އައިސް ޕްލާންޓުތައް ގާއިމްވެގެން ދިއުމަކީ މަސްވެރިކަމަށް ބޮޑު އިންގިލާބެއް ގެނެވޭނެ ކަމެއް: އެމްޑީ ސައީދު

އައިސް ޕްލާންޓުތައް ގާއިމްވެގެން ދިއުމަކީ ރާއްޖޭގެ މަސްވެރިކަމަށް ބޮޑު އިންގިލާބެއް ގެނެވޭނެ ކަމެއް ކަމަށް, ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދު މުހައްމަދު ވިދާޅުވެއްޖެއެވެ.

ފ. ފީއަލީގެ އައު އިންޖީނުގެއާއި އޮފީސް އިމާރާތް، އަދި އައިސް ޕްލާންޓް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި އެމްޑީ ސައީދު ވިދާޅުވީ، ރައީސް އިބްރާހީމް މުހައްމަދު ސާލިހަކީ ވައުދުފުޅުވުމަށްފަހު އެވައުދުފުޅު މަތިން ހަނދުމަފުޅުނައްތަވައިލައްވާ ބޭފުޅެއް ނޫންކަމަށާއި، އެކަން ރައްޔިތުންނަށް ސާބިތުކޮށްދެމުންދާކަމަށެވެ. ރައްޔިތުންނަށް ވަމުންދިޔަ އުނދަގޫތަކުން ރައްޔިތުން ސަލާމަތްކޮށްދެއްވާކަމަށާއި، އުނދަގޫވަމުންދާ ކަންކަން މާޒީވެ ދަނީ އެމަނިކުފާނު ރައްޔިތުން މަތިން ހަނދުމަފުޅު ހުންނާތީ ކަމަށް ސައީދު ވިދާޅުވިއެވެ. އަދި ވިދާޅުވީ އެއީ އިހުލާސްތެރި ރައީސްއެއް ކަމަށެވެ.

ގާއިމްކުރެވިގެންދިޔަ އައިސް ޕްލާންޓަށް އިޝާރާތްކުރައްވައި ސައީދު ވިދާޅުވީ، އައިސްޕްލާންޓުތައް ގާއިމްވެގެން ދިއުމަކީ ރާއްޖޭގެ މަސްވެރިކަމަށް ބޮޑު އިންގިލާބެއް ގެނެވޭނެ ކަމެއް ކަމަށާއި، ރައީސްގެ ވިސްނުންފުޅާ އެއްގޮތަށް ތަރައްގީކޮށް ޚިދުމަތްތައް ބައްޓަން ކުރައްވާނެކަމަށެވެ. އެގޮތުން މުވައްޒަފުން ތަމްރީންކުރައްވާ ކަމަށާއި، ރަށްރަށުގައި ގާއިމްކުރެވޭ އައިސްޕްލާންޓުތަކާއި، އިންޖީނުގެތަކުގައި މަސައްކަތްކުރަމުންދާނީ ގާބިލް މުވައްޒަފުން ކަމަށް ސައީދު ވިދާޅުވިއެވެ. އަދި ވިދާޅުވީ ދިމާވާ އެކިއެކި މައްސަލަތައް ވަގުތުން އެމުވައްޒަފުން ހައްލުކުރާނެކަމަށެވެ.

ސައީދު ވިދާޅުވީ ރައްޔިތުން އެދޭ ގޮތަށް ޚިދުމަތް ދޭނެ ކަމުގެ ޔަގީންކަން އެބައޮތް ކަމަށެވެ. އަދި ކުރިއަށް އޮތްތަނުގައި ޚިދުމަތްތައް ފުޅާކުރުމުގެ މަސައްކަތްތައް ކުރައްވާނެކަމުގެ ޔަގީންކަން ސައީދު ދެއްވިއެވެ.