އައްޑޫ ސިޓީ ފޭދޫ ބަނދަރުގައި ހިޔާއެއް ތަރައްޤީކުރަނީ
30 މެއި 2023 | އަންގާރަ 06:3513 ހަފްތާގެ ތެރޭގައި މަސައްކަތް ނިންމަން އަމާޒުކޮށްފައިވޭ
އައްޑޫ ސިޓީީ ފޭދޫ ބަނދަރު ސަރަހައްދު
އައްޑޫ ސިޓީ ފޭދޫ ބަނދަރުގައި ހިޔާއެއް ތަރައްޤީ ކުރުމުގެ މަސައްކަތް ވަރަށް އަވަހަށް ފަށާނެ ކަމަށް އައްޑޫ އިކޯ ކްލަބްއިން ބުނެފިއެވެ.
ރާއްޖެއެމްވީއާއި ވާހަކަދައްކަވަމުން އައްޑޫ އިކޯ ކްލަބުގެ ސްޕޯރކްސްޕާރސަން އަދި ނާއިބް ރައީސް ފާތިމަތު އަލްމާ އަލީ ވިދާޅުވީ ބޭންކް އޮފް މޯލްޑިވްސް (ބީއެމްއެލް) ގެ ކޮމިއުނިޓީ ފަންޑުގެ ދަށުން މިއަހަރުގެ ފުރަތަމަ ފިޔަވަހީގެ ދަށުން އެހީ ލިބޭ ޕްރޮޖެކްޓްތަކުގެ ތެރޭގައި އައްޑޫ ސިޓީ ފޭދޫ ބަނދަރުގައި ހިޔާއެއް ތައްޔާރުކުރުމުގެ މަސައްކަތުގެ ޕްރޮޖެކްޓް ހޮވުނުކަމީ އެޖަމިއްޔާއިން ވަރަށް އުފާ ކުރާ ކަމެއް ކަމަށާއި ފަންޑުގެ މިއެހީއާ އެކު މަސައްކަތް ފެށުމަށް ވާންޖެހޭ ތައްޔާރީތައް ވަމުން އަންނަ ކަމަށެވެ.
މިޕްރޮޖެކްޓް ހުށަހެޅުމުގެ މައިގަނޑު މަޤްޞަދާއި ބެހޭގޮތުން ވާހަކަދައްކަވަމުން އަލްމާ ވިދާޅުވީ ފޭދޫ ބަނދަރަކީ ކާރޫބާރޫ ބޮޑު ބަނދަރެއް ކަމަށާއި ލަފާ ފުރާ ދޯނި ފަހަރުތަކާއި ފަތުރުވެރިކަމުގެ އެކި ބޭނުންތަކުގައި މިބަނދަރު ބޭނުންކުރަމުންދާއިރު ގިނަ އަދަދެއްގެ މީހުން ކޮންމެ ދުވަހަކުވެސް އެއްތަނަކަށް ޖަމާވެ ގިނަ ވަގުތު ހޭދަކުރަން ޖެހޭ ތަނަކަށްވާއިރު، މިސަރަޙައްދުގައި މީހުން މަޑުކޮށްލާނެ ރަނގަޅު ފެންވަރުގެ ތަނެއް ހުރުމަކީ މުހިއްމު ކަމެއް ކަމަށް ދެކިގެން މިމަޝްރޫއުގެ މަސައްކަތް ކުރިއަށްގެންދަން ނިންމި ކަމަށެވެ.
އެގޮތުން 35 މީހުންގެ ޖާގައިގެ މިތަން ޑިޒައިންކޮށް ކުރިއަށްގެންދާނީ ކޮންޓްރެކްޓަރަކާއި ހަވާލުކޮށްގެން ކަމަށާއި 13 ހަފްތާގެ ތެރޭގައި މަސައްކަތް ނިންމަން އަމާޒުކޮށްފައިވާ ކަމަށެވެ. މިއިމާރާތާ އެކު ފާހާނާއެއް ވެސް މި ތަނުގައި ޤާއިމްކުރާގޮތަށް ޕްލޭންކޮށްފައިވާއިރު، ހިޔާ އެޅުމަށް ކަނޑައަޅާ ސަރަޙައްދު ކައުންސިލްއާއި މަޝްވަރާކޮށްގެން ކުރިއަށްގެންދަން ނިންމާފައިވާ ކަމަށް އަލްމާ ވިދާޅުވިއެވެ.
އައްޑޫ އިކޯ ކްލަބްއިން ބުނީ މި ޖަމިއްޔާއަކީ ވަރަށް ޅަފަތުގައި އޮތް ޖަމިއްޔާއަކަށްވާއިރު، ބީއެމްއެލްގެ މިފަންޑުގެ އެހީއާ އެކު އިތުރު އެހީތައް ވެސް މިކަމަށް ބޭނުންވާނެ ކަމަށެވެ.
އައްޑޫ އިކޯ ކްލަބަކީ 2022 ވަނަ އަހަރުގެ ޑިސެމްބަރު މަހު ރަޖިސްޓްރީވި އެންޖީއޯއެކެވެ. އެގޮތުން މި އެންޖީއޯގެ މައިގަނޑު މަޤްޞަދަކީ ތިމާވެއްޓާއި ގުޅޭ އެކި ކަންކަމަށް ރައްޔިތުން ހޭލުންތެރިކުރުވުމެވެ. ވަކިން ޚާއްސަކޮށް ޕްލާސްޓިކް މަދު ކުރުމަށް ހިންގޭ ހޭލުންތެރިކުރުމުގެ ޕްރޮގްރާމްތައް އިތުރުކޮށް ސްކޫލު ކުދިންނާއި މުޖުތަޢުގެ އެންމެހާ ފަރުދުން މިކަމަށް ހޭލުންތެރިކުރުވުމެވެ. އަދި ފަތުރުވެރިކަމަށް ހާއްސަކޮށްގެން އައްޑޫ ސިޓީއަކީ ޕްލާސްޓިކް ފްރީ ސިޓީއަކަށް ހެދުމަށް ކުރާ މަސައްކަތަކީ މި އެންޖީއޯގެ ވަރަށް ބޮޑު އަމާޒެކެވެ.
