ކުނި ބިލް: 3 ބިލަށް ފައިސާ ނުދައްކައިފިނަމަ ކުނި މެނޭޖުކުރުމުގެ ޚިދުމަތް މެދުކަނޑާލުމުގެ އިހުތިޔާރު އޮވޭ
ބިލް ޓައިކުރުމުގެ އެއްބަސްވުމުގައި ސްޓެލްކޯއާއި ވެމްކޯއާ ދެމެދު ވަނީ ސޮއިކޮށްފައި
މާލޭގެ މަގުތައް ސާފުކުރުމުގައި ހަރަކާތްތެރިވާ އަންހެނުން މަގުމަތި ސާފުކުރުމުގައި
ކުނި މެނޭޖްކުރުމުގެ ޚިދުމަތަށް ރަޖިސްޓްރީ ކުރުމާއި، ބިލު ކުރުމާބެހޭ ޤަވާއިދަށް އަމަލުކުރަން ފަށައިފިއެވެ.
މި ޤަވާއިދަކީ އާންމު ބޭނުންތަކުގެ ޚިދުމަތެއްގެ ގޮތުގައި ކުނި މެނޭޖުކުރުމުގެ ޚިދުމަތް ފޯރުކޮށްދޭ ފަރާތަކުން ޚިދުމަތަށް ފީ ނެގުމުގައ،ި ކުނި މެނޭޖުކުރުމުގެ ޚިދުމަތްދޭ ފަރާތުން އަމިއްލައަށް ފީ ނަގައިގެން ނުވަތަ އާންމު ބޭނުންތަކުގެ ޚިދުމަތެއްގެ ގޮތުގައި ފޯރުކޮށްދޭ އެހެން ޚިދުމަތެއްގެ ބިލުގައި ހިމަނައިގެން އަގު ނެގުމުގެ އިޖުރާއަތުތަކާއ،ި އެ ޚިދުމަތަށް ރަޖިސްޓަރީކުރުމުގައި ޢަމަލުކުރާނެ އިޖުރާއަތުތައް ބަޔާންކުރުމަށް ޓަކައ،ި ކުނި މެނޭޖުކުރުމުގެ ޤާނޫނުގެ ދަށުން އެކުލަވައިލައިފައިވާ ގަވާއިދެކެވެ.
ކުނި މެނޭޖުކުރުމުގެ ޚިދުމަތަށް ރަޖިސްޓަރީ ކޮށްފައިވާ ފަރާތްތަކަށް ބިލުކުރުމުގައި ބިލުކުރެވޭ ތާރީޚުން ފެށިގެން ބިލު ދެއްކުމަށް ޓަކައި 30 ދުވަހުގެ މުއްދަތެއް ދޭންވާނެކަމަށް ބަޔާންކޮށްފައިވެއެވެ. ޤަވާއިދުގައި ބަޔާންކޮށްފައިވާ ގޮތުގައި ވިދިވިދިގެން 3 ބިލަށް ފައިސާ ނުދައްކައިފިނަމަ، ކުނި މެނޭޖުކުރުމުގެ ޚިދުމަތް މެދުކަނޑައިލުމުގެ އިޚުތިޔާރު ކުނި މެނޭޖުކުރުމުގެ ޚިދުމަތްދޭ ފަރާތަށް ލިބިގެންވެއެވެ.
އަދި މެދުކަނޑާލަފައިވާ ޚިދުމަތް އަލުން ފޯރުކޮށްދިނުމުގައ،ި ނުދައްކައި ހުރި ބިލުތަކުގެ ފައިސާއާއެކު ޚިދުމަތް އަލުން ފޯރުކޮށްދޭން 50 ރުފިޔާގެ ފީއެއް ނެގުމުގެ އިޚްތިޔާރު ކުނި މެނޭޖުކުރުމުގެ ޚިދުމަތްދޭ ފަރާތަށް ލިބިގެންވެއެވެ.
އެހެންނަމަވެސް، މި ގަވާއިދުގެ ދަށުން ދެ ޚިދުމަތެއްގެ ބިލު އެއްކޮށްލައިގެން އެއް ބިލެއްގެ ގޮތުގައި ބިލުކުރެވޭނަމަ، ބިލުކުރުމުގައްޔާއި ބިލު ނުދައްކާ ހާލަތުގައި ފިޔަވަޅުއެޅުމުގައި ޢަމަލުކުރާނ،ީ ކުނި މެނޭޖުކުރުމުގެ ބިލު އެއްކޮށްލެވުނު ޚިދުމަތަށް ބިލުކުރުމުގައި ޢަމަލުކުރާ އިޖުރާއަތްތަކާ އެއްގޮތްވާ ގޮތުގެ މަތިންކަަމަށް ބަޔާންކޮށްފައިވެއެވެ.
ކުނި މެނޭޖުކުރުމުގެ ޚިދުމަތަށް ކުރެވޭ ބިލު އާންމު ބޭނުންތަކުގެ އެހެން ޚިދުމަތެއްގެ ބިލުގައި ހިމަނާފައިވާ ޙާލަތުގައި ބިލު ދެއްކިކަމަށް ބަލާނީ އެ ބިލުގައި ހިމެނޭ ހުރިހާ ފައިސާއެއް ދައްކައި ޚަލާޞް ކުރުމުންނެވެ.
ވެމްކޯގެ ބިލް ކަރަންޓު ބިލުގެ ތެރޭގައި ހިމެނިގެންދިއުމާއެކު ސްޓެލްކޯއިން ކަރަންޓުގެ ޚިދުމަތް ފޯރުކޮށްދޭ ހުރިހާ ގޭބީސީއެއް ވަނީ ކުނީގެ ޚިދުމަތަށް ރަޖިސްޓްރީވެފައެވެ. މިހާރު ވެމްކޯގެ ޚިދުމަތަށް ރަޖިސްޓްރީވެފައިވަނީ 24،000 ގޭބީސީއެވެ.
ބިލް ޓައިކުރުމުގެ އެއްބަސްވުމުގައި ސްޓެލްކޯއާއި ވެމްކޯއާ ދެމެދު ސޮއިކޮށްފައިވަނީ އާދީއްތަ ދުވަހު ސްޓެލްކޯގައި ބޭއްވި ރަސްމިއްޔާތެއްގައެވެ.
ބިލް ޓައިކުރުމުގެ މަޝްވަރާތައް އެންމެ ފުރަތަމަ ފެށިގެންދިޔައިރު ވެމްކޯއިން ބުނަމުންދިޔައީ 01 އޭޕްރީލް 2023ން ފެށިގެން ވެމްކޯގެ ބިލު، ސްޓެލްކޯގެ ކަރަންޓު ބިލުގެ ތެރޭގައި ހިމެނޭނެ ކަމަށެވެ. އެހެންނަމަވެސް ގިނަ މަޝްވަރާތަކަކަށްފަހުގައި ބިލު އެއްކޮށްލުމުގެ އެއްބަސްވުމަކާ ހަމައަށް އާދެވިފައިވަނީ ދެ މަސް ފަހުންނެވެ.
