130 ކިލޯ ޑްރަގް: ހެކިބަސް ނެގުން ފެށިގެން ކުރިއަށް
27 މެއި 2023 | ހޮނިހިރު 10:26ތަހުގީގުގައި ޙަރަކާތްތެރިވި ފުލުހުންގެ ހެކިބަސް ނެގުންވެސް ކުރިއަށް ގެންގޮސްފައިވޭ
ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލައިގައި ދައުވާ އުފުލާފައިވާ މީހުން
ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލައިގައި ދައުލަތުން އުފުލާފައިވާ ދައުވާތަކުގެ ޝަރީއަތުގެ އަޑުއެހުމެއް ހޮނިހިރު ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ހޮނިހިރު ދުވަހުގެ އަޑުއެހުމުގައި އޮތީ މި މައްސަލައިގެ ހެކިންގެ ހެކިބަސް ނެގުމެވެ. އެގޮތުން 10 ހެއްކެއްގެ ހެކިބަސް ނެގުމަށް އޮތީ ތާވަލު ކުރެވިފައެވެ.
ފުރަތަމަ ހެކިވެރިޔާ މި އަޑުއެހުމަށް ހާޒިރުވެ، ހެކިވެރިޔާއާ އެއްވެސް ސުވާލެއްވެސް ކުރުމުގެ ކުރިން އޭނާ ވަނީ އެއްވެސް ކަމެއް މިހާރު ހަނދާނުގައި ނެތްކަމަށް ބުނެފައެވެ.
އޭނާ ބުނީ، އޭނާ ފުލުހުންގެ ތަހުގީގަށް ބަޔާން ދިނީވެސް އޭނާއަށް ލިބުނު އިންޒާރުތަކުގެ ސަބަބުން، ބިރުން ހުރެ ކަމަށެވެ. އެ ބަޔާން ދިންއިރު އޭނާއަށް ކިޔެނީ ކޮން އެއްޗެއްކަންވެސް ނޭނގޭކަމަށް އޭނާ ބުންޏެވެ.
ފުލުހުންނަށް ދިން ބަޔާނުގައި އޭނާ ސޮއިކުރީ އެ ބަޔާން ކިޔާފައެއްވެސް ނޫންކަމަށް އޭނާ ބުންޏެވެ.
ދެވަނައަށް ހާޒިރުކުރީ ފުރަތަމަ ހާޒިރުކުރި ހެކިވެރިޔާގެ ދަރިއެކެވެ.
ދައުލަތުން ބުނާ ގޮތުގައި ދައުވާލިބޭ ފަަރާތްތަކަށް އިންޖީނުގެ މަސައްކަތެއް ކޮށްދިނުމަށްފަހު ފުރަތަމަ ހެކިވެރިޔާއަށް ލިބެންޖެހޭ ފައިސާ ގެންގޮސްދިނީ މި ހެކިވެރިޔާއެވެ.
ހެކިވެރިޔާ ބުނީ، ދޯންޏެއްގެ އިންޖީނު ހެދުމަށް "ކައްޕި" ކިޔާ މީހަކު އެދުމުން އޭނާގެ ބައްޕަގެ ނަންބަރު ދީފައިވާނެ ކަމަށެެވެ.
މީގެ ކުރިން ދިވެހި ފުލުހުންގެ ޚިދުމަތަށް އޭނާ ދިން ބަޔާނުގައި ބުނެފައިވަނީ އިންޖީނުގެ މަސައްކަތް ކޮށްދޭން އެދި އައީ އަސީލް މާހިރު ކަމަށެވެ. އަސީލް މާހިރަކީ މި މައްސަލައިގައި ދައުވާ އުފުލާފައިވާ ފަރާތެކެވެ.
ނަމަވެސް މިހާރު އެއީ ކާކުކަން ހަނދާނުގައި ނެތްކަމަށް މި އަޑުއެހުމުގައި އޭނާ ބުންޏެވެ.
މި އަޑުއެހުމުގައި އަސީލް ދެއްކުމަށްފަހު އެއީ އޭނާ ދަންނަ މީހެއްތޯ ސުވާލު ކުރުމުން އޭނާ ބުނީ، މިހާރު ކަށަވަރުކަމާއެކު ބުނަން ނޭނގޭ ކަމަށެވެ. ނަމަވެސް ބަޔާނުގައިވާނީ ސައްޙަ މައުލޫމާތުކަމަށް އޭނާ ބުންޏެވެ.
ތިންވަނައަށް ހާޒިރުކުރީ މީގެ ކުރިން ސަޕްލައި ދޯންޏެއް ގެންގުޅުނު މީހެކެވެ. އޭނާ ބުނާ ގޮތުގައި ތަކެތި ސަޕްލައި ކުރުމުގައި އެކި ފަރާތްތަކުގެ އެދުމުގެ މަތިން އެ ދޯނީގެ ބޭނުން ކޮށް އުޅެއެވެ. ނަމަވެސް ދޯނިން ދަތުރުކުރާނީ ދޯނީގެ އެ އިރެއްގެ ކެޕްޓަންކަަމަށް އޭނާ ބުންޏެވެ.
އޭނާ ބުނީ، އޭނާ އޭރު ފުލުހަށް ހާޒިރުކުރީ ދޯންޏެއް ކަފު ޖަހައިގެން ގެނައި މައްސަލައަކާއި ގުޅިގެން ކަމަށެވެ. ނަމަވެސް މިހާރު އެކަމާ ގުޅޭ ކަންކަން މާ ބޮޑަށް ހަނދާނުގައި ނެތްކަމަށް އޭނާ ބުންޏެވެ.
ދައުލަތުން ވަނީ ހެއްކާބެހޭ ޤާނޫނުގެ ދަށުން ހަނދާން އައު ކުރުމަށްޓަކައި އެ ހެކިވެރިޔާ ދިވެހި ފުލުހުންގެ ޚިދުމަތަށް ދީފައިވާ ބަޔާން ދައްކާފައެވެ.
ބަޔާން ކިޔާލުމަށްފަހު ހެކިވެރިޔާ ބުނީ، ބަޔާނުގައި އެ ވަނީ އޭނާ ދައްކާފައިވާ ވާހަކަތައް ކަމަށެވެ.
އޭރު ދޯންޏެއް ހަލާކުވެގެން ކަފު ޖަހައިގެން ގެންދިއުމަށް އެހީތެރިކަން ފޯރުކޮށްދީފައިވާ ކަމަށާއި، ނަމަވެސް އެއީ ދަންނަ ބައެއް ނޫންކަމަށް އެ ހެކިވެރިޔާ ބުންޏެވެ.
ދަތުރު އިންތިޒާމު ކުރުމާ ގުޅޭ ވާހަކަތައް ދެއްކީ އަހުމަދު މޫސާ ކިޔާ މީހެއް ކަމަށާއި، ދަތުރުގެ ތެޔޮ އަޅަން ބޭނުންވާ ލާރި ދިނީ އަހުމަދު މޫސާކަމަށް އޭނާ ބުންޏެވެ. ހެކިވެރިޔާ ބުނި ގޮތުގައި ދަތުރުގެ އަގަކީ 80،000 ރުފިޔާއެވެ.
އޭރު ފުލުހުންގެ ތަހުގީގަށް ބަޔާން ދިންއިރު ދައުވާލިބޭ ފަރާތްތަށް އައިޑެންޓިފައި ކޮށްފައިވަނީވެސް އޭނާއަށް މުޅިން އެނގިގެން ނޫންކަމަށް އެ ހެކިވެރިޔާ ބުންޏެވެ.
މީގެ އިތުރުން މި އަޑުއެހުމުގައި މި މައްސަލައިގެ ތަހުގީގުގައި ޙަރަކާތްތެރިވި ފުލުހުންގެ ހެކިބަސް ނެގުންވެސް ކުރިއަށް ގެންގޮސްފައިވެއެވެ.
