ސަރުކާރު ވަޒީފާއިން ލިބޭ މުސާރާއިން ނުފުދިގެން ޝަކުވާކޮށްލަކޮށްލާ ހުންނާނީތަ، ނޫނީ...؟

ޒަމާނުއްސުރެ މުޖުތަމަޢެއްގެ ތެރޭގައި ދައުރުވާ ޚިޔާލުތަކުގެ ތެރެއިން ދުނިޔޭގެ އެކި ކަންކޮޅުތަކުންވެސް ފާހަގަވާ އެއް ފިކުރަކީ، ސަރުކާރު ވަޒީފާއެއް އޮތުމުގެ މުހިންމު ކަމުގެ ފިކުރެވެ. އަމިއްލަ މަސައްކަތެއް ކޮށްގެން، އަމިއްލަ ފައިމައްޗަށް ތެދުވެ، ދިރިއުޅުން އާރާސްތު ކުރުމަކީ އެކަމުގައި ނުރައްކާތަކެއް އޮތް ކަމެއް ކަމުގައި ދެކެވި، ވީ ހާލަކައިގެން ސަރުކާރު ވަޒީފާއެއް އަދާ ކުރެވޭތޯ ބަލާ މީހުން މަދެއް ނޫނެވެ. ދުނިޔޭގެ އެކި ކަންކޮޅުތަކުގައި މިކަން އޮތީ ހަމަ މިހެންނެވެ. ނަމަވެސް، ޒަމާނަށް އައިސްފައިވާ އެދެވޭ، އަދި ނޭދެވޭ ބަދަލުތަކާއެކު، ކޮންމެހެންވެސް ސަރުކާރު ވަޒީފާއެއްގައި އުޅެން ޖެހޭ ކަމުގެ ފިކުރު ދަނީ ފަނޑުވަމުންނެވެ. ދިރިއުޅުމުގެ ޙަޤީޤީ މައިދާނަށް ލޯހުޅުވޭ ހިސާބުން، އެ ފިކުރަށް ބޮޑެތި ބަދަލުތަކެއް އަންނަން ފަށައެވެ.

ލީބިޔާއަށް އުފަން މަރްވާން އަލް-ޠާމީއަކީ، އޭނާއަށް ލިބެމުން ދިޔަ ސަރުކާރު ވަޒީފާގެ މުސާރައަކަށް ބަރޯސާ ވުމުގެ ބަދަލުގައި، އަމިއްލަ މަސައްކަތުން ދިރިއުޅުން އާރާސްތު ކުރުމުގެ ވަރުގަދަ ޢަޒުމުގައި ތެދުވި މީހެކެވެ. ސަރުކާރުގައި އަދާ ކުރަމުން ދިޔަ ވަޒީފާއިން ލިބޭ އާމްދަނީއަކީ، އަދުގެ ހާލަތަށް ބަލާއިރު، އެންމެ އެކަށީގެންވާ މިންވަރެއް ނޫން ކަން ޤަބޫލުކޮށް، މަރްވާންގެ މިޞްރު، ދަނޑުވެރިކަމުން ނަފާ ހޯދުމާ ދިމާއަށް ބެހެއްޓިއެވެ. އޭނާގެ ޢާއިލާގެ މިލްކިއްޔާތުގައި އޮތް ބިމެއްގައި ދަނޑުވެރިކަމުގެ މަސައްކަތް ފަށާ، ދިރިއުޅުމުގެ ޚަރަދުތައް ދެކޮޅު ޖައްސަން ފެށިއެވެ.

ދެ ދަރިންގެ ބައްޕައެއްގެ މަޤާމުގައި ހުރި މަރްވާން ކިޔައިދިން ގޮތުގައި ސަރުކާރުގައި ވަޒީފާ އަދާކޮށްގެން ލިބޭ އާމްދަނީއިން ދިރިއުޅުމަކީ އިންތިހާއަށް ދަތި ކަމެކެވެ. އަތްމަތި ދަތިވެ، އިޖުތިމާޢީ ބައެއް ހަރަކާތްތަކުންވެސް ދަރިން މަޚްރޫމު ކުރަން ޖެހޭ ފަހަރު އަންނަ ކަމަށް މަރްވާން ބުންޏެވެ.

ވެރިރަށް ތުރާބުލުސްއާ ދާދި ކައިރީގައި އޮންނަ ޤަސްރް އަލް-އަޚްޔާރްގައި މަރްވާން ގެންގުޅޭ ދަނޑުގައި، އެކި ކަހަލަ ތަރުކާރީއާއި ފަތްޕިލާވެލީގެ ބާވަތްތައް ހައްދައެވެ. ފިޔާ، ލޭޑީޒް ފިންގަރޒްއާއި ޓޮމާޓޯއަކީ މަރްވާންގެ ދަނޑަށް ތިޔާގި ބާވަތްތަކެކެވެ. މަޤްޞަދަކީ، ވީހާވެސް އާދައިގެ ބާވަތްތައް ހައްދައިގެން އަތްމަތި ތަނަވަސް ކުރުން ކަމަށް މަރްވާން ކިޔައިދިނެވެ.

ލީބިޔާގައި ޚުދުމުޚުތާރު ވެރިކަމެއް ކުރަމުން ދިޔަ މުޢަމަރު އަލް-ގައްޛާފީގެ ވެރިކަން ވައްޓާލުމަށް، ހުޅަނގުގެ އަސްކަރީ އިއްތިހާދު (ނޭޓޯ) އިސްވެ އޮވެގެން 2011 ވަނަ އަހަރު އެ ޤައުމުގައި ހިންގި ގެންދިޔަ ހަރަކާތްތަކަށް ފަހު، ލީބިޔާއަށް އަދިވެސް ފުރިހަމަ ހަމަޖެހުމެއް ލިބިފައެއް ނުވެއެވެ. ޤައުމުގެ އެކި ހިސާބުތަކުގެ ކޮންޓްރޯލް އޮންނަނީ އެކި މީހުންނަށެވެ. ސިޔާސީ އަދި އަސްކަރީ ބާރުތަކުގައި މެދުގައި ޤައުމު އޮތީ ބައިބައިވެފައެވެ.

މި ހަމަނުޖެހުންތަކުގެ ސީދާ އަސަރު، ލީބިޔާގެ އިޤްތިޞާދަށްވެސް ދަނީ ކުރަމުންނެވެ. ނަމަވެސް، ބުރަ މަސައްކަތުން ލިބޭ އެއްޗަކުން، އޭނާގެ ޢާއިލާއަށް ތަނަވަސް ދިރިއުޅުމެއް ހޯދާ ދެވިދާނެ ކަމަށް މަރްވާން ޢުއްމީދު ކުރެއެވެ.

ޤަސްރް އަލް-އަޚްޔާރްއަކީ ތުރާބުލުސްގެ އިރުން، 75 ކިލޯމީޓަރު ދުރުގައި އޮންނަ، ރަށްފުށު ސިޓީއެކެވެ. އާމްދަނީއަށް ލިބޭ އެއްޗަކާއި ދިރިއުޅުމުގެ ޚަރަދުތައް ނުބައްދަލު ކަމަށް ބުނެ ޝަކުވާ ކުރަން ހުރުމުގެ ބަދަލުގައި، މަރްވާން އިސް ކުރީ، އަމިއްލަ މަސައްކަތުން އޭނާގެ ދިރިއުޅުން އުޖާލާ ކުރުމަށެވެ. އެއްޗެއް ހާސިލު ކުރުމަށްޓަކާ، އެއްޗެއް ޤުރުބާން ކުރަން ޖެހެއެވެ. އެއީ ޒަމާނުއްސުރެ މުޖުތަމަޢުގައި ހަރުލާފައި އޮންނަ ބޯދާ ފިކުރަކާ ދެކޮޅަށް ތެދުވުން ކަމުގައި ވީ ނަމަވެސްއެވެ.