީ މިއީ ބަޔަކު ގަސްތުގައި ކުރިކަމަށްކަމަށް ތުހުމަތު ކުރެވޭ ކަމަށް ކާރުގެ ވެރިފަރާތުން އެހެން މީޑިޔާތަކަށް މައުލުމާތު ހިއްސާކޮށްފައި ވެއެވެ.
މައުލޫލާތު ލިބިފައިވާ ގޮތުގައި ރޯވެފައި ވަނީ އެމްއާރްޑީސީ ހިތަދޫ ސައިޓް އޮފީހުގެ މެނޭޖަރުކަން ކުރަމުން އަންނަ އަބްދުﷲ ރަޝީދުގެ އަމިއްލަ ގޭގެ ތެރޭގައި އޮތް ކާރެއްގަ އެވެ.
މި މައްސަލަ މިހާރު ފުލުހުން ދަނީ ތަހްގީގު ކުރަމުން ނެވެ.
