މޯލްޑިވަސް ނެޝެނަލް ޔުނިވަރސިޓީ (އެމްއެންޔޫ) ގެ ޖޮބް ފެސްޓިވަލް ފަށައިފިއެވެ.
ހޮނިހިރު ދުވަހުގެ ހަވީރު މި ޖޮބް ފެސްޓިވަލް "ފަހި ފުރުސަތު" ފައްޓަވައިދެއްވީ ޓޫރިޒަމް މިނިސްޓަރު ޑރ. އަބްދުﷲ މައުސޫމެވެ.
ޖޮބް ފެސްޓިވަލް ފައްޓަވައިދެއްވުމުގެ ގޮތުން ވާހަކަފުޅު ދައްކަވަމުން މިނިސްޓަރު ވިދާޅުވީ މި ފެއަރ މެދުވެރިކޮށް އެމީހަކު ކުރިއަށްދާން ބޭނުންވާ ދާއިރާ ކަނޑައެޅުމަށް ފަސޭހަވެގެންދާނެ ކަމަށް އުންމީދު ކުރައްވާ ކަމަށެވެ. އަދި މިފަދަ ފުރުސަތު ބޭނުން ހުރިހާ އެންމެން ވެސް ހިފުމަށް މިނިސްޓަރު އެދިވަޑައިގެންނެވިއެވެ.
މި ޖޮބް ފެސްޓިވަލް އަކީ ރާއްޖޭގެ ވަޒީފާގެ ބާޒާރުގައި ހުރި ފުރުޞަތުތަކުގެ މަޢުލޫމާތުދީ، އެ ވަޒީފާތަކަށް މީހުން ހޯދުމަށް ކުރިއަށްގެންދާ ހަރަކާތެކެވެ.
ހޮނިހިރު ދުވަހާއި އާދިއްތަ ދުވަހުގެ ހަވީރު 04:00ން ރޭގަނޑު 10:00ށް މި ޖޮބް ފެސްޓިވަލް ކުރިއަށްދާނެއެވެ.
މި ޖޮބް ފެސްޓިވަލްގައި އެމްއެންޔޫގެ ދަރިވަރުންގެ އިތުރުން އެހެނިހެން ޔުނިވަރސިޓީތަކާއި އާއްމުންނަށްވެސް ބައިވެރިވުމަށް ވަނީ ފުރުޞަތު ހުޅުވާލާފައެވެ. މިއީ އެމްއެންޔޫއިން ބާއްވާ ތިންވަނަ ޖޮބް ފެސްޓިވަލެވެ.
